Read Toraja-Sa'dan YEHEZKIEL 26 Bible Online

YEHEZKIEL 26 - Toraja-Sa'dan bible

YEHEZKIEL 26

¹Iatonna taun ma’pessangpulo misa, allo bunga’na bulan iato, rampomi tu kadanNa PUANG lako kaleku Nakua:

²E ma’rupa tau, belanna napokadamo Tirus tu diona Yerusalem kumua: Napallakmo to! tessemo pole’ tu ba’bana mintu’ bangsa; iatu ba’ba umpatuna’ tibungka’ sia; belanna sanggangmo tu kota iato, iamoto nasebo kuappa’.

³Iamoto inde sia tu kadanNa Puangta PUANG Nakua: Manassa Aku la ullaoiko, e Tirus! Buda bangsa Kurussun ullaoiko, susitu tasik umpatikalulun bombangna.

⁴Iatu tau iato mai la ussanggang rinding tembo’na Tirus sia la natuan tu mintu’ menarana; moi iatu batu manissakna la Kusapui duka lan mai sia la Kupadadi misa’ buntu batu karing.

⁵La dadi misa’ inan pangalloan bunde lan tangnga tasik, belanna Kupokadamo susito, kadanNa Puangta PUANG. Sia la naala apa dirampa mintu’ bangsa.

⁶Iatu mai anakna baine dao kapadanganna la mate nakande pa’dang, anna issanni kumua Akumo tu PUANG.

⁷Belanna inde sia tu kadanNa Puangta PUANG, Nakua: Manassa la Kupake’de’ daa mai tu Nebukadnezar, datu Babel, datunna mintu’ datu, sola darang, kareta, pakkanarang, sia surodadu lumingka buda tongan, sae ullaoi Tirus.

⁸Iatu anakmu baine dao kapadanganna la napatei pa’dang. La nabangun tu misa’ benteng nanii sae ullaoiko sia la unggaragai tu misa’ tampo la nanii to umpatama limbui sia la umpabendan balulang dipopapa.

⁹Iatu tumbukna kayu petumbukna la naparuai tu rinding tembo’mu sia menaramu la natuan-tuan pekali bassinna.

¹⁰Kabudanna darangna anna samboiko barra’-barra’. Diona gumaluntu’na pakkanarang sia lentenan sia kareta parari, anna la tigoyak tu rinding tembo’mu, ke tamami babanganmu, susito tama kota mangka ditalo.

¹¹Iatu kanuku darangna ullese-lese mintu’ batattamu, anna sanggang; iatu mintu’ to torro lan kotamu la napatei pa’dang, sia iatu mai a’riri matoto’mu la songka rokko padang.

¹²La narampa nasang tu apa-apammu sia nalo’do’i nasang tu mai balukammu sia narondonni tu rinding tembo’mu, nakakei tu mai banua rapa’mu sia batummu, lentongmu sia batu manisakmu la nabuang rokko to’ uai.

¹³La Kupa’dei tu penaniammu sia oni katapimmu tae’mo nala dirangi len.

¹⁴La Kupopendadiko misa’ buntu batu karing; la dadiko misa’ inan pangalloan bunde, tae’mo ammu la dibangun sule. Belanna Akumo, tu PUANG, mangka umpokadai tu iannato, kadanNa Puangta PUANG.

¹⁵Inde sia tu kadanNa Puangta PUANG lako Tirus Nakua: Tae’raka nala ma’parondo tu tondok ma’biring tasik, ke narangii tu memonganna ke songkako, ke sumarroi tu to bangke sia masarrang kadipatean dio lu kalemu.

¹⁶Mintu’ arung dio biring tasik la mengkalao dao mai isungan kapayunganna anna lossokan bayu lamba’na sia ullendokan pakean disulan ma’rupa-rupa oki’na; la napennammu’ tu katirambanan; tau iato mai unno’ko’ diong lu padang sia tontong ma’parondo napobua’ katike’kenan.

¹⁷La nasa’burangko misa’ bating, anna ma’kada lako kalemu nakua: Umba mukua pa’de diong mai tasik, e kota mapulu’ taunna, misa’ kota sia to umpa’tondokki, tu umpatiramban mintu’ pa’tondokan tiku lao.

¹⁸Iatu tondok ma’biring tasik ma’parondo nasang tonna allo kasongkammu; ondongpi iatu tondok ma’biring tasik tiramban napobua’ kasanggangammu.

¹⁹Belanna inde sia tu kadanNa Puangta PUANG, Nakua: Iake Kupopendadiko misa’ kota sanggang, susitu mai kota tae’mo nanii tau ma’tondok; iake Kupatu’ba’iko uai tasik kalua’ anna samboiko uai saba’,

²⁰attu iato la Kupopengkalaoko sola tau iato mai, tu mengkalao rokko panglamunan umpengkara’pai nene’ to dolona; la Kupatorroko diong lino to mate diong to’ batu manisak dolo-dolona, sola tu to mengkalaomo rokko panglamunan, dikua damo ammu dipa’tondokki len, sia damo ammu malimbangun sule lan lino to tuo.

²¹La Kupopendadiko tu apa metirambanan, sia la ratomoko. Anna daka’ko tau apa tae’moko nakabu’tui sae lakona, kadanNa Puangta PUANG.