Read Toraja-Sa'dan YEHEZKIEL 27 Bible Online

YEHEZKIEL 27 - Toraja-Sa'dan bible

YEHEZKIEL 27

¹Rampomi tu kadanNa PUANG lako kaleku Nakua:

²E ma’rupa tau, toloranni bating tu Tirus,

³sia ma’kadako lako Tirus, tu dio babangan tama tasik, tu sipa’balukan mintu’ bangsa ma’biring tasik; kumua: Inde sia tu kadanNa Puangta PUANG, Nakua: E Tirus, mutangnga’ kumua: Sundun tongan balloku.

⁴Iatu lili’mu sae tama atena tasik, iatu to umbangunko, mangkamo napasundun tu kamaballoammu.

⁵Iatu kayu sendana dao mai Senir tu digaraga mintu’ batangmu; sia kayu arasi’ diala dao mai Libanon la digaragai lentongmu.

⁶Kayu jati dio mai Basan digaraga tu mintu’ pebosemu. Iatu salimmu gading digaraga, dipasialla’ kayu buangin dio mai tondok ma’biring tasikna Kitim.

⁷Iatu sombarammu lenang melo disulan dio mai Mesir; tu diposombaran. Iatu dipokulambu tenda iamotu sampin lango-lango sia lango-lango makaseda dio mai tondok ma’biring tasikna Elisa.

⁸To ma’tondok lan Sidon sia Arwad iamo pa’bosemu; iatu to matarru’mu o Tirus, diomo kalemu; tau iamoto tu anak pallopimmu.

⁹Iatu mai to matua sia to matarru’ dio mai Gebal diomo kalemu la umpemeloiko. Iatu mintu’na kappala’ tasik sola pallopinna diomo randanammu la umpasituka’ balukammu.

¹⁰Iatu to Persia, to Lud sia to Put tamamo surodadummu nasangbilanganmo surodadummu; natoke’i dio rinding tembo’mu tu balulangna sia songko’ bassinna; napakapua tu kamala’birammu.

¹¹Iatu mai to Arwad sia to Khelek sibendanan dao lu rinding tembo’mu, sia to Gamad dao lu menaramu; iatu mai balulangna natoke’ dio lu mintu’ rinding tembo’mu tiku lao; tau iato mai umpasundun kamaballoammu.

¹²Iatu to Tarsis iamo musipa’balukan, belanna iatu balukammu seba’; napasituka’ salaka, bassi, tumarra pute sia tumarra lotong tu balukammu.

¹³Iatu to Yawan, to Tubal sola to Mesekh musipa’balukanan duka; napasituka’ tau dibaluk sia pareanan tambaga tu balukammu.

¹⁴Dio mai Bet-Togarma nabaa tau tu darang, darang sia keledai sakean sia bagala’, napasituka’ balukammu.

¹⁵Iatu to Dedan musipa’balukanan duka; budamo tu tondok ma’biring tasik munii ma’baluk; nabammoko tu gading sia kayu lotong la napokasuiyan.

¹⁶Iatu to Aram musipa’balukanan belanna buda tu panggaragammu; iatu balukammu napasituka’ parimata ake’ lotong, parada lango-lango makaseda, sampin disulan ma’rupa-rupa oki’na; lenang, gewang, sia ake’ pute.

¹⁷Iatu to Yuda sia tondok Israel musipa’balukanan; iatu balukammu napasituka’ gandung dio mai Minit, muru, tani’ enoan, minna’ sia minna’ pedampi.

¹⁸Iatu to Damsyik musipa’balukanan belanna buda tu panggaragammu, sia belanna iatu mai balukan seba’; iatu balukammu napasituka’ anggoro’ dio mai Helbon sia bulu domba dio mai Sakhar.

¹⁹Iatu to Wedan sola to Yawan dio mai Uzal musipa’balukanan bassi ditampa, iatu apa nabalukan tau lako kalemu den duka bangle sia kariango.

²⁰Iatu to Dedan musipa’balukanan sampin dilapikan darang.

²¹Iatu to Arab sola mintu’ arungna Kedar musipa’balukanan; iatu tau iato mai umbalukan anak domba, domba laki sia bembe’ laki lako kalemu.

²²Iatu to ma’baluk dio mai Syeba sia Raema musipa’balukanan; iatu balukammu napasituka’ pebangki’ masuli’ allinna, ma’rupa-rupa parimata sia bulaan.

²³Iatu to Haran, to Kane sia to Eden, to ma’baluk dio mai Syeba, Asyur sia Kilmad musipa’balukanan duka.

²⁴Iatu tau iato mai umbalukan pakean mala’bi’, bayu lamba’ lango-lango sia disulan ma’rupa-rupa oki’na, parmadani paroki’ sia pangulang kapua.

²⁵Mintu’ kappala’ Tarsis sae umbangko balukan. Iamoto ammu sara’ naponnoi balukan lan atena tasik.

²⁶Napalanmoko pebosemu tama tasik kalua’ — nabuangko angin rampe matallo lan atena tasik.

²⁷Iatu kasugirammu, iananmu sia balukammu, iatu pallopimmu sia duru mudimmu, to umpemeloiko sia to ma’baluk, sia mintu’ surodadummu, tu dio kalemu, ondongpi mintu’ to dio kalemu — tau iato mai malabu lan atena tasik, ke allo kamalabuammu.

²⁸Belanna pekaindo’ rantangna duru mudimmu, anna ma’parondo tu bombang umbassan-bassan.

²⁹Attu iato iatu mintu’ pebose, iatu pallopi sia duru mudi untampemo kappala’na, anna kendek langngan gantanan.

³⁰Tau iato mai silallakan untangi’iko sia mapalla tongan anna ma’urrukan, napalangnganni barra’-barra’ tu ulunna sia mentombang lan to’ au.

³¹Belanna diona iko anna ma’galettung tu tau iato mai anna ma’pakean karoro’; belanna kamapallanna penaanna anna tangi’ko misa’ bating mepandingan tongan.

³²Ma’urrukammi nasa’burangko misa’ bating, sia nagenterangko misa’ badong merio-rio, nakua: Mindara tu nasusian Tirus, malabu lan atena tasik?

³³Iatonna rampo lan mai tasik tu barang apammu, mupediarammi ba’tu pira-pira bangsa; iatu ianan kambanmu sia balukanmu mupasugiran mintu’ datu lan lino.

³⁴Totemo sanggangmoko, lanna’moko diong tasik, sia tallanmoko diong uai mandalan; iatu balukammu sia mintu’ to untorroiko sangmalabuammoko sola.

³⁵Mintu’ to ma’tondok dio biring tasik tiramban untiroko: Mintu’ datunna karrang bulunna magiang, sia pa’de deata bang.

³⁶Iatu to ma’baluk dio lu mintu’ bangsa untelleko, dadimoko misa’ apa megiangan, lanna’moko sae lakona!