Read Toraja-Sa'dan YEHEZKIEL 28 Bible Online

YEHEZKIEL 28 - Toraja-Sa'dan bible

YEHEZKIEL 28

¹Rampomi tu kadanNa PUANG lako kaleku Nakua:

²E ma’rupa tau, pokadanni arungna Tirus kumua: Inde sia tu kadanNa Puangta PUANG, Nakua: Belanna mupamatampo tu penaammu ammu ma’kada kumua: Akumo misa’ deata, untorroina’ misa’ banua deata lan atena tasik, — moi ammu misa’ tolino, tangiako deata — , sia umpapadako kalemu misa’ deata lan penaammu.

³Manassa matarru’ko anna Daniel, moi misa’ rasia tae’ kabunian dio paissanmu;

⁴belanna kamatarrusammu sia kapaissananmu ammu appa’ ianan sia urrampun bulaan sia salaka lan inan pangnannammu.

⁵Diona kamatarrusammu sia kamaluteammu ma’balili mutontong umpakerangngan iananmu, sia napomatampomo penaammu tu iananmu.

⁶Iamoto, inde sia tu kadanNa Puangta PUANG belanna mupapada kalemu tu misa’ deata lan penaammu,

⁷iamoto manassa la Kuparampoiko to sae, iamotu masa’ga’na mintu’ bangsa, tau iato mai la unnonok pa’dangna la unnea kamatarrusan mala’bi’mu sia la urruttakki arrangmu.

⁸La napembuangangko rokko posi’ tana lambe’, anna mapalla tu kamateammu, belanna mate ditobokko lan atena tasik.

⁹La ma’kada siaporokoka kumua: akumora te tu misa’ deata — moi ammu tolino, tangia misa’ deata — , ke dioko tingayona to umpateiko sia lan kuasanna tu mai to untobokko?

¹⁰Manassa iatu kamateammu la susiko to tang disunna’i napatei to salian lembang, belanna Kupokadamo tu iannato, kadanNa Puangta PUANG.

¹¹Rampomi tu kadanNa PUANG lako kaleku Nakua:

¹²E ma’rupa tau, sa’buranni misa’ bating tu datunna Tirus sia ma’kadako lako kumua: Inde sia tu kadanNa Puangta PUANG: Iatu pa’kaleammu sundun garaganna, naponnoiko kapaissanan, sia sundun kamaballoammu.

¹³Lanko Eden, pa’lakNa Puang Matua, ma’rupa-rupa parimata ussitutu’i kalemu; iamotu parimata yaspisi’ mararang, parimata krisoli’ sia parimata yaspisi’ maido, parimata pirusa’, parimata ake’ maido sia parimata nepri’, parimata lasuri’, parimata ake’ malotong sia parimata malaki’. Bulaan panggaraga tu ussa’pi’i sia umpasila’ka’i lako kalemu; iatommu dipadadi, sakka’ nasangmo tu iannato.

¹⁴Ikomo tu misa’ karubion, tu umpatiballa’ pani’na sia parerung. Mangkamoko Kuparandanan inan: iatu buntu maindanna deata iamo munii torro, lolangko lan lu to’ parimata dukku-dukku.

¹⁵Tang sayuangko lan kalolangammu, randuk allo munii dipadadi, sae lako dikabu’tui tu kakadakean dio kalemu:

¹⁶Belanna kabudanna balukammu, anna kabu’ko pa’pakario-rio sia tobangko rokko kasalan. Iamoto Kusualeko dao mai buntunna deata, sia Kupatoyangko, e karubion parerung lan mai to’ batu dukku-dukku.

¹⁷Matampomo tu penaammu diona kamaballoammu iamoto muputtaimo kakinaammu sia kamala’birammu. Kupembuangangko rokko padang, sia Kupopentingayoko dio olona mintu’ datu anna telle-telleko.

¹⁸Belanna kabudanna kakadakeammu, sia kakelokammu ma’balili, ammu ruttakki tu inan maindanmu. Iamoto Kupadukkui tu api lan tangngamu anna pura ungkandeko! Kupopendadiko au diong padang dio pentirona mintu’ to untiroko.

¹⁹Iatu mintu’ to untandaiko dio lu mintu’ bangsa, tiramban untiroko; dadimoko misa’ apa megiangan, lanna’moko sae lakona!

²⁰Rampomi tu kadanNa PUANG lako kaleku Nakua:

²¹E ma’rupa tau mentingo lakoko Sidon, ammu ma’nubua’ unneai

²²sia ma’kadako kumua: Inde sia tu kadanNa Puangta PUANG, Nakua: Manassa aku la ullaoiko, Sidon! La dipakala’bi’Na’ lan tangngamu, anna tandai, kumua Akumo tu PUANG ke Kuparampoi ukungan tu kota iato sia Kupamanassa lako kalena, kumua Akumo tu To masero.

²³La Kuparampoi ra’ba biang sia to’doan rara dio lu batattana; anna mate tibambang tu tau nakande pa’dang, tu sae ullaoi tiku lao. Anna tandai tau iato mai, kumua Akumo tu PUANG.

²⁴Apa iatu to Israel tae’mo duri la untossokki ba’tu a’da’ la umpa’di’i dio lu mintu’ tau untikui, tu umpamatunai. Anna tandai tau iato mai kumua Akumo tu Puangta PUANG.

²⁵Inde sia tu kadanNa Puangta PUANG, Nakua: Iake Kupasipulungi tu to Israel dio mai mintu’ bangsa, tu lan tondokna nanii tisambo’, attu iato la Kupamanassa lako tau iato mai, kumua Akumo tu To masero dio pentirona mintu’ bangsa, sia la torro tu tau iato mai lan tondokna, tu mangka Kukamasean Yakub, taungKu.

²⁶La torro marampa’ tu tau iato mai inde to dio sia la umbangun banua sia unggaragai pa’lak anggoro’; ondongpi la torro marampa’ tu tau iato mai, ke Kuparampoimi ukungan tu mintu’ tau tiku lao, tu mangka umpamatunai. Anna tandai tau iato mai, kumua Akumo tu PUANG, Kapenombanna.