Read Toraja-Sa'dan YEHEZKIEL 3 Bible Online

YEHEZKIEL 3 - Toraja-Sa'dan bible

YEHEZKIEL 3

¹Ma’kadami lako kaleku Nakua: E ma’rupa tau, kandemi tu apa mutiro; kandemi tu sura’ tilulun; ammu male ma’kada lako to Israel.

²Attu iato kupopengangami tu sadangku, anNa pakandena’ tu sura’ tilulun iato.

³Ma’kadami lako kaleku Nakua: E ma’rupa tau pediaranni tambukmu te sura’ tilulun Kubenko sia ponnoammi ba’tangmu. Kukandemi to anna susi tani’ enoan lan sadangku.

⁴Ma’kadami lako kaleku Nakua: E ma’rupa tau, laoko umpellambi’i to Israel, ammu ma’kada lako tete dio kadangKu.

⁵Belanna tae’ mudisua lako bangsa tang muissan basana sia tang mupebuyu’, apa lakori to Israel;

⁶sia tang lu lako tu mai bangsa buda tu tang muissan basana sia tang mupebuyu’, tu tang mutandai kadanna. IangKu suako lako tau iato mai, manassa naperangiiko.

⁷Apa tae’ namorai umperangiiko to Israel, belanna tae’ namorai umperangiiNa’ belanna mintu’ to Israel makarra’ nasang batu kidena sia ma’penaa battuk.

⁸Iamoto la Kupamakarra’ tu lindomu susi tau iato mai sia la Kupamakarra’ tu batu kidemu susi tau iato mai.

⁹Susito intan mandu makarra’ na batu, la Kupadadi susi dukato tu batu kidemu; da mukataku’i tu tau iato mai sia da mukagiangi tu olona, belanna tau iato mai to pabali-bali.

¹⁰Ma’kadami lako kaleku Nakua: E ma’rupa tau, iatu mintu’ kada tu la Kupokadangko, la mupariba’tang tongan sia la mupalanda’ tongan tama pa’perangimmu.

¹¹Malemoko umpellambi’i tu to dipali’, iamotu sangbangsamu, ammu ma’kada lako ungkuanni kumua: Inde sia tu kadanNa Puangta PUANG — : ba’tu morai tu tau iato mai untananni talinga, ba’tu tae’i.

¹²Naangka’mo’ Penaa langngan, angku rangi dio boko’ku misa’ oni mongngo’ tongan — nadipudimora tu kamala’biranNa PUANG lan inan isunganNa — ,

¹³iatu ongngo’ pani’na a’gan iato tu sitampa’ len, sola tu gumalugunna mintu’ lentenan; iamotu oni mongngo’ tongan.

¹⁴Naangka’mo’ Penaa langngan, anNa solanna’ male, angku ke’de’ dossona’ napobua’ katiangkaranna penaangku, belanna mabanda’ tu limanNa PUANG untemme’na’.

¹⁵Urrampoimo’ to dipali’ dio Tel-Abib, tu torro dio randan salu Kebar, sia umba-umba nanii torro, torrona’ dio lu pitung allo, pussak bang.

¹⁶Iatonna ganna’mo pitung allo narampoimo’ kadanNa PUANG Nakua:

¹⁷E ma’rupa tau, Kuangka’moko to ma’kampana to Israel. Iammu rangii tu kada tassu’ dio randan pudukKu, la mupakilala tu tau iato mai tete dio sangangKu.

¹⁸IangKu ma’kada lako to tang mekaaluk, kumua: Inang la mateko — apa tae’ mupakilalai sia tae’ mupa’kadai la umpakilalai tu to tang mekaaluk da naturu’i tu lalan kadakena dennoupa’ mukaritutui tu katuoanna, ke susito manassa iatu to tang mekaaluk la mate lan kakadakeanna, apa iatu rarana Kupa’tuntunniko.

¹⁹Apa iake mupakilalami tu to tang mekaaluk, anna tang mengkatoba’ dio mai katangmekaalukanna sia dio mai lalan kadakena, manassa iatu tau iato la mate lan kakadakkeanna, apa iatu sunga’mu mupatilendokmo.

²⁰Sia iake denni to malambu’ tibalik dio mai kamalamburanna naumpogau’ kelokna, angKu padenanni tu misa’ katitodoan, la mate; belanna tae’ mupakilalai, la mate tu tau iato lan kasalanna, sia iatu mai penggauran melo napogau’, tae’mo anna dipaalai bilangan, apa iatu rarana Kupa’tuntunniko.

²¹Apa iake mupakilalami tu to malambu’ iato, kumua da anna pogau’ kasalan, natae’ anna landa’ umpogau’ kasalan, manassa la tuo, belanna natimang tu pa’pakilala; sia iatu sunga’mu mupatilendokmo.

²²Iatu limanNa PUANG untemme’ bangna’ dio, anNa ma’kada lako kaleku Nakua: Ke’de’ko, maleko lako lombok, na diopa angKu pa’kadaiko.

²³Ke’de’mo’ angku male lako lombok iato; kutiro tulangdanmo dio tu kamala’biranNa PUANG susi bang tu kamala’biran mangka kutiro dio randan salu Kebar; lumbangmo’ rokko padang.

²⁴Apa iatu penaa mentamamo kaleku, anNa pabendanna’; anNa pa’kadaina’ sia Nakua lako kaleku: Maleko tama, ammu tutu’i ba’ba kalemu lan banuammu.

²⁵Na iatu iko, e ma’rupa tau, manassa la napatikuiko ulang, anna pungoko ulang iato, naurunganni tae’mo mukullei male sisola tau iato mai.

²⁶Sia iatu lilamu la Kupala’ka’ langngan langi’-langi’mu, ammu mamang sia tae’mo mudadi to ma’pakilalanna, belanna tau iato mai to pabali-bali.

²⁷Apa iangku pa’kadaimoko, la Kubungka’ tu sadangmu, ammu pokadai lako, kumua: Inde sia tu kadanNa Puangta PUANG: Minda-minda morai untananni talinga, nama’perangi, na minda-minda tae’ natananni talinga da’imito. Belanna to pabali-bali tu tau iato mai.