Read Toraja-Sa'dan YEHEZKIEL 30 Bible Online

YEHEZKIEL 30 - Toraja-Sa'dan bible

YEHEZKIEL 30

¹Rampomi tu kadanNa PUANG lako kaleku, Nakua:

²E ma’rupa tau, ma’nubua’ko sia ma’kadako mukua: Inde sia tu kadanNa Puangta PUANG, Nakua: Umbatingkomi, a’a, tu allo iato!

³Belanna maruku’mo tu allo, ondongpi maruku’mo tu alloNa PUANG, iamotu misa’ allo saleburan, nalambi’mo tu attunna mintu’ bangsa.

⁴La narampoi pa’dang tu Mesir, sia nanii kama’parondoan tu Etiopia, ketibambangmi tu to dipatei lan Mesir sia iake naalami tau tu kasugiranna sia disanggang tu parandanganna.

⁵Iatu to Etiopia, to Put, to Lud, sia mintu’ bangsa pantan tama, to Kub sia mintu’ tau lan mai tondok tu mangkamo nasibassean tau iato mai, la tibambang sola nakande pa’dang.

⁶Inde sia tu kadanNa PUANG, Nakua: Iatu mintu’ tau ussande’ Mesir la tibambang nasang; la pa’de tu kataromposan nasattuanna. Randuk dio mai Migdol sae lako Siene inde to dio la nanii tibambang tu tau iato mai nakande pa’dang, kadanNa Puangta PUANG.

⁷La sanggang dio lu mintu’ tondok sanggang, la daun-lauan tu kotana dio lu mintu’ kota daun-lauan.

⁸Sia anna tandai tau iato mai kumua: Akumo tu PUANG, ke kupadukkui api lan tu Mesir sia disanggang tu mintu’ to untundui.

⁹Allo iato la sun dio mai Kaleku tu pesua ma’kappala’ la umpatirambanni tu to Etiopia masalio, sia la den kama’parondoan dio lu tau iato mai ke allona Mesir. Belanna manassa la sae!

¹⁰Inde sia tu kadanNa Puangta PUANG, Nakua: Manassa la Kuputtai tu kabudanna to Mesir tete dio limanna Nebukadnezar, datu Babel.

¹¹Iamo sola bangsana, iamotu misa’ bangsa tarru’ masa’ga’ la disolan lako Mesir la ussanggangi tu tondok iato: iatu tau iato mai la unnonok pa’dangna ullaoi Masir, anna pasitutu’i to dipatei tu tondok iato.

¹²La Kupamarangke tu messarakna salu Nil sia iatu tondok iato la Kusorongan to bulituk; la Kusanggang tu tondok iato sola tu mintu’ apa lan tete dio limanna to tama sae. Akumo, PUANG, tu mangka umpokadai tu iannato.

¹³Inde sia tu kadanNa Puangta PUANG, Nakua: Manassa la Kusanggang tu mintu’ rapang-rapang dipodeata sia Kuputtai tu kapenomban tang tongan dio mai Memfis; sia tae’mo tu to Mesir la dadi arung. Sia la Kuparampoi kamatakuran tu tondok Mesir,

¹⁴la Kusanggang tu Patros, la Kupadukkui api tu Soan sia la Kuparampoi ukungan tu Tebe.

¹⁵La Kubarrakan tu kare’dekan ara’Ku lako Sin, tambakukunna Mesir, sia la Kusabu’i tu kabudanna to lan Tebe.

¹⁶La Kupadukkui api tu Mesir, sia la ma’parondo tongan tu Sin; na iatu Tebe la dipoka-poka; na iatu Nof la nalaoi ualinna, ke allo!

¹⁷Iatu mai to manguranna On sia Pi-Beset la tibambang nakande pa’dang sia iatu to lan tondok iato la male dipali’.

¹⁸La membali malillin tu allo dio Tahpanhes, ke Kupokami tu kuasanna to Mesir inde to dio. Disanggangmo tu kamatotoran nasattuanna; la nasamboi salebu’ sia la male dipali’ tu mai anakna baine.

¹⁹SusiMo’to la umparampoi ukungan tu Mesir, anna tandai tau iato mai, kumua Akumo tu PUANG.

²⁰Iatonna taun ma’pessangpulo misa, bulan bunga’na, allo ma’pempitu bulan iato, rampomi tu kadanNa PUANG lako kaleku Nakua:

²¹E ma’rupa tau, iatu takia’na Firaun, datu Mesir, mangkamo Kurebong; manassa tae’mo nala mondo, moi dipori sia dibi’bi’, naurunganni matoto’ sule la untoe pa’dang.

²²Iamoto, inde sia tu kadanNa Puangta PUANG, Nakua: Manassa la Kulaoi tu Firaun, datu Mesir, sia la Kurebong tu takia’na patomali, la iatu mawatangnapa, la iatu rebongnamo, sia la Kuparonno’ tu pa’dang dio mai limanna.

²³La Kupatisambo’ tu to Mesir dio lu mintu’ bangsa sia la Kupatitale’ dio lu mintu’ tondok.

²⁴Iatu takia’na datu Babel la Kupamawatang sia la Kupatoei pa’dangKu, apa iatu takia’na Firaun la Kurebong, naurunganni sumarro dio olona susi sarrona to mandalan bangkena.

²⁵Ondongpi iatu takia’na datu Babel la Kupamawatang, apa iatu takia’na Firaun la langga’; anna tandai tau iato mai, kumua Akumo tu PUANG, ke Kupatoei pa’dangKu tu datu Babel, anna ayakki tu tondok Mesir.

²⁶La Kupatisambo’ tu to Mesir dio lu mintu’ bangsa sia la Kupatitale’ dio lu mintu’ tondok. Anna tandai tu tau iato mai, kumua Akumo tu PUANG.