Read Toraja-Sa'dan YEHEZKIEL 31 Bible Online

YEHEZKIEL 31 - Toraja-Sa'dan bible

YEHEZKIEL 31

¹Iatonna taun ma’pessangpulo misa, bulan ma’pentallunna, allo bunga’na bulan iato rampomi kadanNa PUANG lako kaleku Nakua:

²E ma’rupa tau, pokadanni Firaun, datu Mesir, sia lako tau makambanna, kumua, mindara mupadan diona kataramposammu?

³Manassa iatu Asyur dolona susi misa’ kayu arasi’ dao Libanon, maballo tangkena makampu daunna, sia malangka’ tu batangna; anna sumpu tu lolokna langngan gaun.

⁴Napalobo’ uai sia napakalando uai lempan diong mai liku mandalan; iatu uai lempan umpalolong uainna untikui inan tu dinii untananni sia umpalolong uainna diong kalo’ lako mintu’ kayu dao padang.

⁵Iamoto anna mandu kalando tu batangna na iatu mai mintu’na kayu dio lu padang; umbalumbun tu mai takke’-takke’na sia kalando tu tangkena belanna tontong nataranak uai tang ma’ti, tonna mane tuo.

⁶Iatu takke’-takke’na nanii messerang mintu’ manuk-manuk dao lu langi’, sia diong to’tangkena nanii kianak tu mintu’ olo’-olo’ dao kapadanganna, sia diong karionganna nanii mentiongan mintu’ bangsa kapua.

⁷Maramba’ tongan diona kakapuanna sia diona kakalandoanna tangkena, belanna iatu uaka’na rampomo lako uai tang ma’ti.

⁸Mintu’ kayu arasi’ lan pa’lakNa Puang Matua tae’ umpadanni, iatu takke’-takke’ sendana tae’ nasangtinti tu takke’-takke’na, sia iatu tangke kastala’ tae’ nasama tangkena; tae’ misa’ kayu lan pa’lakNa Puang Matua sangtinti kamaballoanna.

⁹Kupamaramba’mo sola tangke budanna; mintu’ kayu lan Eden, tu tuo lan pa’lakNa Puang Matua, ungkemburui.

¹⁰Iamoto, inde sia tu kadanNa Puangta PUANG, Nakua, belanna kalando batangna sia umpasumpu lolokna tama gaun sia belanna umpakapua penaanna ussattuan kakalandoanna,

¹¹iamoto Kusorongi tu tau iato mai lako misa’ to paa dio lu mintu’ bangsa, tu umpandasai sitinaya katangmekaalukanna sia Kutumpumo.

¹²Nalelleng to sae, iamotu tu tarru’ masa’ga’ dio lu mintu’ bangsa, nasongkanni; anna tobang tu tangkena dao lu mintu’ buntu sia diong lu mintu’ lombok, na iatu takke’-takke’na le’to lan lu mintu’ salu’-salu’ marangke dao kuli’na padang, anna iatu mintu’ bangsa dao kuli’na padang mallai dio mai to’ naonganninna, anna tampei.

¹³Mintu’ manuk-manuk dao lu langi’ ta’pa dao batang songkana, sia mintu’ olo’-olo’ dao kapadanganna messerang dio alla’ tangkena —

¹⁴kumua damo naden kayu dio to’ uai umpakapua penaanna diona kakalandoanna ba’tu umpasumpu lolokna tama gaun, sia kumua na iatu kayu unniru’ uai da namatampo sia nasanga ma’din bendan kalena tete dio kamatotoranna. Belanna iatu tau iato mai disorong nasang lako kamatean, anna male rokko lino to mate, dio lu sisola mintu’ rupa tau, iamotu lako to malemo rokko panglamunan.

¹⁵Inde sia tu kadanNa Puangta PUANG, Nakua: Iatonna male rokko lino to mate, Kubungku’ passanda bolong tu uai saba’ bannang dio kalena sia Kusapan tu salunna, naurunganni ma’ti tu uainna; bannang dio kalena, angKu bungku’i karoro’ tu Libanon; bannang dio kalena anna silayuan tu mintu’ kayu dio lu padang.

¹⁶Tete dio ongngo’ katobanganna Kupopa’parondoi tu mintu’ bangsa, tongKu parokkoi lino to mate, iamotu lako to malemo rokko panglamunan. Apa diong lino to mate dipakatanamo tu mintu’ kayu lan Eden, sia tu kayu ditonno’ sia tarru’ melo dao Libanon, iamotu mintu’ kayu unniru’ uai.

¹⁷Ia duka tu tau iato mai malemo sola rokko lino to mate, lako to dipatei pa’dang, iamotu to patunduanna, tu torro diong to’ naonganninna dio lu mintu’ bangsa.

¹⁸Umbannara tu kayu Eden mupadan diona kamala’biran sia kataromposan? La dipembuangangko rokko lino to mate sola kayu lan Eden, sia la tibambangko sola to tang disunna’i sia sola to dipatei pa’dang. Susimoto tu apa la urrampoi Firaun sola mintu’ tau kambanna, kadanNa Puangta PUANG.