Read Toraja-Sa'dan YEHEZKIEL 34 Bible Online

YEHEZKIEL 34 - Toraja-Sa'dan bible

YEHEZKIEL 34

¹Rampomi tu kadanNa PUANG lako kaleku Nakua:

²E ma’rupa tau, ma’nubua’ko unnea mintu’ to mangkambi’na Israel, ma’nubua’ko sia ma’kadako lako tau iato mai, iamotu to mangkambi’, mukua: Inde sia tu kadanNa Puangta PUANG, Nakua: Upu’ allona tu to mangkambi’na Israel, tu kalena manna nakambi’! Iatu mai to mangkambi’ tang dombaraka ia tu sipatu nakambi’?

³Iatu lompona mikande, sia mipotamangkale tu bulunna, apa tae’ ammi kambi’i tu mai domba iato.

⁴Iatu tang nabelanna tae’ mipamatoto’i, iatu masakinna tae’ midampii, iatu dibangkeinna tae’ mibimbinni, iatu pusanna tae’ mipasulei sia iatu pa’dena tae’ midaka’i sangadinna makarra’komi sia masa’ga’komi umparentai.

⁵Tisambo’-sambo’mi tu tau iato mai, belanna tae’ to mangkambi’na, sia napokande mintu’ olo’-olo’ dio lu padang, susimoto tu tau iato mai tisambo’-sambo’.

⁶Iatu mai dombaku pusa dao lu mintu’ buntu sia dao lu mintu’ tanete madao; sia tisambo’-sambo’ tu mai dombaku dao te kuli’na padang, na moi misa’ tau tae’ bang umpoinaai, ba’tu undaka’i.

⁷Iamoto, perangii tu kadanNa PUANG, e mintu’ to mangkambi’.

⁸La lelukraka tuoKu, kadanNa Puangta PUANG, belanna iatu dombaKu naporampan sia napokande mintu’ olo’-olo’ dio lu padang kataeranna to mangkambi’na — belanna iatu mai to mangkambi’ku tae’ napoinaai tu mai dombaKu; iatu mai to manglaa kalena manna nakambi’, apa iatu mai dombaKu tae’ nakambi’i —

⁹iamoto, e kamu mintu’ to mangkambi’ perangiimi tu kadanNa PUANG.

¹⁰Inde sia tu kadanNa Puangta PUANG, Nakua: Manassa la Kulaoi tu to mangkambi’ iato! La Kutuntun tu mai dombaKu dio mai limanna, sia la Kupasoro’ mangkambi’. Iatu to mangkambi’ tae’mo anna ungkambi’ kalena, sia la Kurampanan tu dombaKu lan mai sadangna, naurunganni tae’mo napokandei tau iato mai.

¹¹Belanna inde sia tu kadanNa Puangta PUANG, Nakua: Manassa Aku kalena la umpoinaai tu mai dombaKu sia la untiroi;

¹²Susi misa’ to mangkambi’ untiro baanan dombana, ke dioi lu tangnga domba tisambo’-sambo’na, la susi dukaNa’ to untiro dombaKu sia urrampananni dio mai mintu’ inan, tu nanii tisambo’ male tonna allo massalebu’ sia mapittuk.

¹³AngKu solanni tassu’ tu tau iato mai dio mai mintu’ bangsa sia la Kupasipulung dio mai mintu’ tondok, angKu baai lako padangna; sia la Kukambi’ dao lu mintu’ buntunna Israel, dio lu randan salu’-salu’ sia lako mintu’ inan tu nanii tau torro, lan tu tondok.

¹⁴Tau iato mai la Kukambi’ dio lu padang maluna riunna sia iatu inan dinii ungkambi’i la dao buntu malangka’na Israel. Inde to la nanii silengaran lan inan melo dinii ungkambi’i sia ungkande riu dio lu padang malompo dao lu mintu’ buntu Israel.

¹⁵Aku kalena la ungkambi’i tu mai dombaKu sia Aku kalena umpalenga’i, kadanNa Puangta PUANG.

¹⁶Iatu mai pa’dena la Kudaka’ sia iatu pusanna la Kupasule; iatu dibangkeinna la Kubimbin sia iatu masakinna la Kupamatoto’, apa iatu malompona sia iatu mawatangna la Kusanggangi. La Kukambi’ susi sipatunna dipogau’.

¹⁷Na kamu, e dombaKu, kadanNa Puangta PUANG, manassa la Kupaolai salunna simisanan tu domba sia bembe’ — tu mai domba laki sola bembe’ laki — .

¹⁸Tang namosoporokomika ungkandei tu riu maluna dio padang lompo, ammi lullu’i lette’mi tu mai tang mipuranna; tang namosoporokomika unniru’i tu uai malinnong, ammi lutu-lutui lette’mi tu torrona?

¹⁹Sipaturaka tu mai dombaku ungkandei tu apa mangka nalullu’ lette’mi sia unniru’i tu apa mangka nalutu-lutu lette’mi?

²⁰Iamoto, inde sia tu kadanNa Puangta PUANG lako tau iato mai, Nakua: Manassa Aku kalena la umpaolai salu tu domba malompo na iatu domba madoko.

²¹Belanna miparussunni sa’demi sia palempengmi tu tang nabelanna sia mipaserokki tandukmi sae lako miula’ lako salian,

²²iamoto la Kurampanan tu mai dombaKu, damo nadipakande; la Kupaolai salunna tu domba misa’ sola tu misa’nao.

²³Attu iato la Kuangka’ tu misa’ to mangkambi’ dio lu tau iato mai, tu la ungkambi’i, iamotu Daud, taungKu. Iamoto tu la ungkambi’i tau iato mai, sia dadi to mangkambi’na tau iato mai.

²⁴Akumote, tu PUANG, la napoKapenomban, anna Daud, taungKu, la dadi arung dio lu tau iato mai. Akumote, tu PUANG mangka umpokadai tu iannato.

²⁵La untananNa’ misa’ basse kamarampasan sola tau iato mai sia la Kusarapai tu mintu’ olo’-olo’ masuru lan mai tondok iato, naurunganni ma’din torro marampa’ tu tau iato mai dio padang aak sia mamma’ lan lu pangala’.

²⁶La Kupadadi kamauparan tu tau iato mai, ondongpi tu mintu’ apa untikui taneteKu, sia la Kupasaean uran ke attunnai; la dadi uran ma’palobo’.

²⁷Iatu mai mintu’ kayu dio lu padang la umpalao buanna sia iatu padang la umpakendek burana. La manaman tu tau iato mai tuo dio lu padangna. Anna tandai, kumua Akumo tu PUANG, ke Kurebongi tu batang ayokana sia Kurampanan lan mai limanna to umpokaunanni.

²⁸Natae’mo naporampanni mintu’ bangsa, sia tae’mo nala ungkandei olo’-olo’ dao kuli’na padang, sangadinna la torro marampa’ sia moi misa’ tau tae’mo umpatiramban lenni.

²⁹La Kupakendekan bura padang kalelean tu tau iato mai, naurunganni tae’mo tau lan tondok iato nabaa karorian sia tae’mo la umpassanni tu pelo’bona mintu’ bangsa.

³⁰Anna issanni, kumua Akumo tu PUANG, Kapenombanna, urrondongi, na tau iato mai, iamotu to Israel, taungKu, kadanNa Puangta PUANG.

³¹Kamumo tu dombaKu, iamotu domba Kukambi’; kamumo tu tolino, na Aku tu Kapenombammi, kadanNa Puangta PUANG.