Read Toraja-Sa'dan YEHEZKIEL 36 Bible Online

YEHEZKIEL 36 - Toraja-Sa'dan bible

YEHEZKIEL 36

¹E ma’rupa tau, ma’nubua’ko diona mintu’ buntunna Israel, kumua: E buntunna Israel, perangii tu kadanNa PUANG.

²Inde sia tu kadanNa Puangta PUANG, Nakua: Belanna ma’kadamo tu uali diona kamu kumua: Pallakko, iatu mintu’ tanete sipamula lino, taalamo tapomana’.

³Iamoto ma’nubua’ko sia ma’kadako kumua: Inde sia tu kadanNa Puangta PUANG, Nakua: Tonganna belanna nasanggangkomi sia nalullu’komi tau dio mai mintu’ sulapa’, kumua anna alakomi napomana’ mintu’ bangsa torronapa, sia belanna naulelean kadakekomi sia napalele bekokomi tau.

⁴Iamoto, e buntunna Israel, perangii tu kadanNa Puangta PUANG. Inde sia tu kadanNa Puangta PUANG lako mintu’ buntu, tanete, randan salu’-salu’ sia lombok, lako inan daun-lauan talo sia lako kota lo’bangmo, tu naporampan sia napoparumbasan mintu’ bangsa torronapa tiku lao.

⁵Iamoto, inde sia tu kadanNa Puangta PUANG Nakua: Tonganna mangkaMo’ ma’kada situang api kapangimburuangKu la unnukungi tu bangsa torrona sia mintu’ Edom, tu umpamanassai la unnalai napomana’ tu tondokKu situang kasendean kapuana sia katangpabilangan kapuana, kumua nasarrinni.

⁶Iamoto, ma’nubua’ko diona padangna Israel sia ma’kadako lako mintu’ buntu sia tanete, lako randan salu’-salu’ sia lombok, kumua: Inde sia tu kadanNa Puangta PUANG, Nakua: Manassa ma’kadaNa’ tete dio kapangimburuangku sia kare’dekanna ara’Ku, Kukua: Belanna mipassanmo tu kadilo’boanna tu mintu’ bangsa,

⁷iamoto, inde sia tu kadanNa Puangta PUANG, Nakua: UmpalaoNa’ sumpa Kukua: Tonganna mintu’ bangsa untikuikomi la umpassan kalena kadilo’boanna.

⁸Apa kamu, e mintu’ buntunna Israel, la mentarukkomi sia la mipadenan buammi tu Israel, taungKu, belanna mandappi’mo tu kasaeanna.

⁹Belanna manassa la saeNa’ lako kalemi sia la ma’palumati’Na’, ammi diposara’ sia diambo’i.

¹⁰Sia la Kupopemba’ka’ tu tau, tu untongkonnikomi dao, iamotu mintu’ to Israel sola nasang; iatu mintu’ kota la dipa’tondokki sule sia iatu mintu’ inan daun-lauan la dibangun sule.

¹¹La kupamakamban tu tau sola patuoan untongkonnikomi, anna memba’ka’ sia membati’, la Kupakaissikomi susito allo mangka diboko’ sia la Kukamaseikomi tu mipomelona losong na iatonna dolona, ammi tandai kumua Akumo tu PUANG.

¹²Sia la Kupalolangikomi tau, iamotu Israel, taungKu; tu unnalakomi napomana’ sia napotaa mana’komi, sia tae’mo mila umpasisayuranni anak.

¹³Inde sia tu kadanNa Puangta PUANG, Nakua: Belanna napokada tau diona kalemu kumua: Ikomo misa’ tondok pangampello’ tau, sia umpasisayuranni anak tu taunna,

¹⁴iamoto tae’mo ammu la unnampello’ tau sia tae’mo mula umpasisayuranni anak tu taummu, kadanNa Puangta PUANG.

¹⁵Sia tang la Kuparangiimoko petellena mintu’ bangsa sia tae’mo mula umpassanni tu pelo’bona mintu’ to sangpetayanan, sia tae’mo mula umpasisayuranni anak tu taummu, kadanNa Puangta PUANG.

¹⁶Rampomi tu kadanNa PUANG lako kaleku, Nakua:

¹⁷E ma’rupa tau, iatonna torropa lan tondokna tu to Israel, naruttakki napobua’ kedona sia penggauranna. Butungi to baine nalambi’ bulanna, susi dukato tu penggauranna tau iato mai dio pentiroKu.

¹⁸Iamoto Kubarrakanni tu kare’dekan ara’Ku lako tau iato mai natumang rara mangka napatibollo sia belanna naruttakki tete dio rapang-rapang dipodeatanna.

¹⁹Kupatisambo’ tu tau iato mai dio lu mintu’ bangsa, naurunganni titale’ dio lu mintu’ tondok; Kuukungmo sitinaya kedona sia penggauranna.

²⁰Umba-umba nanii rampo dio lu mintu’ bangsa napamatuna tu sanga madatungKu, belanna napokada tau diona a’ganna nakua: Iate tau iate mai taunNa PUANG, apa moi susito inang tassu’ duka ia dio mai tondokNa.

²¹Kukarintinni tu sanga madatungKu, tu mangka napamatuna to Israel dio lu mintu’ bangsa, tu nanii rampo lako.

²²Iamoto, pokadanni to Israel kumua: Inde sia tu kadanNa Puangta PUANG, Nakua: Tae’ kumua bannang dio kamu, angKu pogau’i, e to Israel, sangadinna bannang diori sanga madatungKu, tu mangka mipamatuna dio lu mintu’ bangsa, tu minii rampo lako.

²³La Kupamadatu tu sanga pasareongangKu tu mangka dipamatuna dio lu mintu’ bangsa, sia tu mangka mipamatuna dio lu mintu’ bangsa, kumua Akumo tu PUANG, kadanNa Puangta PUANG, ke Kupamanassai dio pentirona tau iato mai, kumua Akumo tu To madatu.

²⁴La Kualakomi dio mai mintu’ bangsa sia la Kupasipulungkomi lan mai mintu’ tondok, angKu baakomi tama tondokmi.

²⁵La Kubura’komi uai masero, ammi masero; la Kupamaserokomi dio mai mintu’ kamaruttakammi sia dio mai mintu’ rapang-rapang dipodeatammi.

²⁶La Kubenkomi penaa ba’ru sia la Kupatamai sumanga’ ba’ru tu ba’tengmi; na iatu penaa batu la Kualai dio mai kalemi, angKu benkomi penaa duku’.

²⁷La Kubenkomi PenaangKu la tama ba’tengmi sia Kupadadikomi to unturu’ apa Kupondok sia makaritutu umpogau’ atorangKu.

²⁸La torrokomi lan tondok mangka Kukamasean nene’ to dolomi, angKu potaukomi, na Aku mipo Kapenomban.

²⁹La Kulendokangkomi dio mai mintu’ kamaruttakammi sia la Kutambai sae tu gandung, angKu popemba’ka’i sia tae’mo nala urrampoikomi karorian.

³⁰Ondongpi la Kupatarri’ tu mai bua kayu sia la Kupopemba’ka’ tu bura padang, kumua damo naruakomi pelo’bo dio lu mintu’ bangsa napobua’ karorian.

³¹Attu iato la mikilalai tu kedo kadakemi sia penggauran tang melomi sia mikagi’gi’ tu kalemi natumang kakadakeammi sia penggauran megallianmi.

³²Tangia bannang dio kamu, angKu pogau’i te, kadanNa Puangta PUANG; melo miisanni! Sipatukomi la masiri’ sia maila’, natumang penggaurammi, e to Israel.

³³Inde sia tu kadanNa Puangta PUANG Nakua: Iake Kupamaserokomi dio mai mintu’ kakadakeammi, la Kupakeissi sule tu kota sia la Kubangun sule tu inan daun-lauan.

³⁴Iatu mai padang sanggangmo la dipadanun sule la ussonda padang lo’bang, la natiro mintu’ to lendu’ lalan.

³⁵Sia la ma’kada tu tau, nakua: Iate tondok iate tu talomo, susimo pa’lak Eden; iatu mintu’ kota tu disanggang sia diro’pok sia daun-lauan, dipamatoto’mo sule sia dipa’tondokki.

³⁶La naissan mintu’ bangsa torronapa untikuikomi, kumua Akumote, tu PUANG, umbangunni sule tu apa sanggangmo sia untananni tu apa talo. Akumote, tu PUANG, mangka umpokadai tu iannato sia Aku dukamo la umpogau’i.

³⁷Inde sia tu kadanNa Puangta PUANG, Nakua: Iate iannate la Kupalalo duka tu pengkamoyana to Israel, kumua la Kupopemba’ka’ tu tau iato mai, na iatu bilanganna la pada tuntunan domba budanna.

³⁸Pada tu tuntunan domba dipemalaran, iamotu pada tuntunan domba dio Yerusalem, ke pa’gauran, la susi dukato tu mintu’ kota sanggang naponnoi tuntunan tau. Anna tandai tau iato mai, kumua Akumo tu PUANG.