Read Toraja-Sa'dan YEHEZKIEL 37 Bible Online

YEHEZKIEL 37 - Toraja-Sa'dan bible

YEHEZKIEL 37

¹Ta’kala Naremme’na’ PUANG, anna tiakka’ tu penaangku, Nasolanna’ PUANG lako salian, anNa patorrona’ diong misa’ lombok, ponno buku to mate.

²Nasolammo’ ullilingi tiku lao, a’a titale’ tongammo diong lombok, sia tiromi, sirangkean bangmo.

³Ma’kadami lako kaleku, Nakua: E ma’rupa tau, ma’dinraka te buku iate mai tuo sule? Mebalimo’ kukua: O Puangta PUANG, Kamu unnissanni tu iannato.

⁴Ma’kadami lako kaleku Nakua: Ma’nubua’ko diona te buku iate sia kuanni kumua: E buku rangke, perangii tu kadanNa PUANG.

⁵Inde sia tu kadanNa Puangta PUANG lako mintu’ buku iate, Nakua: Manassa la Kupatamaikomi penaa, ammi tuo sule;

⁶sia Kupalakoikomi ura’, la Kupale’ke’ikomi duku’, la Kupaputu’ikomi kuli’, angKu patamaikomi penaa, miurunganni tuo sule; ammi tandai, kumua Akumo tu PUANG.

⁷Ma’nubua’mo’ susitu mangka dipasananna’, apa mane ma’nubua’na’, ta’pa denmi misa’ garese, pakalan denmi misa’ kapanggegasan, anna male sikande tu mintu’ buku, susi kasikandeanna siamo.

⁸Kutiromi tu mai ura’ ta’pa lako sia iatu duku’ le’ke’ lako, anna putu’i kuli’, apa tae’pa penaa lan.

⁹Ta’kala ma’kadaMi lako kaleku, Nakua: Ma’nubua’ko lako penaa iato, ma’nubua’ko e ma’rupa tau, ammu ma’kada lako penaa iato, mukua: Inde sia tu kadanNa Puangta PUANG: E penaa, saeko dio mai tetuk a’pa’na mata angin, ammu pamurru’i te to mate iate, anna tuo sule.

¹⁰Ma’nubua’mo susitu Napasananna’; tamami tau iato mai tu penaa, anna tuo sule sia bendan: iamotu misa’ tuntunan surodadu lendu’ tongan kapuana.

¹¹Ma’kadaMi lako kaleku, Nakua: E ma’rupa tau, iate mintu’ buku iate, iamo mintu’ to Israel. Tonganna ma’kada tu tau iato mai nakua: Iatu mai bukungki marangkemo sia ka’tumo tu rannungki, upu’mo alloki.

¹²Iamoto, ma’nubua’ko ammu ma’kada lako tau iato mai kumua: Inde sia tu kadanNa Puangta PUANG, Nakua: Manassa la Kubungka’ tu mintu’ panglamunammi sia la Kupakendekkomi lan mai panglamunammi, e taungKu, angKu solangkomi lako tondok Israel.

¹³Maneri mitandai, kumua Akumo tu PUANG, ke Kubungka’mi tu panglamunammi, sia ke Kupakendekkomi lan mai panglamunammi, e taungKu.

¹⁴Sia la Kupatamaikomi Penaangku, ammi tuo sule, sia la Kupatorrokomi dao padangmi, ammi tandai, kumua Akumo, tu PUANG, mangkamo umpokadai tu iannato sia umpogau’i, kadanNa PUANG.

¹⁵Rampomi tu kadanNa PUANG lako kaleku, Nakua:

¹⁶E ma’rupa tau, alako kayu sangpolo, ammu sura’i dio, kumua: iate kayu iate kayunna Yehuda sia to Israel, tu naala lili’na; ammu ala kayu senga’ pole’ sangpolo, ammu sura’i dao kumua: Iate kayu iate kayunna Yusuf — iamotu kayunna Efraim — sia mintu’ to Israel, tu naala lili’na.

¹⁷Ammu pasikandei sola duai, anna dadi misa’ kayu, naurunganni misa’ kayu lan limammu.

¹⁸Iake nakutanaiko bangsamu, kumua: La Mipokadanrakannika kumua apara misanga to?

¹⁹Ammu ma’kada lako kumua: Inde sia tu kadanNa Puangta PUANG, Nakua: Manassa la Kuala tu kayunna Yusuf — iamotu kayunna Efraim — sia suku Israel tu naala lili’na, sia Kupasikandei sangpolo kayunna Yehuda, angKu padadii naurunganni misa’ kayu lan limangKu.

²⁰Melo ke iatu kayu duang le’to, tu musura’i dio, lan limammu dio pentirona tau iato mai,

²¹ammu ma’kada lako mukua: Inde sia tu kadanNa Puangta PUANG, Nakua: Manassa la Kuala tu to Israel dio mai mintu’ bangsa tu nanii male: sia la Kupasipulung dio mai mintu’ inan, angKu solanni lako tondokna.

²²La Kupamisa’mora bangsa tu tau iato mai lan tondok, dao buntunna Israel, sia misa’mora datu la undatui sola nasangi; tae’mo nala da’dua bangsa sia tae’mo nala dipada’dua kadatuan.

²³Tae’mo anna ruttakki rapang-rapang dipodeatanna tu kalena sia apa megallianna sia mintu’ kapatodo-tintinganna, sangadinna la Kurampanan tu tau iato mai dio mai kamembokoranna, tu napobannang kasalan, sia la Kupamasero, naurunganni iatu tau iato mai Kupotau na Aku napoKapenomban.

²⁴Na Daud, taungKu, tu la undatui sia misa’mora to mangkambi’ tu la ungkambi’i sola nasangi. Anna turu’i tu apa Kupondok sia la nakaritutui sia la napogau’ tu atorangKu.

²⁵Anna torro lan tondok Kukamasean Yakub, taungKu, tu mangka nanii torro nene’ to dolona; manassa la torro lan, la tau iato mai la anakna la mintu’ lanto mimi’na sae lakona, na Daud, taungKu, la napoarung sae lakona.

²⁶La untananNa’ misa’ basse kasikaeloan sola tau iato mai, anna dadi misa’ basse tontong sae lakona; sia la Kukamasean misa’ inan sia la Kupopemba’ka’ na iatu inan maindanKu la Kupatontong bendan lan lu tangngana sae lakona.

²⁷Iatu inanKu la dio tau iato mai; la napoKapenombanNa’ tu tau iato mai sia la Kupotau.

²⁸Anna tandai mintu’ bangsa, kumua Akumo tu PUANG, tu umpamarimbangan to Israel, belanna iatu inan maindanKu bendan dio lu tangngana tontong sae lakona.