Read Toraja-Sa'dan YEHEZKIEL 39 Bible Online

YEHEZKIEL 39 - Toraja-Sa'dan bible

YEHEZKIEL 39

¹E iko ma’rupa tau, ma’nubua’ko lako Gog, ammu ma’kada kumua: Inde sia tu kadanNa Puangta PUANG, Nakua: Manassa la Kulaoiko, e Gog, arung tarompo’na Mesekh na Tubal.

²La saeNa’ unnalako sia Kuula’iko male sia la Kupake’de’ko dio mai inan mambela rampe daanna lu sia la Kusolangko langngan mintu’ buntunna Israel.

³La Kusa’pa tu pana anna tobang dio mai lima kairimmu sia Kuronnosan tu anak pana dio mai lima kananmu.

⁴La tibambangko mate dao buntunna Israel, iko sola mintu’ bangsa tu musolan: la Kupakandeiko langkan, iamotu manuk-manuk ma’rupa-rupa pani’na, sia olo’-olo’ dio lu padang.

⁵La tibambangko mate dio lu padang kalua’, belanna mangkamo Kupokada tu iannato, kadanNa Puangta PUANG.

⁶La Kuleba’ api tama tu Magog sia iatu mai to torro manaman dio lu tondok ma’biring tasik, anna tandai, kumua Akumo tu PUANG.

⁷La Kupa’petandan tu sanga madatungKu dio lu to Israel, taungKu, tae’mo angKu la unneloranni tu sanga madatungKu, la dipamatuna; anna tandai mintu’ bangsa, kumua Akumo tu PUANG, tu masero dio lu to Israel.

⁸Manassa iatu iannato la rampo sia la dadi, kadanNa Puangta PUANG; iamora te tu allo mangka Kupokada.

⁹Iatu pa’tondokan kota Israel la sun la umpadukku api la umballai tu mintu’ pa’buno, iamotu balulang sia pakolong, pana sia anak pana, pelonga’ sia doke, pitung taun la nanii tau iato mai umpadukkui api te mintu’nate.

¹⁰Naurunganni tae’mo anna lao unnala kayu tutungan lako padang, ba’tu unte’tek ranga’-ranga’ lan mai pangala’, belanna iatu pa’buno iato iamo la natutung. Susimoto tu tau iato mai la urrampa apanna tu tau mangka umpangrampai sia ullo’do’ apanna tu tau mangka umpanglo’do’i, kadanNa Puangta PUANG.

¹¹Attu iato la Kuben misa’ inan tu Gog, tu la nanii panglamunanna dio Israel: iamotu Lombok to lendu’, dio rampe matallona tasik; anna ampangi tu lalanna to lendu’. Inde to dio la nanii tau ullamunni tu Gog sola mintu’ to budanna, anna sangai tau: Lombok to budanna Gog.

¹²Nalamunni to Israel tu tau iato mai, la usseroi tondok pitung bulan.

¹³Mintu’ tau lan tondok la ullamunni, na iatu iannato la umpakalelean sanganna tu tau iato mai, ke attunnamo umpakala’bi’ Kaleku, kadanNa Puangta PUANG.

¹⁴Iatu tau iato mai la unnangka’ tau, tu dipatage’i male ullelei mintu’ tondok la ullamunni tu mintu’ to lendu’, tu torrona dao lu padang, sia la usseroi tu mai padang. Iake lendu’mi pitung bulan naparessami tu iannato.

¹⁵Ianna lao tu tau iato mai ussalongi tondok, anna misa’i tu tau iato mai untiroi tu buku tolino, la naosokki misa’ tanda inde to dio sae lako nalamun to manglamun diong lombok to budanna Gog.

¹⁶Den duka sanganna misa’ kota disanga: To buda; la naseroi tau iato mai tu tondok.

¹⁷E ma’rupa tau, inde sia tu kadanNa Puangta PUANG, Nakua: Pokadai lako mintu’ manuk-manuk, tu ma’rupa-rupa pani’na sia lako mintu’ olo’-olo’ dio lu padang, kumua: sipulungkomi ammi pada sae, sia sirampunkomi dio mai mintu’ inan lako pemala’ pangrere’ iato tu Kutunuangkomi, iamotu misa’ pangrere’ kapua dao lu buntunna Israel: kandekomi duku’ sia iru’komi rara.

¹⁸Iatu duku’na mintu’ to lalong la mikande sia rarana mintu’ arungna lino la miiru’, iamotu domba laki, anak domba, bembe’ laki, sapi laki, patuoan malompo nasang dio mai Basan.

¹⁹La ungkandekomi lompo sadia’mi sia la unniru’komi rara samalangomi dio mai pemala’ pangrere’, tu Kutunuangkomi.

²⁰Ondongpi dao medaKu la minii dipedia’i darang, pakkanarang, to lalong sia ma’rupa-rupa surodadu, kadanNa Puangta PUANG.

²¹Susimoto tu kamala’birangKu la Kupakalelean dio lu mintu’ bangsa, sia la natiro mintu’ bangsa tu ukungan mangka Kupalalo sia iatu lima, mangka Kupata’pan tau iato mai.

²²Anna tandai to Israel, kumua Akumo tu PUANG, Kapenombanna tau iato mai, randuk dio mai allo iato sia undinna.

²³Anna issanni mintu’ bangsa, kumua iatu to Israel dipali’mo natumang kakadakeanna; belanna tang maruru’ lako kaleKu, iamoto Kubunianni lindoKu sia Kusorong tama limanna to unneai, naurunganni tibambang nasang nakande pa’dang.

²⁴Sitinayanna kamaruttakanna sia kapatodotintinganna, angKu gau’i tu tau iato mai sia Kubunian lindoKu.

²⁵Iamoto, inde sia tu kadanNa Puangta PUANG, totemo la Kupasule tama dandanna tu Yakub sia la Kukamasei tu mintu’ to Israel sia la natukka’Na’ ara’Ku belanna sanga madatungKu.

²⁶Attu iato la nakalupai tu kaditattanna sia mintu’ penggauran tang maruru’ tu nanii tang maruru’ lako Kaleku, ke torromi sule tu tau iato mai lan tondokna sia marampa’mo, na moi misa’ tau tae’ umpatirambanni.

²⁷Iake Kupasulemi dio mai lili’na mintu’ bangsa sia Kupasipulung dio mai mintu’ tondokna ualinna, attu iato la kupamanassa lako tau iato mai dio pentirona buda bangsa, kumua Akumo tu To masero.

²⁸Anna tandai tau iato mai, kumua Akumo tu Puang Kapenombanna, la iake Kupali’i dio lu mintu’ bangsa, la iake Kupasirampunni sule tama tondokna, na moi misa’ tau tae’ Kupatorro dio.

²⁹Sia tae’mo angKu la umbunianni lindoKu, ke mangkami Kubarrakan tu PenaangKu lako to Israel, kadanNa Puangta PUANG.