Read Toraja-Sa'dan YEHEZKIEL 4 Bible Online

YEHEZKIEL 4 - Toraja-Sa'dan bible

YEHEZKIEL 4

¹E iko, ma’rupa tau, alako misa’ batu tela, padioi tingayomu, ammu pattai lako tu misa’ kota, iamotu Yerusalem.

²Pattai susito ke dipatama limbui: pabendanni tu misa’ benteng tu dinii sae ullaoi, garagai tu misa’ tampo la umpatama limbui, pabendanni tu mai tenda surodadu sia palilingi kayu petumbuk usseran benteng.

³La muala tu misa’ pamuntu bassi, la muporinding lan alla’mu sia kota iato, ammu tontong umpenunui, naurunganni ditiro susi ke dipatama limbui; ammu patama limbui. Iate iannate misa’ tanda lako to Israel.

⁴Iatu iko bambangangko kalemu dio la’pek kairimmu, mupatorroi dao tu kakadakeanna to Israel: pada tu allona munii umbambangan kalemu, pada dukato munii umpatoppo’i dao la’pekmu tu kakadakeanna tau iato mai.

⁵Sia iatu taun kakadakeanna tau iato mai Kupatanggungiko pada bilanganna tu allo iato, talluratu’ ngkasera pulona allona. Susimoto tu kakadakeanna to Israel mupatoppo’ dao la’pekmu.

⁶Iake musundunnimi tu iannato, la umbambangan pole’ko kalemu, iamotu dio la’pek kananmu; ammu patoppo’i dao la’pekmu tu kakadakeanna to Yehuda: patangpulo allona; ke sangtaunoi, Kupatanggungiko sangallo.

⁷La tontong bangko umpenunui tu Yerusalem dipatama limbu sia tontong tipoli’ tu lima bayummu, sia la mupa’nubuaran tu kasangganganna.

⁸Manassa Kupatikuiko ulang, da ammu membaliang lako la’pek sangbaliammu sae lako ganna’na tu allo munii ma’patama limbu.

⁹Sia la unnalako gandung, dalle sisikan, kadong, kadong barra’, ba’tan sia gandung kebulu, patamai kurin, ammu garagai roti; iatu allo munii umbambangan kalemu dio to’ la’pekmu, iamotu talluratu’ ngkasera pulona, la munii ungkandei.

¹⁰Iatu kande la mukande la ditimbang duangpulo sikele’ sangallo; iake attunnaomi la mukandeomo sidi’.

¹¹Sia la musuka’ tu uai muiru’, sangtaa annanna misa’ hin; iake attunnaomi la muiru’omo sidi’.

¹²Sia la mukande tu roti iato susi roti dalle sisikan, ammu tunui tu roti dalle sisikan iato dao to’ tai marangkena tau, dio pentirona tau iato mai.

¹³Ma’kadami tu PUANG, Nakua: Susimoto tu to Israel la ungkande roti maruttakna dio lu mintu’ bangsa, tu padangna Kunii la ussualei tu tau iato mai.

¹⁴Apa mebalina’ kukua: O Puangta PUANG. Tonganna inang tae’ lenpa kuruttakki kaleku; tae’ bangpa angku kande olo’-olo’ nasepak olo’-olo’ masuru tempon dio mai bitti’ku sae lako totemo, sia tae’ lenpa natamai duku’ bosi tu sadangku.

¹⁵Ma’kadami lako kaleku Nakua: Manassa la Kuelorangko umpakei tu tai sapi la mupasondana tai tau; iamoto tu la mupanggaragai rotimmu.

¹⁶Sia Nakua siapa lako kaleku: E ma’rupa tau, Kuparoto’ tu roti dipopamuntu dio Yerusalem — anna ditimbang tu roti la nakande situang karossoan penaanna; sia disuka’ tu mai la nairu’ disuka’ situang kamagianganna —

¹⁷anna kapu’duran tarru’ roti sia uai tu tau iato mai sia pada pussak, anna bonnong napobua’ kakadakeanna.