Read Toraja-Sa'dan YEHEZKIEL 41 Bible Online

YEHEZKIEL 41 - Toraja-Sa'dan bible

YEHEZKIEL 41

¹Mangkato nabaamo’ tama bilik kapua, anna suka’i tu rinding tembo’ annan siku tu babana indena mai, na annan suku tu babana diona lu, iamoto tu baba tenda.

²Iatu babana lalan tama sangpulo siku, na iatu sa’dena patomali silimang sikuan. Nasuka’ duka tu lambe’na bilik kapua: patangpulo siku, sia babana: duangpulo siku.

³Malemi tama bilik lanna lu, nasuka’i tu rinding tembo’ lalan tama: duang siku kambanna, sia iatu lalan tama: annan siku babana na iatu baba dio sa’de lalan tama: pitung siku.

⁴Mangkato nasuka’mi tu lambe’na bilik lanna lu: duangpulo siku na babana duangpulo siku, siunduk sa’de bilik kapua; anna ma’kada lako kaleku nakua: Iamote tu inan tarru’ maindan.

⁵Nasuka’mi tu rinding tembo’ Banua iato: annan siku kambanna na iatu baba bilik dipasikande Banua patangsiku, untikui Banua male.

⁶Iatu bilik dipasikande banua tallung kalada’ langngan sitodo’, tallungpulo bilik. Ke sangtibangoi; iatu rinding tembo’ Banua tiku lao dipakurang, nanii balok bilik dipasikande banua kumua naden inan dinii umpale’ke’i tu balok, belanna tae’ nadilo’poran tama tu rinding tembo’ Banua.

⁷Iatu bilik dipasikande Banua untikui banua male salangngan-langnganna sakalua’-lua’na; iatu bilik dipasikande Banua sitodo’-todo’ langngan untikui banua male; susimoto tu Banua iato salangngan-langnganna sakalua’-lua’na; ma’din tu tau kendek diong mai kalada’ diongna lu unnola kalada’ tangnga sae langngan kalada’ daona lu.

⁸Kutiro den kalada’ dio Banua tiku lao, tu napoparandangan bilik dipasikande Banua; iatu langka’na ganna’ misa’ tekken pesuka’: annan siku sae lako pa’pasitammuan.

⁹Iatu kambanna rinding tembo’, salian bilik dipasikande Banua limang siku, susi dukato tu baba kalada’ torronapa. Dio alla’na bilik dipasikande Banua.

¹⁰Sia bilik to mentoe duangpulo siku tu babana, tiku lao Banua.

¹¹Iatu lalan tama bilik dipasikande Banua tassu’ lako kalada’ torronapa; iatu misa’ lalan ma’palurekke na misa’ lalan ma’palusau’; iatu baba kalada’ torronapa tiku lao limang siku.

¹²Iatu mai Banua dipabendan siupu’ tana lapang dio rampe matampu’ pitungpulo siku babana na iatu rinding tembo’na tiku lao limang siku kambanna; na iatu lambe’na kasera pulona siku.

¹³Nasuka’mi tu Banua, iatu lambe’na saratu’ siku; ia duka tu tana lapang sola Banua sola rinding tembo’na saratu’ siku lambe’na.

¹⁴Na iatu tingayo Banua sia tana lapang dio rampe matallo saratu’ duka siku babana.

¹⁵Nasuka’ duka lambe’na tu Banua siupu’ tana lapang, dio boko’na, sia mintu’ sarambi daoanna patomali: saratu’ siku. Anna suka’i tu Banua Kabusungan lanna lu sia sarambi tarampak;

¹⁶iatu ampang sia pentiroan, tu ditaralii, sia sarambi daoan untikui tallui tu inan iato — sitingoan tu ampang tiku lao dilapik kayu — , iatu sali sae lako pentiroan, ditutu’i,

¹⁷sia iatu inan daona lu lalan tama sae lako bilik lanna lu, sia dio salian dio mintu’ rinding tembo’ tiku lao, tu lanna lu sia iatu salianna.

¹⁸Den karubion sia koroma dipalakoanni, dipasialla’, misa’ koroma na da’dua karubion; iake misa’oi karubion da’dua tu lindona:

¹⁹iatu ma’rupa lindo tolino mentingo lako koroma indena mai na iatu ma’rupa lindo singa mentingo lako koroma diona lu. Iatu panggaraga iato dipadio nasang Banua iato tiku lao.

²⁰Randuk diong mai sali sae lako daona lu lalan tama dipalakoi mintu’ karubion sola koroma, iamotu dio rinding tembo’ Banua Kabusungan.

²¹Iatu Banua Kabusungan ma’kalada’ a’pa’ tu mai ampangna. Iatu tingayo inan maindan susi duka rupanna to.

²²Iatu inan pemalaran kayu digaraga, tallung siku langka’na na duang siku lambe’na; iatu tetukna sia lette’na sia rindingna kayu nasang. Ma’kadami lako kaleku nakua: Iamote tu meda tu bendan dio oloNa PUANG.

²³Iatu Banua Kabusungan na inan maindan den ba’bana da’dua.

²⁴Iatu ba’ba iato den tu tutu’na da’dua tu ma’din tigirik, da’dua tutu’na tu misa’ ba’ba na da’dua tu misa’nao.

²⁵Dio duka, iamotu dio ba’ba Banua Kabusungan, dipalakoi karubion sia koroma, susi dukato tu rinding tembo’ dipalakoi. Den papa sape kayu dio salian dio tingayo sarambi.

²⁶Sia den pentiroan ditaralii sia koroma dio sa’de sarambi patomali, dio bilik dipasikande Banua sia dio papa sape.