Read Toraja-Sa'dan YEHEZKIEL 44 Bible Online

YEHEZKIEL 44 - Toraja-Sa'dan bible

YEHEZKIEL 44

¹Mangkato nabaamo’ sule lako babangan dio salianna inan maindan, tu ma’palulako rampe matallo; iate babangan iate ditutu’.

²Ma’kadami PUANG lako kaleku, Nakua: Iate babangan iate la tontong bang ditutu’; tae’ nala ma’din dibungka’ sia moi misa’ tau tae’ nama’din unnolai tama, belanna iatu PUANG, Kapenombanna Israel, mangkamo unnolai tama; iamoto manassa la tontong titutu’.

³Iatu diona arung, belanna arung ma’din tongkon lan la kumande dio oloNa PUANG: sarambi babangan la naolai tama sia lalan ia bangsiato tu la naolai sun.

⁴Nabaamo’ lako babangan rampe daanna lu, lako tingayo banua: kutiromi tonganna iatu kamala’biranNa PUANG umponnoi banuanNa PUANG; tukkumo’ rokko padang menomba.

⁵Ma’kadami tu PUANG lako kaleku, Nakua: E ma’rupa tau, parinaai, pata’pai matammu sia tananni talingammu tu mintu’ apa Kupokada lako kalemu diona tu mintu’ apa dipondok sia sukaran alukna banuanNa PUANG; tiro meloi tu atoran ke la tamakomi banua unnolai mintu’ lalan tama sun inan maindan.

⁶Ammu ma’kada lako to pabali-bali, iamotu to Israel, kumua: Inde sia tu kadanNa Puangta PUANG, Nakua: Mandu maro’mo tu apa megallian mipogau’ e to Israel.

⁷Belanna mibaa tama tu to sae, iamotu to tang disunna’i tu penaanna sia tang disunna’i tu kalena, la dioren lan inan maindanKu, la urruttakki banuangKu, tommi pennoloanni tu kande taaKu, iamotu lompo sia rara, naurunganni umpokai tu basseKu; tu mipogau’ ondong na iatu apa megalliammi.

⁸Sia tae’mo na kamu kalena ungkaduttu’i tu apa maindanKu, sangadinna miangka’mo tu to senga’ ussondakomi la untoei tu kamenomban lako Kaleku lan inan maindanKu.

⁹Inde sia tu kadanNa Puangta PUANG, Nakua: Tae’i misa’ to sae, tu tang disunna’i penaanna sia tang disunna’i kalena, la tama inan maindanKu, iamotu mai to sae, tu torro dio lu to Israel.

¹⁰Apa iatu to Lewi, tu untoyangan tarru’mo kalena dio mai Kaleku, tonna pusa tu to Israel-inang memboko’mo tu tau iato mai dio mai Kaleku unturu’ rapang-rapang dipodeatanna — , iatu to Lewi iato mai la untanggung kakadakeanna.

¹¹Tau iato mai la mentoe lan inan maindanKu ungkampai babangan banua sia umposara’ banua; sia la untunuan pemala’ ditunu pu’pu’ sia pemala’ pangrere’ tu to buda sia tumaya dio tingayona tau iato mai la untoeanni tu pengkaranganna.

¹²Belanna natoeammo to Lewi tu pengkaranganna tau iato mai dio tingayona rapang-rapang dipodeatanna, sia napobatu titodoammo to Israel umpogau’ kakadakean, iamoto Kuangka’ limangKu umpalao sumpa unnea tau iato mai, kadanNa Puangta PUANG, kumua natanggungi tu kakadakeanna.

¹³Tae’ anna la urreke’Na’ tau iato mai la untoeanNa’ pentoean to minaa sia la merreke’ lako mintu’ pareanan maindanKu, ondongpi lako pareanan tarru’ maindan, sangadinna la untanggung siri’na sia apa megallian tu mangka napogau’.

¹⁴Iamoto la Kuangka’ tu tau iato mai la ungkaritutui tu banua, sia mintu’ kamenomban lan sia mintu’ tu apa dikarang lan.

¹⁵Apa iatu mintu’ to minaa to Lewi, bati’na Zadok, tu ungkaritutui kamenomban lan inan maindanKu, tonna memboko’ tu to Israel dio mai Kaleku, tau iato mai la urreke’Na’ la umpenombaiNa’ sia bendan dio oloKu lan umpennoloanni lako Kaleku tu lompo sia rara, kadanNa Puangta PUANG.

¹⁶Tau iamoto mai tu la tama inan maindanKu, sia iamotu la urreke’ medamu la umpenombaiNa’ sia la umpengkaolaiNa’.

¹⁷Ianna mentama babangan tarampak lanna lu la ma’pake pakean lenang tae’ nama’din ma’pakean bulu domba, ke untoei pentoeanna lan babangan tarampak lanna lu, ba’tu lan Banua.

¹⁸La ma’passapu lenang dao ulunna sia la masseppa lenang lan aakna, sia tae’ nala umpotambeke’ apa mepama’pu’.

¹⁹Ianna tassu’ tu tau iato lako to’ to buda dio tarampak dio salian, la naalai tu pakeanna tu mangka napake lan pentoeanna, anna patorroi lan bilik inan maindan, anna pake pakean senga’, kumua da napamarimbanganni tau iato mai tu to buda tete dio pakeanna.

²⁰Sia tae’ nala ma’galettung ba’tu ma’rundun, sangadinna la nasakkuru’ tu beluakna.

²¹Tae’ nama’din tu mintu’ to minaa la unniru’ uai anggoro’, ke la tamai tarampak lanna lu.

²²Tae’ nama’din umpobaine baine balu, ba’tu baine pura ditantang, sangadinna anak darapi, bati’ to Israel, ba’tu pura to balunnapi to minaa, ma’din napobaine.

²³Anna pamanassanni taungKu umpasisengaranni tu maindanna anna tang maindanna, sia tang maruttakna anna maruttakna.

²⁴Sia la bendan duka ma’paolai salu, ke denni kara-kara sia la nara’ta’ tu kara-kara iato unturu’ atorangKu; iatu Sukaran alukKu sia iatu apa Kupondok la nakaritutui lan mintu’ tu pa’gaurangKu sia la napamadatu tu allo katorroangKu.

²⁵Moi misa’i tu tau iato mai tae’ nama’din urreke’ to mate, da anna urruttakki kalena, sangadinna ia mannari nanii ma’din umpamaruttak kalena, ke ambe’na ba’tu indo’na, anakna muane ba’tu anakna baine, sangmanena ba’tu anak daranna, tu tae’pa namendapo’.

²⁶Iake mangkami umpamasero kalena, la dianggean pitung allo.

²⁷Na iake attu tamami sule tama inan maindan, lan tarampak lanna lu, la mentoe lan inan maindanKu, la napennoloan tu suru’ pengkalossoranna, kadanNa Puangta PUANG.

²⁸Iamote tu la napotaa mana’ tau iato mai: Akumo tu taa mana’na, sia da mibenni tu apanna tau iato mai lan lu Israel: Akumo tu apanna.

²⁹Ma’din nakande tu kande dipemalaran sia suru’ pengkalossoran sia suru’ pangakuan sala sia mintu’ tu apa dipa’pemalian lako to Israel, iamo la napotaa.

³⁰Iatu mintu’ rupanna bunga’ bura padangmi tu tarru’ melona sia mintu’ pa’duruk dio mai mintu’ rupanna pa’duruk, la napotaa to minaa; sia iatu ta’pung dalle sisikan tu tarru’ melona la miben to minaa, anna dipamareso’ tu kamasakke-sakkean lan banuammi.

³¹Tae’ nama’din tu to minaa la ungkandei tu apa mate, ba’tu iatu tisepak-sepakna, la manuk-manuk la patuoan.