Read Toraja-Sa'dan YEHEZKIEL 47 Bible Online

YEHEZKIEL 47 - Toraja-Sa'dan bible

YEHEZKIEL 47

¹Attu iato nabaamo’ sule lako to’ lalan tama Banua; kutiromi naden ia uai lolong lan mai diongna lu ampang Banua ma’palulako rampe matallo, belanna iatu tingo Banua ma’palulako rampe matallo, iatu uai lolong lan mai diongna lu sa’de kanan banua, rampe lo’na lu inan pemalaran.

²Nabaamo’ unnola babangan rampe daanna lu, anna solanna’ sun lako salian ullilingi tiku lao lako babangan dio salian, iamotu babangan ma’palulako rampe matallo; kutiromi naden ia uai ma’kalimbuang-buang sun lan mai to’ sa’de kanan.

³Iatonna sunmo tu tau ma’palulako rampe matallo untangke misa’ ulang pesuka’, nasuka’i sangsa’bu siku sia napalumingkana’ diong to’ uai; iatu uai angge buku tara tu mandalanna.

⁴Nasuka’omi sangsa’bu siku sia napalumingkana’ diong tu’ uai; iatu uai angge guntu’ tu mandalanna. Nasuka’omi sangsa’bu siku sia napalumingkana’ diong; iatu uai angge aak tu mandalanna.

⁵Nasuka’ poleomi pissan, sangsa’bu siku; totemo dadimo misa’ salu, tu tang kuolamo kulamban, belanna iatu uainna mandalan tonganmo, naurunganni ma’dinmo tau unnorong lan, iamotu misa’ salu tae’mo nakullei nalambanni tau.

⁶Ma’kadami lako kaleku nakua: Mutiromoraka te iannate, e ma’rupa tau? Nabaamo’ sule unnola randan salu iato.

⁷Iatongku sule kutiromi tu kayu buda tongan tuo dio randan salu patomali.

⁸Ma’kadami lako kaleku nakua: Iate uai iate lolong lako padang rampe matallo, anna lolong rokko Araba-Yordan, anna tama tasik, tibarrakmi tama tasik, naurunganni melo tu uainna.

⁹Umba-umba tu nanii salu lolong tama, inde dukato tu nanii tuo tu mintu’ olo’-olo’ kepenaa sibi’tokan lan, sia tarru’ buda tu bale, belanna iake lolongi lako te uai iate, la melo tu uai tasik. Umba-umba tu nanii rampo salu iato, la tuo nasang tu olo’-olo’.

¹⁰Na iatu to mebale la bendan dio randanna, randuk dio mai En-Gedi sae lako En-Eglaim, iamoto tu inan la nanii umballa’ dalla’na, anna ma’rupa-rupa tu bale lan, susitu mai bale lan tasik kapua, lendu’ budanna.

¹¹Apa iatu bukanna sia limbongna tae’ anna melo len tu uainna, sangadinna dipopaélo’na mapi’da.

¹²Siupu’ salu iato dio randanna patomali la tuo tu ma’rupa-rupa kayu membua, tu tang la malayu len tu daunna sia tang la muru’ tu buanna; bulanoi membuaoi, belanna iatu uainna tassu’ lan mai inan maindan; iatu buanna la dipokande na iatu daunna la dipopedampi.

¹³Inde sia tu kadanNa Puangta PUANG, Nakua: Iamote tu katonanna tondok tu lan lili’na minii untaa-taa mana’ lako sangpulo dua suku to Israel; na iatu Yusuf duang taan napotaa.

¹⁴Pada la mipotaa mana’ sola nasang, belanna mangkaMo’ umpalao sumpa, la Kukamasean nene’ to dolomi; na iate padang la miappa’ butung taa mana’.

¹⁵Inde sia tu katonanna tondok iato. Rampe daanna lu randuk dio mai tasik kapua ullendu’i Hetlon sae lako lalan tama Zedad.

¹⁶Hamat, Berota, Sibraim, tu naparitangnga lili’ Damsyik sola Hamat, na Hazar-Enon, lan tangnga, tu sidampi’ katonanna Hauran,

¹⁷naurunganni iatu katonan randuk dio mai tasik sae lako Hazar-Enon, lili’na Damsyik, sia rampe daanna lu ma’palurekke Hamat katonanna. Iamote tu rampe daanna lu.

¹⁸Na iatu rampe matallona: randuk dio mai kasiallaranna Hauran na Damsyik sia kasiallaranna Gilead na tondok Israel siupu’ Yordan, la mipamanassa tu katonanna sae lako tasik rampe matallo. Iamote tu rampe matallo.

¹⁹Na iatu rampe lo’na lu: randuk dio mai Tamar ma’palusau’ Uai kasite’geran dio Kadesh, sae lako salu’-salu’, tarru’ lako tasik kapua. Iamote tu rampe lo’na lu, ma’palusau’ Padang rampe lo’na lu.

²⁰Na iatu rampe matampu’na: tasik kapua randuk dio mai katonan iato sae lako sitingoan lalan lako Hamat. Iamote tu rampe matampu’.

²¹Iatu padang iato la mitaa lako padammi mintu’ suku Israel.

²²La miloterei mipotaa mana’ sola mintu’ to sae, tu mempue dio kalemi sia iatu ma’dadian taumo dio kalemi; iatu tau iato mai la mipapada to dadi diomo lu to Israel; la unnappa’ taa mana’ diloterei dio lu suku to Israel;

²³na iatu suku nanii mempue to sae, inde to dio la minii umpaketaa mana’i, kadanNa Puangta PUANG.