Read Toraja-Sa'dan YEHEZKIEL 5 Bible Online

YEHEZKIEL 5 - Toraja-Sa'dan bible

YEHEZKIEL 5

¹Na iko, e ma’rupa tau, alako misa’ pa’dang mataran, tu la mupake susi piso peku’ku’na misa’ to ma’ku’ku’; kallu’i tu ulummu sia danggo’mu; ammu ala misa’ timbangan ammu taa-taai tu beluak.

²Sangtaa tallunna la muballa api lan tangnga kota, ke purami tu allo kadipatama-limbuanna, iatu taa tallunna la muala, ammu patorroi mumane unta’tak-ta’takki pa’dang tiku lao; na iatu sangtaa tallunna la muambo’ napettiaranni angin, belanna la Kunonok tu pa’dang dio boko’na tau iato mai.

³Sia la muala sidi’ tu beluak iato, ammu pessimporrosanni lan biring bayu lamba’mu.

⁴Sia la mualapa pira tu beluak iato, ammu pembuanganni tama tangnga api, ammu ballai; na inde to lan mai la nanii mellepa’ tu api lako mintu’ to Israel.

⁵Inde sia tu kadanNa Puangta PUANG: Nakua: Iamote tu Yerusalem. Kupalanmo tangngana mintu’ bangsa sia natikuimo tondokna tau.

⁶Apa tang mekaaluk umbali-bali atorangKu losong na iatu mintu’ bangsa sia umbali-bali apa Kupondok losong na iatu mintu’ tondok tiku lao, belanna natibemo tau iato mai tu atorangKu sia tae’mo nalolang unturu’ mintu’ apa Kupondok.

⁷Iamoto inde sia tu kadanNa Puangta PUANG Nakua: Belanna mandukomi pabali-bali na iatu mintu’ bangsa untikuikomi sia tae’ milolang unturu’ apa Kupondok sia tae’ mikaritutui tu atorangKu, ondong pissanpi tae’ mikaritutui tu atoranna mintu’ bangsa untikuikomi — ,

⁸iamoto inde sia tu kadanNa Puangta PUANG, Nakua: Manassa, Aku la umparampoiko ukungan, manassa Aku! Aku la ma’paolai salu lan lu tangngamu dio pentirona mintu’ bangsa.

⁹Ia Kupogau’ lako kalemu tu apa tae’ lenpa Kupogau’i sia tae’ lenmo Kula umpogau’i undinna tu susinnato, natumang mintu’ penggauran megalliammu.

¹⁰Iamoto lan lu tangngamu iatu ambe’ la ungkande anakna na iatu mai anak la ungkande ambe’na. Aku la umpaolaiko salunna, na mintu’ tu torrona dio mai kalemu la Kuambo’ lako mintu’ matanna angin.

¹¹Iamoto, la lelukraka tuoKu, kadanNa Puangta PUANG, tongan-tonganna, tu belanna mangkamo muruttakki tu inan maindanKu napobua’ mintu’ apa megi’girammu sia mintu’ penggauran megalliammu iamoto la Kusa’bianganmoko, moi misa’ apa tae’ bangmo Kukasayangi sia tae’mo Kula matirinna.

¹²Sangtaa tallummi la mate nabaa ra’ba biang sia la narabunni karorian dio lu tangngami; na sangtaa tallummi la songka nakande pa’dang; na sangtaa tallummi pole’o la Kuambo’ lako mintu’ matanna angin sia la Kunonok tu pa’dang dio boko’na tau iato mai.

¹³Susimoto tu kasengkeangKu la Kutappu’i Kubarrakan sia la Kuparampoi kare’dekan ara’Ku tu tau iato mai, namane sau penaangKu sia ma’papakkanniNa’. Sia la naissan tau iato mai, kumua Akumo, tu PUANG, tu kamanokangKu ditimba oloKu angku ma’kada, ke mangkami Kutappui tu mintu’ kare’dekan ara’Ku Kuparampoan tau iato mai.

¹⁴La Kupadadiko misa’ apa daun lauan sia misa’ apa ditatta dio lu mintu’ bangsa untikuiko, dio pentirona mintu’ tau lendu’.

¹⁵Nasusito la dadiko misa’ apa ditatta sia dibe’se, tu umpandan pa’pakilala sia misa’ apa napotiramban mintu’ bangsa untikuiko, ke Kuparampoimoko ukungan tete dio kasengkean sia kare’dekan ara’ sia peada’ masarrang. Akumo, PUANG, tu mangka ma’kada.

¹⁶Iake Kupalaomi tu tinaran mapannangna karorian unta’pai tu tau iato mai, tu la ma’kasanggang sia tu la Kupalao la urrabunnikomi, na attu iato la Kutompoi polepa karorian, tu la urrampoiko, sia la Kuparoto’ tu roti la mupopamuntu.

¹⁷La Kuparampoiko karorian sia olo’-olo’ masuru, tu la umpasayu’ko anakmu; la narampoiko ra’ba biang sia to’doan rara, sia la Kuparampoiko pa’dang. Akumo, PUANG, tu mangka ma’kada.