Read Toraja-Sa'dan YEHEZKIEL 6 Bible Online

YEHEZKIEL 6 - Toraja-Sa'dan bible

YEHEZKIEL 6

¹Saemi tu kadanNa PUANG lako kaleku Nakua:

²E ma’rupa tau, mentingo lu lakoko buntunna Israel, ammu ma’nubua’ diona kasangganganna, kumua:

³E mintu’ buntu Israel, perangii tu kadanNa Puangta PUANG: inde sia tu kadanNa Puangta PUANG lako mintu’ buntu sia tanete, sia salu’-salu’ marangke sia lombok: Manassa la Kuparampoikomi pa’dang sia mintu’ inan madaomi la Kusanggang.

⁴La dirondon tu mai inan pemalarammi sia ditesse-tesse tu inan pemalaran pantunuan dupami, sia la Kupembuangan dio tingayona rapang-rapang dipodeatammi tu to dipateimmi.

⁵Iatu mai batang rabukna to Israel la Kupemparrakan dio tingayo rapang-rapang dipodeatammi sia iatu bukummi la kusamboran tiku lao inan pemalarammi.

⁶Umba-umba tu munii torro, la disabu’i tu mintu’ kota sia la dipopempadang talo tu inan madao, anna disanggang tu inan pemalarammi sia tang dipoinaamo, iatu pa’deatammi ditesse-tesse sia disabu’i, iatu inan pemalaran pantunuan dupami dile’to-le’to sia iatu panggaraga limammi la diro’pok-ro’pok.

⁷Iatu to mate la torro tibambang lan lu tangngami, ammi tandai, kumua Akumo tu PUANG.

⁸Apa la Kupatorrokomi pira, belanna ba’tu pira-pirakomi, tu nasesa pa’dang, la torro dio lu bangsa iato mai, ke dipatisambo’mokomi lan lu mintu’ tondok.

⁹Attu iato la mikilalaiNa’ tu mintu’ to tilendokmi dio lu mintu’ bangsa, tu dinii umpali’ tau iato mai, ke Kupabonnongmi tu penaa pasandak salunna, tu memboko’mo dio mai Kaleku, sia Kutessemo matanna, tu ma’penunu lako rapang-rapang dipodeatanna la ma’gau’ sala; la ungkagi’gi’ kalena tu tau iato mai napobua’ gau’ kadakena, tu mangka napogau’, tonna parri-parri tu apa megallianna.

¹⁰Sia la naissan tau iato mai, kumua Akumo, tu PUANG, tae’ Kuma’kada punala bang kumua la Kuparampoi kamandasan iato tu tau iato mai.

¹¹Inde sia tu kadanNa Puangta PUANG, Nakua: Sa’pako pala’mu, ammu mentarassa sia metamba kumua: A’a dikka’ tu diona mintu’ kakadakean megallianna to Israel, belanna iatu tau iato mai la tibambang tete dio pa’dang sia karorian sia ra’ba biang.

¹²Minda-minda tu mambelanna la mate napobua’ ra’ba biang, minda-minda tu mandappi’na la tibambang nakande pa’dang; na minda-minda tu torronapa sia tilendoknapa la mate napobua’ karorian; la Kutappui tu mintu’ kare’dekan ara’Ku la Kuparampoan tau iato mai.

¹³Attu iato la mitandai, kumua Akumo tu PUANG, ke tibambangmi tu to matena tau iato mai lan lu tangnga rapang-rapang dipodeatanna tiku lao inan pemalaranna dao lu mintu’ tanete madao, dao lu mintu’ botto buntu, diong lu mintu’ garonto’ kayu maluna sia diong lu mintu’ kayu tarpin makampu, tu nanii tu tau iato mai untunu apa busarungngu’ lako mintu’ rapang-rapang dipodeatanna.

¹⁴La Kuangka’ tu limangKu unnea tau iato mai sia iatu padang iato la Kupopempadang lo’bang sia la Kusanggang randuk dio mai Padang pangallaran sae lako Ribla, umba-umba tu nanii tau iato mai torro, anna tandai tau iato mai kumua Akumo tu PUANG.