Read Toraja-Sa'dan YEHEZKIEL 7 Bible Online

YEHEZKIEL 7 - Toraja-Sa'dan bible

YEHEZKIEL 7

¹Rampomi tu kadanNa PUANG lako kaleku Nakua:

²E iko ma’rupa tau, inde sia tu kadanNa Puangta PUANG diona tu tondok Israel, kumua: Saemo tu katampakanna! katampakanna diona tu a’pa’ tetukna tondok iato!

³Totemo narampoimoko tu katampakanna, belanna la Kuparampoiko kasengkeangKu sia la Kuukungko sitinaya gau’mu sia la Kupapakkanni lako kalemu tu mintu’ penggauran megalliammu.

⁴Tae’ Kula ungkasayangiko sia tae’ Kula ungkatirinnaiko, sangadinna la Kupapakkanni lako kalemu tu gau’mu sia la sule lako kalemu tu penggauran megalliammu, ammu tandai, kumua Akumo tu PUANG.

⁵Inde sia tu kadanNa Puangta PUANG Nakua: Situru’-turu’ tu kamandasan! Tonganna saemo!

⁶Rampomo tu katampakanna; iatu katampakanna rampomo! Malimbangummo la urrampoiko. Tiromi, rampomo!

⁷Narampoimoko toto’ kamandasammu, e to lan tondok! Nalambi’mo attunna. Mareke’mo tu allona! Denmo tu kamarukkan dao buntu natae’mo kasila’tekan!

⁸Totemo la madomi’ Kubarrakan tu kare’dekan ara’Ku lako kalemu sia la Kutappui tu mintu’ kasengkeangKu la Kuparampoangko, sia la Kuukungko sitinaya gau’mu sia la Kupapakkanni lako kalemu tu mintu’ panggauran megalliammu.

⁹Iatu apa-apa tae’ Kula ungkasayangi sia tae’ Kula ungkatirinnai, sangadinna la Kupapakkanni lako kalemu tu gau’mu, sia la sule lako kalemu tu penggauran megallianmu, ammu tandai, kumua Akumo tu PUANG, tu ma’kasanggang.

¹⁰Tiromi tu allo! Tiromi rampomo tu kamandasan; tiparandukmo tu lampakmu; mentarukmo tu tekken; menta’bimo tu kamatampoan.

¹¹Iatu kapatorosan ma’kalolokannamo, naurunganni dadi misa’ tekken katangmekaalukan. Moi misa’ apa tae’ la torro dio mai tau iato mai, la kamarukkanna la kamarekoanna; iatu mintu’ kamaballoanna la pa’de.

¹²Nalambi’mo attunna! Mareke’mo tu allona! Da nasende tu to mangalli sia da namasussa tu to ma’baluk, belanna dukku tu kasengkean na urrampoi mintu’ to buda tu marukka.

¹³Belanna iatu to ma’baluk tae’mo nala sule lako to’ balukanna, moi anna tuopa sola duai, belanna iatu pa’nubua’ umpatu mintu’ to buda tu marukka tae’mo nala diriu’ sule, sia moi misa’ tau tu ungkabarii kakadakean, tae’ nala sipuli padang.

¹⁴Pannoni bangi tu tarompe’ sia pasakka’ nasangi, apa moi misa’ tau tae’ male parari; belanna dukku kasengkeangKu lako mintu’ to buda tu marukka.

¹⁵Dio salian den pa’dang, anna lanna lu den ra’ba biang sia karorian. Minda-minda tu dio lu padang, na minda-minda lan kota la napisanni ra’ba biang sia karorian.

¹⁶Moi anna denpa ba’tu pira-pira tilendok tu tau iato mai, manassa la susi bu’ku’ dao lu buntu, tu sae diong mai lombok; iatu tau iato mai sola nasangi pantan sumarro belanna kakadakeanna.

¹⁷Mintu’ lima la langga’ sia mintu’ guntu’ bonak.

¹⁸La ma’pakean karoro’ tu tau iato mai, sia umpolullung katirambanan, sia mintu’ lindo la natoding siri’, sia dao lu mintu’ ulu la den kapesean.

¹⁹Iatu mai salakana la natibe lako lalan sia iatu mai bulaanna la susi misa’ apa megi’giran; iatu mai salakana sia bulaanna tae’ nabela urrampananni, ke allo kasengkeanNa PUANG; tae’ nakullei undampianni topona sia umpediaranni, belanna iamoto tu katitodoanna, tu untua’i tama kakadakean.

²⁰Iatu kamala’biran maballo napake unggaragai apa napomatampo penaanna; apa iamoto tu nagaragai rapang-rapang dipodeata megallianna, iamotu apa megigiranna; iamotu apa iato la Kupopendadi apa megi’giran lako tau iato mai,

²¹sia la Kusorong lako to sae anna alai sia lako to tang mekaaluk anna rampai, kumua anna pamatunai.

²²Sia tae’ angKu ussailei tu tau iato mai sia la napamatuna tau tu parimata maballoKu: iatu to masa’ga la naparuku bang tama anna pamatunai.

²³Parandanni tu misa’ rante, belanna iatu tondok ponnomo indan to’doan rara sia iatu kota ponnomo kamasa’garan.

²⁴La Kupasae tu bangsa tarru’ masa’ga’, anna tau iato mai la unnalai tu mai banuanna; la Kuputtai tu apa napomatampo to paa, sia iatu inan maindanna la dipamatuna.

²⁵Saemo tu kamatakuran; la undaka’ kamakarimmanan tu tau iato mai, apa tae’.

²⁶Sitodon tampomo tu kamasolangan la sae sia sidanu’-danu’mo sae tu kareba. Attu iato undaka’-daka’ patiro mendeatanna nabi, sia pa’patudu putta dio to minaa sia pa’timbangan dio pekaamberan.

²⁷Iatu datu la ma’pote dibolong sia iatu arung la umpolullung kamagiangan na mintu’ limanna to buda lan tondok iato la kupi’ napobua’ katirambanan. La Kupapakkanni tu tau iato mai sitinaya gau’na, sia Kupaolai salu sitinaya kedona. Anna tandai tau iato mai, kumua Akumo tu PUANG.