Read Toraja-Sa'dan YEHEZKIEL 8 Bible Online

YEHEZKIEL 8 - Toraja-Sa'dan bible

YEHEZKIEL 8

¹Iatonna taun ma’pennannan, bulan ma’pennannan, allo ma’pellimanna bulan iato, tongku unno’ko’ dio banuangku na mintu’ pekaamberan Yehuda unno’ko’ dio tingayoku, narampoimo’ inde to dio tu limanNa Puangta PUANG.

²Mentiromo’, anna ta’pai matangku tu misa’ rupa susi api; randuk dio mai ma’rupa aakna tu ma’palurokkona den api; randuk dio mai aakna tu ma’palulangnganna ditiro susi arrang masero, pandillak susi batu bulaan sirau salaka.

³Napendondongammi tu misa’ apa tu susi lima rupanna, anNa dammakki sangdi’pu’ tu beluakku. Attu iato Naangka’na’ Penaa langngan lan kasiallaranna lino na langi’, anNa baana’ lako Yerusalem lan patiro mendeata, tu Napaombo’ Puang Matua, lako lalan tama babangan rampe lanna lu, tu mentingo rekke, tu nanii te’dek rapang-rapang dipodeata, iamotu pareanan kamangimburuan, tu umpabu’tu kamangimburuan.

⁴Manassa inde to dio tu kamala’biranNa Kapenombanna to Israel, susitu apa dipaombo’ tu mangka kutiro diong lombok.

⁵Ma’kadami lako kaleku Nakua: E ma’rupa tau, mentiro lu rekkeko! Mentiro lu rekkemo’, angku tiroi daanna lu babangan sikandappi’ inan pemalaran dio lalan tama babangan nanii bendan tu rapang-rapang dipodeate iamotu pareanan kamangimburuan.

⁶Ma’kadami lako kaleku Nakua: E ma’rupa tau, mutiroraka tu apa napogau’ tau iato mai, iamotu mintu’ apa tarru’ megallian, tu napogau’ to Israel inde te, Kuurunganni umparukui torro mambela dio mai inan maindanKu? Apa la mutiropa tu ba’tu pira-pira apa tarru’ megallian.

⁷Nabaamo’ lako lalan tama tarampak, angku tiroi den misa’ kalo’tok dio rinding tembo’.

⁸Ma’kadami lako kaleku Nakua: E ma’rupa tau, rubakki tu rinding tembo’. Attu iato kurubakki tu rinding tembo’, angku tiroi inde to dio tu misa’ ba’ba.

⁹Ma’kadami lako kaleku Nakua: Maleko tama mutiroi tu mintu’ penggauran kadake tu megallian, tu napogau’ tau iato mai indete.

¹⁰Tamamo’ angku tiroi, tonganna den lan tu ma’rupa-rupa pattana apa megallian, iamotu olo’-olo’ a’pa’ lette’na, sia mintu’ rapang-rapang dipodeatanna to Israel, butung passura’ dio rinding tembo’ tiku lao.

¹¹Sia pitungpuloi tu pekaamberanna to Israel sisola Yaazanya, anakna Safan, dio tangngana tau iato mai, bendan dio tingayo patta iato; pada untangke pantunuan dupa, na iatu rambu busarungngu’na dupa kendek langngan.

¹²Ma’kadami lako kaleku Nakua: E ma’rupa tau, mutiromoraka tu apa napogau’ mintu’ pekaamberan to Israel lan kalillinanna pantan lan lu bilikna, nanii patta? Belanna nakua lan penaanna: Tae’ Natiroki’ PUANG. Natampemo PUANG tu tondok iate.

¹³Sia ma’kada lako kaleku Nakua: La mutiro pole’pa tu mai penggauran tarru’ megallian, tu napogau’ tau iato mai.

¹⁴Nabaamo’ lako lalan tama babangan banuanNa PUANG rampe rekkena; kutiro inde to dio tu mai baine unno’ko’ untangi’i Tamus.

¹⁵Ma’kadami lako kaleku Nakua: Mutiromoraka to, e ma’rupa tau? La mutiropa tu penggauran mandu megallian na iato.

¹⁶Nabaamo’ tama tarampak lanna lu banuanNa PUANG. Kutiromi dio lalan tama Banua kabusunganNa PUANG, kasiallaranna sarambi na inan pemalaran, den tau agi-agi duangpulo llima umboko’i Banua kabusunganNa PUANG, namentingo lu lako matallo, sia tukku menomba lako allo, ma’palulako matallo.

¹⁷Ma’kadami lako kaleku Nakua: Mutiromoraka to, e ma’rupa tau? Tae’paraka nasilasa tu penggauran megallian napogau’ to Yehuda, tu napogau’ indete, naurungan dukai tu tau iato mai umponnoi kamasa’garan tu tondok iato sia nenne’ umpa’dikki penaangKu? Tiromi, iatu tau iato mai untoe tangke anggoro’ sikandappi’ illongna.

¹⁸Iamoto la Kuparampoi peada’ situang kare’dekan ara’Ku. Tae’ Kula ungkasayangi sia tae’ Kula ungkatirinnai. Moi anna melallak-lallak lako to’ talingangKu, inang tae’ Kula umperangii.