Read Toraja-Sa'dan YEHEZKIEL 9 Bible Online

YEHEZKIEL 9 - Toraja-Sa'dan bible

YEHEZKIEL 9

¹Metambami tu Puang umpekapuai gamaranNa dio to’ talingangku, Nakua: Mengkareke’komi, e kamu tu la umparampoi ukungan tu kota iato, pada sitangkekomi pa’buno pasanggangammi!

²Tiromi, saemo tu annan muane lu dio mai babangan daona lu, tu ma’palurekkena, pada sitangke pa’buno pasaburanna, naden dio lu tu misa’ muane ma’bayu lamba’ lenang, usselle’ suke passurasan dio aakna; mengkareke’mi tu tau iato mai, anna male bendan lako sa’de inan pemalaran tambaga.

³Kendekmi tu kamala’biranNa kapenombanna Israel dao mai to’ karubion, tu nanii reso’ dao, anna male lako to’ ampang Banua Kabusungan, anNa tambai tu to ma’bayu lamba’ lenang, tu usselle’ suke passurasan dio aakna.

⁴Ma’kadami tu PUANG lako kaleku Nakua: Ke’de’ko unnola tangngai tu kota iamotu unnola tangnga Yerusalem, ammu palakoi tanda tu kidena tu mintu’ to sumarro sia mekaindo’ diona tu mintu’ penggauran megallian tu dipogau’ inde to dio.

⁵Na lako tu to senga’ Nakua ungkuanni dio pa’perangingku: Ke’de’mokomi unturu’i lan lu kota, ammi papatean. Da mikasayangi sia da mikatirinnai.

⁶Iatu mai to matua, pia muane, anak dara, pia’-pia’ sia baine manassa la mipatei sia misanggang; apa moi misa’ tu tau den tandana da mirumbui: manassa la miparanduk dio to’ inan maindanKu. Naparandukmi tau iato mai dio lu muane, iamotu mai pekaamberan, tu dio tingayo Banua Kabusungan.

⁷Ma’kadami lako tau iato mai Nakua: Ruttakki tu Banua Kabusungan sia ponnoi batang rabukna tu mai tarampak. Malemokomi, ammi papatean lan lu kota.

⁸Iatonna marassan tu tau iato mai papatean — aku mannamo torro — , tukkumo’ sia melallak, kukua: A’a, Puangta PUANG la Misabu’iraka tu mintu’ to Israel torronapa tete dio kare’dekanna ara’Mi, tu Mibarrakan lako Yerusalem?

⁹Ma’kadami lako kaleku Nakua: Iatu kakadakeanna to Israel sia to Yehuda tarru’ makambanmo, naurunganni iatu tondok iato naponnoi indan to’doan rara sia iatu kota naponnoi penggauran umbulang leko’ salunna belanna nakua tau iato mai lan penaanna: Natampemo PUANG tu tondok iate sia tae’mo Nasailei PUANG.

¹⁰Iamoto tae’mo Kula ungkasayangi sia tae’mo Kula ungkatirinnai; la Kupasule langngan ulunna tu gau’na.

¹¹Tonganna, iatu muane ma’pakean bayu lamba’ lenang sia usselle’ suke passurasan dio aakna sulemo umbaa kareba, nakua: Mangkamo kupogau’ susitu Mipa’parentan lako kaleku.