Read Toraja-Sa'dan DANIEL 10 Bible Online

DANIEL 10 - Toraja-Sa'dan bible

DANIEL 10

¹Iatonna taun ma’pentallunna parentana Koresh, datu Persia, dipaombo’mi misa’ kada lako Daniel, tu diganti Beltsazar, iatu kada iato iamo kamanapparan sia ussa’bu’ kamaparrisan kapua. Napalan penaami tu kada iato sia napariba’teng tu patiro mendeata.

²Attu iato ma’pote dibolongna’, te aku Daniel, malebu bang tallung minggu.

³Tae’ angku kande len kande mammi’ sia tae’ natamai duku’ sia uai anggoro’ tu sadangku, sia tae’ kuma’minna’ busarungngu’ sae lako malebu tallung minggu.

⁴Iatonna allo ma’penduangpulo nna’pa bulan bunga’na, tongku dio randan salu kapua, iamotu Tigris,

⁵kubangunammi tu matangku, angku tiroi den tu misa’ tau ma’pakean lenang ma’beke’ bulaan dio mai Ufaz.

⁶Iatu batang kalena susi parimata pirusa’; iatu lindona pandila-dila susi kila’, iatu matanna susi sulo marorrongan, sia iatu takia’na sia lentekna parrang susi tambaga dipopandilak, na iatu gamaranna susito ongngo’ tau buda.

⁷Aku manna, te Daniel, untiroi tu patiro mendeata iato, apa iatu to kusolan, tae’ anna tiroi; narampoimi misa’ katirambanan kapua tu tau iato mai, naurunganni mallai umpembunian kalena.

⁸Aku manna tu torro misa-misa. Iatongku tiroi tu patiro mendeata kalle-kallean iato, soyang sumanga’mo’, tae’mo rara dio lindoku sia ma’ipumo’.

⁹Attu iato kurangimi tu kadanna; na iatongku rangi tu kadanna limpumo’ sia lumbang, angku songka rokko padang.

¹⁰Denmi tu lima ungkaka’na’ sia umpopengguntu’na’ sia umpopa’dangkanna’ millik, angku ma’parondo-rondo.

¹¹Ma’kadami lako kaleku nakua: E Daniel, to tarru’ dipakaboro’, palan penaai te kada la kupokadangko sia bendanko, belanna totemo disuana’ sae lako kalemu. Iatonna pokadai te iannate lako kaleku, bendanmo’ ma’parondo.

¹²Ma’kadami lako kaleku nakua: Da mumataku’, e Daniel, belanna randuk dio mai allo bunga’na muparinaai la morai unnissanni sia umpamadiongan penaammu dio oloNa Kapenombammu, dirangimo tu kadammu sia saemo’ bannang dio kadammu.

¹³Apa naeana’ tu arungna kadatuan Persia duangpulo mmisa allona; apa tonganna iatu Mikhael, misa’i arung tarompo’ sae lako kaleku, untunduina’, kuurunganni pasau’ dio lu mintu’ datu to Persia.

¹⁴Na totemo saemo’ umpaissanniko tu diona apa la urrampoi bangsamu, ke allo ma’katampakannai; belanna den dukapa tu patiro mendeata diona tu allo la sae.

¹⁵Iatonna ma’kada lako kaleku susito, tukkumo’ rokko padang littu bang.

¹⁶Apa kutiro denmo misa’ apa susi rupa tolino ungkaka’ pudukku; kubungka’mi tu pudukku sia kuparanduk ma’kada angku kuai lako tu to bendan dio tingayoku, kukua: O Puang, ta’pa napamasakina’ te patiro mendeata iate, sia tae’mo kamabukuan torro lan kaleku.

¹⁷Umba la kukua te taunna puangku, ussipa’kadangkomi, o puangku? Inang tae’mo kamabukuangku sia tae’mo penaa kururu.

¹⁸Nakaka’mo’ tu to susi tolino rupanna, sia napamatoto’na’ sia ma’kada nakua:

¹⁹Da mumataku’, e to tarru’ dipakaboro’, torro marampa’ko, mengkabatta’ko, ondongpi mengkabatta’ko. Iatonna marassan ussipa’kadanna’, matoto’mo’, angku ma’kada kukua: O puangku, ma’kadamokomi, belanna mangkamo’ mipamatoto’.

²⁰Ma’kadami nakua: Mutandairaka, ma’apari kusaera lako kalemu? Ta’pa’ la sulena’ sirari arungna to Persia, na iake tassu’mo’ inde to dio mai, manassa la saemo tu arungna tondok Yunani;

²¹apa moi susito, la kupokadangko tu apa disura’ lan Sura’ Kamanapparan. Tae’ misa’ tau batta’ untunduina’ unneai tu tau iato mai, sangadinna Mikhael, arungmi.