Read Toraja-Sa'dan DANIEL 3 Bible Online

DANIEL 3 - Toraja-Sa'dan bible

DANIEL 3

¹Nagaragami datu Nebukadnezar misa’ rapang-rapang bulaan, annan pulona siku malangka’na, anna annan siku tu sangka’na; napabendanni dio padang marantena Dura lan propinsi Babel.

²Mesuami tu datu Nebukadnezar umpasirampunni sae tu mai to maraa lompo, pangulu, to maraa, pebangun ada’, sandan uai, to ma’paolai salu, sia to diala parea, iamotu mintu’ to ma’parenta lan propinsi, la ma’dio ren nasang, ke dirarai tu rapang-rapang dipodeata iato, tu napabendan datu Nebukadnezar.

³Sirampunmi tu mai to maraa lompo, pangulu, to maraa, pebangun ada’, sandan uai, to ma’paolai salu sia to diala parea, iamotu mintu’ to ma’parenta lan propinsi, la urrarai tu rapang-rapang dipodeata napabendan datu Nebukadnezar, anna bendan sola nasang dio tingayo rapang-rapang dipodeata iato, tu napabendan Nebukadnezar.

⁴Meolimi tu misa’ lentek maringan umpekapui gamaranna nakua: Inde sia tu parenta dipokadangkomi, e kamu mintu’ bangsa sia to sangpetayanan sia to ma’rupa-rupa basana, kumua:

⁵Iake mirangii tu oni tarompe’, suling, katapi, su’dekan, dandi sia suling rapi’ sia ma’rupa-rupa oni-onian, la lumbangkomi sae rokko padang umpenombai tu rapang-rapang bulaan, tu napabendan datu Nebukadnezar.

⁶Minda-minda tae’ nalumbang sae rokko padang sia menomba, ta’pa la dipembuangan tama dapo’, nanii api ma’lana-lana.

⁷Iamoto iatonna rangimi mintu’ bangsa sia to sangpetayanan sia to ma’rupa-rupa basana tu oni tarompe’, suling, katapi, su’dekan sia dandi sia ma’rupa-rupa oni-onian ta’pa lumbangmi sae rokko padang tu mintu’ bangsa, sia to sangpetayanan sia to ma’rupa-rupa basana umpenombai tu rapang-rapang bulaan iato, tu napabendan datu Nebukadnezar.

⁸Attu iato ta’pa saemi tu ba’tu pira-pira to Kasdim mennolo umparapa’i tu to Yahudi tu diona to.

⁹Messimanmi tu tau iato nama’kada lako datu Nebukadnezar, nakua: Namasakkemora tu datu sae lakona!

¹⁰Kamu, o datu, mipa’parentammo, kumua mintu’ to urrangii tu oni tarompe’, suling, katapi, su’dekan, dandi sia sulingrapi’ sia mintu’ oni-onian, la lumbang sae rokko padang la umpenombai tu rapang-rapang dipodeata bulaan iato,

¹¹sia minda-minda tae’ nalumbang sae rokko padang sia menomba, la dipembuangan tama dapo’, nanii api ma’lana-lana.

¹²Den tu ba’tu pira-pira to Yahudi, tu mangkamo naangka’ datu la umparenta propinsi Babel, iamotu Sadrakh, Mesakh sia Abednego; tau iate tae’ nabilangkomi, o datu: iatu mai deatammi tae’ napakarayai, sia iatu rapang-rapang bulaan, tu mipabendan tae’ duka napenombai.

¹³Sengkemi tu Nebukadnezar sia re’dek tongan ara’na, namesua unnalai tu Sadrakh, Mesakh sia Abednego. Nabaammi tau tu tau sola tallu umpennoloi datu.

¹⁴Ma’kadami tu Nebukadnezar lako tau iato mai nakua: E Sadrakh, Mesakh sia Abednego, miangga’iraka tang umpakarayai tu mai deatangku sia nokarokomika umpenombai rapang-rapang dipodeata, tu kupabendan?

¹⁵Kusanga melo, ke naalai penaammi, iammi rangii tu oni tarompe’, suling, katapi, su’dekan, dandi sia suling rapi’ sia ma’rupa-rupa oni-onian, la lumbangkomi sae rokko padang umpenombai tu rapang-rapang dipodeata, tu mangka kugaraga, (tae’ ammi dipatumba-tumba), apa ke tae’i mipenombai, ta’pa dipembuangangkomi tama dapo’, nanii api ma’lana-lana, sia den pole’raka misa’ deata tu ma’din urrampanangkomi lan mai limangku?

¹⁶Mebalimi tu Sadrakh, Mesakh na Abednego lako datu Nebukadnezar, nakua: Kisanga tae’ gai’na umpebaliikomi, moi sangbuku kada.

¹⁷Iake matoto’ siai tu Kapenombangki tu kipenombai la urrampanangkan, manassa la Narampanangkan lan mai dapo’ nanii api ma’lana-lana sia lan mai limammi, datu.

¹⁸Apa iake susinna tae’ Nabelai la miissan, e datu, kumua tae’ kila umpakarayai tu mai deatammi sia umpenombai tu rapang-rapang dipodeata bulaan, tu mangka mipabendan.

¹⁹Attu iato nakabu’mi kare’dekanna ara’na tu Nebukadnezar, sia bali’ tu rupanna sengke lako Sadrakh, Mesakh, na Abednego; mebalimi sia mesua la umpemalassui tonganni tu dapo’ pempitu manglokkon tu malassunna na iatu biasanna.

²⁰Nasuami tu ba’tu pira-pira muane, tu mawatangna tongan dio mai surodadunna la umpungo Sadrakh, Mesakh na Abednego, napembuanganni tama dapo’, nanii api ma’lana-lana.

²¹Dipungomi tu tau iato sola tallui situang bayu lamba’na, seppana sia passapunna sia mintu’ tamangkale senga’na, anna dipembuangan tama dapo’ nanii api ma’lana-lana.

²²Belanna makarra’ tongan tu parentana datu, sia iatu api lan dapo’ dipopa’lana-lana liu, iamoto anna mintu’ tu to unnangka’ Sadrakh, Mesakh na Abednego, mate nadurru’ api.

²³Na iatu tau iato sola tallui, Sadrakh, Mesakh na Abednego tobang situang pungo tama dapo’, nanii api ma’lana-lana.

²⁴Tirambanmi tu datu Nebukadnezar, anna tikara ke’de’; ma’kadami lako mintu’ pebangun ada’na, nakua: Tang talluraka tu tau tapungo dipembuangan tama to’ api? Ma’kadami tu tau iato mai nakua: Tonganna susitu kadanna datu.

²⁵Ma’kadami nakua: Tiromi, kutiro tu a’pa’ tau tilendokmo tu pungona sumalong lan to’ api, tae’ namatumba len, na iatu ma’penna’pa’na iatu rupanna susi bang anak deata.

²⁶Malemi tu Nebukadnezar lako to’ ba’ba dapo’, nanii api ma’lana-lana: nama’kada nakua: E Sadrakh, Mesakh na Abednego, kamumo tu taunNa Puang Matua patodoranna, tassu’mokomi mai. Tassu’mi tu Sadrakh, Mesakh na Abednego lan mai to’ api.

²⁷Sirampunmi tu mintu’ to maraa lompo, pangulu, to maraa sia pebangun ada’na datu: natiromi iatu api tae’ nasau’i tu kalena tau iato mai iatu beluakna tae’ namampu’ len, iatu bayu lamba’na tae’ nale’ke’i api, ondongpi tae’ bang nabusasa.

²⁸Ma’kadami Nebukadnezar nakua: Mintu’ kadipudian lu langngan Kapenombanna Sadrakh, Mesakh na Abednego! Nasua tu malaeka’Na sae urrampanan taunNa, tu nanii sande’, tu untengkai tu parentana datu sia umpopa’elo’na batang kalena, belanna moi misa’ deata noka ia umpakarayai ba’tu umpenombai, sangadinna Kapenombanna manna.

²⁹Iamoto angku pa’parentanni, kukua lako mintu’ tau, dio mai mintu’ bangsa ba’tu sangpetayanan ba’tu ma’rupa-rupa basana tae’ duka misa’ dipasalian, ke umpa’kada solangi Kapenombanna Sadrakh, Mesakh na Abednego, tau iato mai la dita’tak-ta’tak sia iatu banuanna la dipopendaun lauan, belanna tae’ tu kapenomban senga’, tu ma’din merampanan susito.

³⁰Mangkato nakaduttu’ tonganmi datu tu Sadrakh, Mesakh na Abednego lan propinsi Babel.