Read Toraja-Sa'dan DANIEL 4 Bible Online

DANIEL 4 - Toraja-Sa'dan bible

DANIEL 4

¹Iate kada lu dio mai datu Nebukadnezar dipalanda’ lako mintu’ bangsa, to sangpetayanan sia to ma’rupa-rupa basana, tu untorroi mintu’ kuli’na padang, kumua la marampa’ tongankomi.

²Naalamo penaangku umpa’peissananni tu mintu’ tanda kalle-kallean sia tanda mangnga, tu mangka Napogau’ Puang Matua patodoranna lako kaleku.

³Tumba kapuanna tu tanda kalle-kalleanNa sia tumba kuasanna tu tanda mangngaNa! Iatu kadatuanNa misa’ kadatuan tontong sae lakona sia iatu pekapuanganNa tontong disituran-turananni.

⁴Iatu aku te, Nebukadnezar, marampa’na’ lan banuangku sia torro manamanna’ lan tongkonan layukku.

⁵Ta’kala angku ma’tindo, kupotirambanni; iatu apa kutiro lan tindoku dao katindoangku sia iatu patiro mendeata, tu bu’tu dio pentiroku umpamagiangna’.

⁶Attu iato kupa’parentammi mesua umbaai lako kaleku tu mintu’ to paissan dio lu Babel, kumua anna pokadanna’ tu sembangna tindo iato.

⁷Pakalan saemi tu mintu’ to paissan-issan, to ma’basa-basa to Kasdim sia to pakita-kita, angku uleleananni tu tindoku lako kalena, apa tang naissan umpokadanna’ tu sembangna.

⁸Undinna saemi tu Daniel umpennoloina’, sikona sanga deatangku disanga Beltsazar, tu natorroi penaa deata masero angku uleleananni lako tu tindo iato.

⁹E Beltsazar, pangulunna mintu’ to paissan-issan, tu kuissan, kumua natorroiko penaa deata masero, na moi misa’ rasia mukaringanan nasang, iamoto pokadammo’ tu patiro mendeata lan tindoku, tu kutiro, iamotu sembangna.

¹⁰Inde sia tu patiro mendeata bu’tu dio pentiroku dao katindoangku, kutiro: den kayu sangbatang, bendan lan tangnga lino, lendu’ ia ma’layukna.

¹¹Iatu kayu iato kapua sia mawatang, iatu ma’layukna tu’tun dao langi’ sia payan ditiro lako mintu’ randan langi’.

¹²Iatu daunna maballo sia tarri’ tu buanna, iamoto napokandei mintu’ angge menono’; sia napentionganni mintu’ olo’-olo’ dao kapadanganna sia iatu tangkena napopembuyan mintu’ manuk-manuk dao lu langi’, sia mintu’ angge menaa umpokandei.

¹³Kutiro lan patiro mendeata, tu bu’tu dio pentiroku dao katindoangku, kutiro den misa’ to ma’kampa, tau iato misa’ to maindan songlo’ dao mai langi’.

¹⁴Metambami umpekapuai gamaranna, nakua: Lellengi tu kayu iato sia totoi tu tangkena, purru’i tu mai daunna, samboranni tu buanna; namallai nasang tu mintu’ olo’-olo’ diong sia manuk-manuk dao mai tangkena.

¹⁵Apa patorroi iatu garonto’ panglellengan mennuaka’napa diong padang, dipori bassi sia tambaga lan to’ riu maluna, diong padang; anna sakka’i ambun dao mai langi’, na iatu kande napotaa sola olo’-olo’, iamotu riu dio lu padang.

¹⁶La dipopembali tu penaanna, anna tang susimo tolino: dibenmo penaa olo’-olo’, la nalambi’ pempitu attu la nanii susito.

¹⁷Iate parenta iate napamatu’tunmo mintu’ to ma’kampa na iatu iannate nalampakmo to masero, anna tandai mintu’ to tuo, kumua Puang Patodoranna ungkuasai tu kadatuan tolino sia Nakamasei minda-minda tu Naporai, ondongpi ma’din natokko tu to tarru’ madiongan dio lu tolino lan kadatuan iato.

¹⁸Iamote tu tindo tu akumo, datu Nebukadnezar, mangka untiroi; na iko, e Beltsazar, pokadanna’ tu sembangna, belanna mintu’ to paissan lan parentaku tae’ nakullei umpokadanna’ tu sembangna; apa iko ma’dinko, belanna natorroiko penaa deata masero.

¹⁹Sangattu’ to naalami sumangnga tu Daniel, tu diganti Beltsazar, iatu tangnga’na umpamagiang penaanna. Ma’kadami tu datu lako nakua, E Beltsazar, da napamagiangko tu tindo iato sola sembangna. Mebalimi tu Beltsazar nakua: O puangku, kenna iaora tu to ungkabiri’komi napatu tu tindo iato sia kenna ualimmiora narampoi tu sembangna.

²⁰Iatu kayu mitiro kapua sia mawatang, tu ma’layukna tu’tun dao langi’ sia payan ditiro lako mintu’ randan langi’.

²¹Iatu daunna maballo sia tarri’ tu buanna, iamoto napokande mintu’ angge menono’, sia napentionganni mintu’ olo’-olo’ dao kapadanganna sia iatu tangkena napopembuyan mintu’ manuk-manuk dao lu langi’.

²²Iatu kayu iato, kamu bangsiamo datu, tu kapuamo sia matoto’; iatu kataromposammi sakerangngan-rangnganna, naurunganni sumpu langngan langi’ sia iatu kadatuammi sae lako randan langi’.

²³Natiro datu tu misa’ to ma’kampa, tau iato misa’ to maindan songlo’ dao mai langi’, nakua: Lellengi tu kayu iato sia sanggangi, apa patorropi ia tu garonto’ panglellengan mennuaka’na diong padang, dipori bassi sia tambaga, lan to’ riu maluna dio padang, anna sakka’i ambun dao mai langi’, na iatu kande napotaa sola olo’-olo’, iamotu riu dio lu padang, sae lako nalambi’ pempitu attu.

²⁴Inde sia tu sembangna tindomi, o datu, sia inde sia tu Napamatu’tun Puang Patodoranna diona puangku datu.

²⁵La naali’komi tau dio mai sangbilangan tolino na iatu katorroammi la sisola olo’-olo’ dio lu padang; anna pakandekomi tau riu ten to sapi, ammi dipopa’elo’na nasakka’i ambun dao mai langi’; la nalambi’ pempitu attu la minii susito sae lako miakunna, kumua Puang Patodorana ungkuasai kadatuanna tolino sia Nakamasei tu minda-minda Naporai.

²⁶Apa iatu napokada tau tu diona garonto’ panglellengan mennuaka’, la dipatorropa lan padang, iamo battuananna to, kumua iatu kadatuammi la bantang temponna miaku, kumua iatu suruga unnampui kaparentan.

²⁷Iamoto, e datu, lala siai manii naala penaammi tu pa’pakilalangku kumua puttaimi tu kasalammi tete dio kamalamburan sia puttaimi tu kakelokammi tete dio ungkamasei to makario-rio, dennoupa’ anna dipamalambe’ tu karapasan dio kalemi.

²⁸Iate mintu’na te urrampoimo datu Nebukadnezar.

²⁹Iatonna lendu’mo sangpulo dua bulanna, sumalong-malongmi tu datu dao bubungan marantena tongkonan layuk kadatuanna dio Babel.

³⁰Ma’kadami tu datu nakua: Tangiaraka te tu Babel kapua, tu kubangun dipoisungan kadatuan tete dio kakapuanna kuasangku, dikua anna dipakala’bi’ tu kapayungangku.

³¹Tae’ bangsiapa naupu’ nasa’bu’ dio randan dipudukna datu tu kada iato, denmi gamara dao mai langi’ nakua: Dipokadangko, datu Nebukadnezar, kumua: iatu kadatuammu sisayurammoko.

³²Sia la naali’ko tau dio mai sangbilangan tolino na iatu katorroammu la sisola olo’-olo’ dio lu padang; anna pakandeko tau riu ten to sapi; sia nalambi’ pempitu attu la munii susito sae lako muakunna, kumua Puang Patodoranna ungkuasai kadatuanna tolino sia Nakamasei tu minda-minda Naporai.

³³Attu ia bangsiamoto anna rampoi Nebukadnezar tu kada iate, belanna naali’mo tau dio mai sangbilangan tolino, anna kande riu ten to sapi, anna sakka’i ambun dao mai langi’ tu kalena, sae lako kala’dok tu beluakna susi bulu langkan maega sia iatu kanukunna susito kanuku manuk-manuk.

³⁴Apa iatonna lendu’ nasangmo tu attu iato, mentingaramo’ langngan langi’ tu aku, Nebukadnezar, tibalikmi sule tama kaleku tu tangnga’ kinaangku, iamoto kupudimi tu Puang Patodoranna sia kupakala’bi’mo sia kupangke’mo tu Puang Tuo sae lakona, belanna iatu parentaNa misa’ parenta matontongan sia iatu kadatuanNa tontong siosso’.

³⁵Iatu mintu’ to untongkonni kuli’na padang direken tae’ bang gai’na; Napogau’i lako tu mintu’na angge maritik dao langi’ sia mintu’nato untongkonni kuli’na padang unturu’ pa’poraianNa, sia moi misa’ tau tae’ untukka’i tu limanNa, ba’tu ma’kada lako Kalena kumua apara tu Mipogau’?

³⁶Attu ia bangsiamoto natibalik sule tu tangnga’ kinaangku, sule dukami lako kaleku tu kapayungangku sia kamala’birangku, anna tarompo’ tu kadatuangku; sae pole’omi umpennoloina’ tu mai pebangun ada’ku sia to ma’parentaku, sia diangka’mo’ sule tama kadatuangku, ondongpi mandu pole’ ia tu kamala’biran dikamaseanna’ anna dolona.

³⁷Totemo, iate aku, Nebukadnezar umpangke’mo’ sia umpalayukmo’ sia umpakala’bi’mo’ Datu dao suruga, tu belanna tongan nasang tu penggauranNa sia malolo tu lalanNa sia ullese lu rokko to unturu’ kamatampoan.