Read Toraja-Sa'dan DANIEL 6 Bible Online

DANIEL 6 - Toraja-Sa'dan bible

DANIEL 6

¹Mangkato natarimami Darius, to Media, tu kadatuan, tonna annanmo pulona ndua taunna.

²Nakalo’mi penaanna Darius unnangka’ saratu’ duangpulo to maraa lompo, tu titale’ umparenta mintu’ lili’ kadatuan iato;

³anna daona pole’o to maraa lompo iato den tu tallu to maraa akkele’na datu, iamotu Daniel misa’, tu nanii to maraa lompo iato umpatu’tunni tu passananna, kumua da anna rugi tu datu.

⁴Attu iato iatu Daniel losong tu kamatarrusanna na iatu mintu’ to maraa akkele’na datu na iatu mintu’ to maraa lompo, belanna to natorroi penaa ma’iringan naurunganni iatu datu la morai unnangka’i la umparenta mintu’ kadatuan iato.

⁵Undaka’-daka’mi lalan tu mintu’ to maraa akkele’na datu na iatu mintu’ to maraa lompo la umpa’parampoan Daniel diona kama’parentan lan kadatuan iato, apa moi misa’ tae’ nakabu’tui tu la napobannang nanii umpa’parampoanni ba’tu kadakena, belanna ia misa’ to maruru’ sia to tae’ bang sala ba’tu kakadakean diappa’ dio kalena.

⁶Ma’kadami tu tau iato mai nakua: Tae’ bang bannangna takabu’tui la umpa’parampoanni tu Daniel, sangadinna ke diona kapengkaolan langngan Kapenombanna tanii unnappa’ bannangna la umpa’parampoanni.

⁷Mennolomi tu to maraa akkele’na datu sia mintu’ to maraa lompo lako datu sia ma’kada lako kalena umpalaku tonganni nakua: O datu Darius, namasakkemora tu datu sae lakona.

⁸Iatu mintu’ to maraa akkele’na datu lan kadatuan, pangulu, to maraa lompo, pebangun ada’ sia to maraa nasangamo melo, ke dipatassu’i tu parentana datu sia la dipamanassa tu misa’ atoran kumua minda-minda lan te tallungpulo allona umparampo palakunna lako misa’ deata ba’tu tolino sangadinna lako manna kamu, o datu, tau iato dipembuangan tama lo’ko’ singa.

⁹Na totemo, o datu, melo ke mipatassu’mi tu atoran iato sia sura’i tu sura’ parenta, tu tang lelukmo, situru’ atoran napondok to Media sia to Persia, tu tang diriu’ sule.

¹⁰Iamoto nasura’mi datu Darius tu sura’ parenta sola atoran iato.

¹¹Iatonna issanmi Daniel, kumua mangkamo disura’ tu sura’ parenta iato, malemi lako banuanna; dao bilik mengkadaoanna den pentiroan tibungka’ ma’palulako Yerusalem; pentallun lan sangallo nanii malinguntu’ massambayang sia umpudi Kapenombanna, susitu biasa napogau’ dolona.

¹²Ma’dondomi tu mai tau urrekke’i lako, naapparanni tu Daniel marassan massambayang sia mengkamoya-moya langngan Kapenombanna.

¹³Saemi tu tau iato mai mennolo lako datu nama’kada lako tu diona atoran kadatuan, nakua: Tang mipatassu’moraka tu atoran, kumua minda-minda lan te tallungpulo allona tu umparampo palakunna lako misa’ deata ba’tu tolino, sangadinna lako manna kamu, o datu, tau iato la dipembuangan tama lo’ko’ singa? Mebalimi tu datu nakua: Iatu apa iato dipantokmo situru’ atoran napondok to Media sia to Persia, tu tang diriu’ sule.

¹⁴Ma’kadami tu tau iato mai lako datu nakua: Iatu Daniel, misa’i to dipali’ dio mai Yehuda, tae’ nabilangkomi, datu, sia iatu atoran mipatassu’ tae’ naperangii sangadinna massambayangora pentallun sangallo.

¹⁵Iatonna rangimi datu te iannate, matana’ tonganmi penaanna tu diona to, naundaka’ lalan la urrampananni tu Daniel, ondongpi sae lako lambunna allo nanii masara’ tu datu la ullendokanni.

¹⁶Naparuku tonganmi tau iato mai tu datu nama’kada lako nakua: La miissan datu, kumua iate misa’ atoran napondok to Media sia to Persia, tae’ nama’din disondai len tu misa’ atoran ba’tu parenta, tu mangkamo napatassu’ datu.

¹⁷Mesuami tu datu, namale tu tau unnala Daniel, napembuanganni rokko lo’ko’ singa. Ma’kadami tu datu lako Daniel nakua: Na Kapenombammumora tu tontong mupenombai, Iamo la urrampanangko.

¹⁸Nabaami tau tu misa’ batu, natuturanni tu baba lo’ko’ iato, naca’i sissin peca’na datu sia sissin peca’na to ma’parentana dikua da nadipogau’ tu senga’na diona Daniel.

¹⁹Mangkato sulemi tu datu lako tongkonan layukna, tang kumande to bongi iato, sia tae’ namesua umbaa paningoan tu la umpatibalik pa’inaanna, sia tang rapa’ bang mamma’.

²⁰Millikmi tu datu tonna tilalek masiang, mela’bik tongan anna madomi’ male lako to’ lo’ko’ singa.

²¹Iatonna reke’mi tu lo’ko’ singa, tang masero bangmo gamaranna tu datu untambai Daniel belanna masussa, anna ma’kada lako Daniel nakua: E Daniel, taunNa Puang Matua matontongan, iatu Kapenombanmu tu tontong mupengkaolai, Narampanan siarokoka dio mai singa?

²²Mebalimi tu Daniel lako datu nakua: O datu, namasakkemora tu datu sae lakona.

²³Iatu Kapenombangku ussua malaeka’Na ungkamummu’i tu sadang singa, anna tae’ napatumba lenna’, belanna tae’ angku sala dio oloNa sia tae’ duka kupogau’ kadake lako kamu, datu.

²⁴Attu iato sende tonganmi tu datu, anna mesua kumua la nariu’ tau tu Daniel diong mai lo’ko’; diriu’mi tu Daniel diong mai lo’ko’, na moi misa’ bangkena tae’ diapparan dio kalena, belanna sande’ lako Kapenombanna.

²⁵Mesuami tu datu, anna baai tau sae tu mai to umpa’parampoan Daniel, nadipembuangan tu tau iato rokko lo’ko’ singa, la kalena tu tau iato la iatu mai anakna sia bainena, natae’pa narampo melo rokko lo’ko’ iato, ta’pa nadammakmi mintu’ singa; iatu mintu’ bukunna puramo nanisak-nisak.

²⁶Mangkato massura’mi tu datu Darius lako mintu’ bangsa sia to sangpetayanan sia to ma’rupa-rupa basana, tu untongkonni mintu’ kuli’na padang, nakua: Nakapuamora kamarampasammi.

²⁷Dio mai kaleku dinii umpatassu’ parenta, kumua mintu’ tau lan mintu’ lili’na kadatuangku la magiang sia mataku’ lako Kapenombanna Daniel, belanna Iamo Puang Matua matontongan, tu tang leluk sae lakona; iatu kadatuanNa tang la sanggang sia iatu parentaNa tae’ katappuranna.

²⁸Iamo parampanan sia pakarimmanan sia Ia umpaden tanda kalle-kallean sia tanda mangnga dao lu langi’ sia dao kuli’na padang. Iamo mangka urrampanan Daniel lan mai kuasa singa.

²⁹Iatu Daniel dipakala’bi’ tongan lan lu parentana Darius sia lan lu parentana Koresh, to Persia.