Read Toraja-Sa'dan DANIEL 9 Bible Online

DANIEL 9 - Toraja-Sa'dan bible

DANIEL 9

¹Iatonna taun pamulanna kaparentanna Darius, anakna Ahasweros, bati’ to Media, tu mendadi datu undatui to Kasdim,

²tonna taun pamulanna kadatuanna, iate aku, Daniel, kuparessa tonganmi lan lu ba’tu pira-pira sura’ tu bilangan taun, diona tu napomangka kadanNa PUANG rampo lako nabi Yeremia kumua Puang umpadaun lauanni tu Yerusalem pitung pulo taunna.

³Mentingaramo’ langngan Puang Kapenomban la massambayang sia mengkamoya angku ma’puasa sia ma’karoro’ sia undudung barra’-barra’.

⁴Massambayangmo’ langngan PUANG, Kapenombangku sia mangaku sala, kukua: O Puang, Puang Matua pasareongan sia metakuran, tu ungkanana’i basse sia kamasokanan lako tu mintu’ to ungkamali’Komi sia ungkaritutui pepasanMi.

⁵Kasalammokan sia patodo tinting, tang mekaalukmokan sia pabali-bali; untanannimokan boko’ pepasanMi sia atoramMi.

⁶Sia tae’ kiperangii tu mai taumMi, iamotu mai nabi, tu ma’kada tete dio sangamMi lako mintu’ datungki, mintu’ arungki, mintu’ nene’ to doloki sia lako mintu’ tau lan tondok.

⁷O Puang, dio Kamu kalemi tu kamaloloan, apa iatu dio kaleki siri’ manna, susite allo iate, iamotu dio lu to Yehuda, to lan Yerusalem sia dio lu mintu’ to Israel, la mandappi’na sia mambelanna, tu torro lan lu mintu’ tondok, tu Minii urrambai male belanna katangmarurusan, tu napogau’ umbali-baliKomi.

⁸O PUANG, natodingmokan siri’ sia iatu mai datungki, arungki sia nene’ to doloki, belanna kasalammokanni lako Kalemi.

⁹Dio ia Puang, Kapenombangki, tu kamamasean sia kama’pagarrisan, moi angki pabali-balimo lako Kalena,

¹⁰sia tang umperangiimokan gamaranNa PUANG, Kapenombangki, sia tang unturu’mokan sukaran aluk, tu mangka Nabenkan nalopian mintu’ taunNa, iamotu mai nabi.

¹¹Ondongpi mintu’na to Israel untengkaimo Sukaran alukMi sia memboko’mo, belanna tae’ naperangii tu gamaramMi. Iamoto anna dibarrakan lako kaleki tu tampak ropu, tu diarra’i sumpa, tu mangka disura’ lan Sukaran alukna Musa, taunNa Puang Matua, belanna kasalammokan lako Kalena.

¹²Napalanda’mo tu mintu’ kadanNa, tu mangka Napokada diona kami sia diona mintu’ to ma’parentaki, tu umparentakan, belanna Naparampoikan kasanggangan lendu’ kapuana, susitu tae’ bangpa nadadi lan mintu’ nasambo langi’, sangadinna lan manna Yerusalem.

¹³Susitu disura’ lan Sukaran alukna Musa, susi dukamoto tu mintu’ kasanggangan iate urrampoikan, sia tae’ kiparadan kasengkeanNa PUANG, Kapenombangki, belanna tae’ kimengkatoba’ dio mai kakadakeangki sia tae’ kipalan penaa kamanapparamMi.

¹⁴Iamoto namatangkin tu PUANG la umparampoikanni tu kasanggangan, belanna iatu PUANG, Kapenombangki, malambu’ lan mintu’ pengkarangan Napogau’, apa tae’ kiperangii tu gamaranNa.

¹⁵Tonganna, o Puang, Kapenombangki, tu mangka ussolan taumMi tassu’ lan mai tondok Mesir tete dio lima mawatang sia iatu umpakalelean sangamMi, susi allo iate, kasalammokan sia tang mekaalukmokan.

¹⁶O Puang, ke ma’dinni, natete dio mintu’ kamaloloamMi, natilendok tu kasengkeamMi sia kare’dekan ara’Mi dio mai Yerusalem, kotaMi, iamotu buntu maindanMi; belanna diona kasalangki sia kakadakeanna nene’ to doloki na iatu Yerusalem sia iatu taumMi napamatuna mintu’ to untikuikanni.

¹⁷Totemo perangiimi, o Kapenombangki, tu passambayangna taumMi sia pengkamoyanna sia la Mipaarrangi lindoMi tu inan maindan sanggangMi belanna pa’poraianNa Puang.

¹⁸Patananni tu talingamMi, o Kapenombangku, sia perangiina’: bungka’i tu matamMi, amMi tiroi tu kasanggangangki sia iatu kota, tu dinii ussa’bu’ sangamMi naposanga; belanna tae’ nabannang dio kamaloloangki angki barrakanni tu pengkamoyaki dio oloMi, sangadinna bannang diori kamamasean kapuaMi.

¹⁹O Puang, perangii! O Puang, pagarri’i! O Puang, palan penaai! Pogau’i damo Midampai, belanna Kalemi, o Kapenombangku, belanna disa’bu’ tu sangamMi naposanga kotaMi sia taumMi.

²⁰Marassan bangsiapa’ ma’kada sia massambayang sia unnaku kasalangku sia kasalanna bangsaku to Israel sia umbarrakan pengkamoyaku langngan PUANG, Kapenombangku, diona buntu maindanna Kapenombangku,

²¹marassan bangsiapa’ ma’kada tongku massambayang, saemi tu misa’ muane, iamotu Gabriel, tu mangka kutiro dolona lan patiro mendeata, matira’ tongan mentia’ umperreke’ina’, tonna attu pemala’ karoen.

²²Naparandukmi unnada’ina’ anna sipa’kadanna’ nakua: E Daniel, totemo tassu’mo’ sae la umbenko kapaissanan.

²³Iatonna bunga’ pengkamoyamu, tassu’mi misa’ kada sia saemo’ umpokadangko, belanna ikomo tu tarru’ dipakaboro’. Palan penaai tu kada iato sia pariba’tengi tu patiro mendeata.

²⁴Pitungpulo minggunna dipamanassanni tu taummu sia kota maindanmu la ungganna’i tu kapatodo-tintingan sia la umpogau’i tu kasalan, sia la umbasei tu kakadakean, la umbaa kamaloloan sae lakona sia la ussanda tonganni patiro mendeata sia nabi, sia la umminnakki tu apa tarru’ maindan.

²⁵Issanni sia tandai, kumua randuk dio mai attu tassu’na tu kada la umpemeloi sia umbangunni sule tu Yerusalem sae lako kaparentanna misa’ to ditokko, iamotu misa’ arung, den pitung minggu, sia annan pulona ndua minggu la dinii umpemeloi sia umbangunni, anna torro susito, sola tana lapangna sia kalo’na, apa siappa’ attu kadipakario-rioan.

²⁶Sia iake lendu’mi annan pulona ndua minggunna la diputtai tu misa’ to ditokko, moi tae’ apa naposala; sia iatu taunna misa’ arung, tu la sae, la ussanggang kota sia inan maindan, apa ma’katampakanna la nasamboi uai saba’; sia sae lako ma’katampakanna la den kasirarian, iamotu kasanggangan, tu mangka dipamanassa.

²⁷Sia la napamabanda’ tu basse lako buda tau lan sangminggu; iatonna ma’tangngana minggu la napa’dei tu pemala’ pangrere’ sia iatu kande dipemalaran; anna dao pani’ megi’giran la sae tu misa’ to ma’kasanggang sia manassa la nasanggang sae lako tappunna, sia iatu apa dipamanassa la dibarrakan dao apa sanggang.