Read Toraja-Sa'dan HOSEA 10 Bible Online

HOSEA 10 - Toraja-Sa'dan bible

HOSEA 10

¹Iatu Israel misa’ garonto’ anggoro’ loboran; satarri’-tarri’na tu buanna, sanarangngan-rangnganninna tu inan pemalaranna, samelo-melona tu padangna, sanaballo-balloinna tu batu dipodeata.

²Mo’rang tu penaanna, totemo la napassan tu bua kasalanna: la Nasanggang Puang tu inan pemalaranna sia la Naro’pok tu mintu’ batu dipodeatanna.

³Inang ma’kada tu tau iato mai totemo, nakua: Tae’ datunta — apa iake tae’i takataku’ PUANG, apara ma’din napogaurangki’ tu datu.

⁴Tau iato mai ma’kada tang kebattuan: umpalao sumpa tang tongan sia untanan punala basse. Sia la bu’tu tu ukungan susi lelating tuo lan lu gorri’ pa’lak.

⁵Belanna anak sapi dio Bet-Awen anna selang tu to umpa’tondokki Samaria; ondongpi iatu to buda mario-rio tu diona to, sia silallakan to minaa umpengkaolai rapang-rapang dipodeata, belanna sisayurammo kamala’biranna.

⁶Ondongpi iatu kalena dibaa duka lako Asyur, la dipennoloan lako datu Passirarian. La matuna tu Efraim sia la kasirisan tu Israel napobua’ pa’tangngaranna.

⁷La disanggangmo tu Samaria; iatu datunna susi to bulisak naangan uai male.

⁸La disanggang tu inan madao dinii memala’ dio Awen, tu napokasalan Israel. La nakabu’ duri sia a’da’ tu inan pemalaranna. Anna ma’kada tu tau iato mai lako buntu, kumua: Samboikan sia lako tanete, kumua: I’pinnikanni!

⁹Tempon allonapa Gibea, mupogau’mo kasalan, e Israel. Tontong bangkomi umpengkaolai tu iannato. Tang nalambi’raka dio Gibea tu tau iato mai tu kasirarian unneai tu to tang mekaaluk unturu’ pa’poraiangKu?

¹⁰Manassa la Kupandasa, anna sirampun tu mintu’ bangsa unneai, sia la dipandasa tu tau iato mai natumang tu kasalanna da’dua.

¹¹Iatu Efraim misa’ sapi mangura diada’imo, tu moraimo dipanglulluran: apa Kukasayangi tu sokkong melona. La Kuayokai tu Efraim, sia la dipa’tengkoan tu Yehuda sia la dipassalagan tu Yakub.

¹²Mangambo’komi situang kamalamburan, mebura padangkomi situang kamamasean, bungka’komi padang ba’ru. Iake susito, nalambi’mo attunna la undaka’ PUANG, kumua anNa sae sia umpasaeangkomi uran kamaloloan.

¹³Untengkomokomi katangmekaalukan sia urrampunmokomi kakadakean; ungkandemokomi bura padang kamo’rangan, belanna murannuammo tu lalanmu sia kabudanna to lalongmu.

¹⁴Iamoto anna dadi tu kamarukkan unnea bangsamu, sia la disanggang tu mintu’ kota bentengmu, susi Salman ussanggang Bet-Arbel, tonna bendan kasirarian, tonna pessambakanni tu indo’ sola anakna.

¹⁵Iatu iannato buntu tumangna Betel sia pa’pobua’na kaliuan kadakemi. Ianna tilalekmo masiang, iatu datu Israel la disabu’imo.