Read Toraja-Sa'dan HOSEA 12 Bible Online

HOSEA 12 - Toraja-Sa'dan bible

HOSEA 12

¹Nalilingi bangMo’ Efraim ma’kada mo’rang sia bati’na Israel ma’pakena bang — na iatu Yehuda tontong bang umbali-bali Puang Matua sia To tarru’ maindan, tu maruru’ bang.

²Iatu Efraim umpodia’ angin sia situ’turan allo unnula’ angin matallo; napapa’i bang tu kamo’rangan sia kasanggangan. Untanan basse sola Asyur na iatu minna’ dibaa lako Mesir.

³Den kara-karaNa tu PUANGna Yehuda: iamoto anNa ukungi tu Yakub sitinaya kedona sia la Napapakkanni sitinaya penggauranna.

⁴Lan bang siapa pa’tambukanna indo’na anna pakenami tu siulu’na, na iatonna matona’mo sibobo’mi Puang Matua.

⁵Sibobo’mi misa’ malaeka’, anna patalo. Tumangi’mi sia mengkamoya umpalaku kamaturu-turuan lako Puang. Nakabu’tuimi tu Puang dio Betel, na dio Nanii ma’kada tu Puang lako kaleta,

⁶iamo tu PUANG, Kapenombanna mintu’ ma’dandan maritik, PUANG tu sanganNa.

⁷Iamoto tibalikmoko sule lako Kapenombammu, karitutui tu kamasokanan sia katonganan sia tontongko ma’rannuan lako Kapenombammu.

⁸Iatu Kanaan — lan lu limanna tu timbangan ma’pakena, ia umpogau’ pakira-kira.

⁹Apa ma’kada tu Efraim nakua: Tonganna, sugi’mo’, na iatu kasugirangku daka’kumo; iatu mintu’ daka’ku, tae’ nadiappa’ tu kakadakean dio kaleku, tu disanga kasalan.

¹⁰Apa Akumo tu PUANG, Kapenombammu, tempon dio mai tondok Mesir. La Kupatorro pole’ko lan tenda, susi tonna allo kasirampunan.

¹¹Sia la ma’kadaNa’ lako mintu’ nabi sia la Kupabuda tu patiro mendeata sia la ma’kadaNa’ lan pa’pasusian nalopian mintu’ nabi.

¹²Moi inan kakadakean tu Gilead, anna tae’ pissanmo gai’na tu pa’tondokanna; moi anna pemalaranni tau tu sapi laki dio Gilgal, ia duka tu inan pemalaranna la susimo batu ditombon diong kalo’ pa’lak.

¹³Iatu Yakub mallaimo lako padang Aram, sia iatu Israel dikurinni, la urrampanni kapa’ tu misa’ baine, sia belanna la urrampanni kapa’ tu misa’ baine, anna mangkambi’ domba.

¹⁴Apa tete dio misa’ nabi anNa solanni PUANG tu to Israel lan mai Mesir, sia tete dio misa’ nabi anna dikambi’i.

¹⁵Iatu Efraim mepa’diran tongan penaa, apa Puangna umpasuleanni tu rarana sia umpabala’i tu kamatunan napogau’ lako Puang.