Read Toraja-Sa'dan HOSEA 13 Bible Online

HOSEA 13 - Toraja-Sa'dan bible

HOSEA 13

¹Iake ma’kadai tu Efraim, tiramban tu tau, anna matande dio lu to Israel, apa natumang Baal, iamoto nakasalan, anna mate.

²Totemo napatontong duka umpogau’ kasalan sia nagaragai rapang-rapang dipodeata dipati’no’ tu salakana, iamo tu rapang-rapang dipodeata nagaragai unturu’ inaanna; mintu’nato panggaraga pande bulaan. Napokadammi tau tu diona tau iato mai: iatu to memala’, iamo unnudung anak sapi.

³Iamoto anna la susi bang to gaun melambi’ sia susi damo’, tu pa’de, ke mane berre’i allo, sia susito ta’pian nasarombonan angin, sia susito rambu tassu’ dio pentiroan.

⁴Apa Akumo tu PUANG, Kapenombammu, tempon dio mai Mesir, tae’ Kapenomban mutandai sangadinna Aku sia tae’ misa’ to merampanan sangadinna Aku.

⁵Kutandaimoko lan padang pangallaran, lan padang mampu’.

⁶Iatonna dikambi’imo, dipedia’imi tu tau iato mai. Iatonna dia’mo umpamadaomi penaanna: iamoto anna tang ungkilalaiNa’.

⁷Iamoto angKu butung singa lako tau iato mai, angKu mangodo’ susito arimau buluh dio to’ lalan.

⁸La Kudammak tu tau iato mai susito beruang sisayuran anakna, Kuserekki tu barangkangna, angKu ampello’i susito singa birang, anna olo’-olo’ dio lu padang umbesse-besei.

⁹Iamoto tu kasanggangammu, e Israel, belanna mubali-baliNa’ tu Topatunduammu.

¹⁰Umbamira tu datummu, tu la urrampanangko lan mintu’ kotamu, sia umbamira tu to ma’parentamu — e iko tu mangka ma’kada kumua: Benna’ misa’ datu sia ba’tu pira-pira arung.

¹¹Kubenmoko misa’ datu situang kasengkeangKu sia Kuala pole’ situang kamagalliangKu.

¹²Iatu kakadakeanna Efraim manda’mo dinanna sia iatu kasalanna dipalumpunni melomo.

¹³Narampoi saki susi baine mangurria’, apa iatu Israel susi misa’ pia tang paissan; ianna attunnamo la dadi, tae’ naditibussanan.

¹⁴La Kurampananraka tu tau iato mai dio mai kuasanna lino to mate, sia la Kula’bakraka dio mai kamatean? E kamatean, umbamira tu ropummu, e lino to mate umbamira tu pasanggangammu? Tang natandaimo matangKu tu kamamasean.

¹⁵Moi anna maloboran dio lu to massiulu’, la sae duka tu angin dio mai rampe matallo, iamo tu anginNa PUANG, tu kendek dio mai padang pangallaran, naurunganni iatu kalimbuangna ma’ti sia iatu mata uainna be’ko’ tongan; narampa tu mai ianan ballo napalumpunni.