Read Toraja-Sa'dan HOSEA 14 Bible Online

HOSEA 14 - Toraja-Sa'dan bible

HOSEA 14

¹Iatu Samaria la umpassanni tu salana, belanna pabali-balimo lako Kapenombanna. La tibambang tu tau iato mai nakande pa’dang sia la dipessambakan tu mai anak bitti’na sia iatu mai baine ma’tambukna la ditesse tu pa’tambukanna.

²Mengkatoba’ko, e Israel, lako PUANG, Kapenombammu, belanna tete dio kakadakeammu, ammu tisumbang.

³Saemokomi umparampoi tu pangakuan kasalan, sia mengkatoba’ lako PUANG, ammi ma’kada lako Kalena kumua: Pa’dei nasangi tu mintu’ kakadakeangki, ammi katuru-turuikan; kipennoloammo tu pangakuan dio randan pudukki butung to sapi laki dipangurrandean.

⁴Tae’mo anna Asyur tu la urrampanangkanni, tae’mo angki la ma’darang. Sia tae’mo angki la ma’kada lako panggaraga limangki kumua: O Kapenombangki! Belanna diori mai Kalemi nanii unnappa’ kamamasean tu pia biung.

⁵La Kuparapa’ tu kamembokoranna tau iato mai, la kalebu tallang tu penaangKu ungkamasei, belanna iatu kasengkeangKu toyangmo dio mai kalena.

⁶La butungNa’ to ambun lako to Israel, anna menta’bi susi bunga bakung, sia la merrorro tu aka’na susi Libanon.

⁷Marambak tu mintu’ tarukna; iatu kameloanna la susi kayu saitun sia iatu busarungngu’na susi busarungngu’na Libanon.

⁸Tau iato mai, tu torro umpentionganni, natananni pole’ gandung. Ondongpi la menta’bi susitu garonto’ anggoro’, nakalelean susito uai anggoro’ Libanon.

⁹E Efraim, la siapaRa’ tu mintu’ rapang-rapang dipodeata? — Kutanding talingamo sia Kupenunumo, — Akumo tu butung kayu sanoba’ tu tontong maluna, dio Kaleku tu nanii bu’tu buammu.

¹⁰Minda-minda kinaa, la naparinaa te mintu’nate! Minda-minda tu matarru’ la nasanda tonganni. Belanna iatu lalanNa PUANG malolo; naolai mintu’ to malambu’, apa napotilende’ mintu’ to patodo tinting.