Read Toraja-Sa'dan HOSEA 7 Bible Online

HOSEA 7 - Toraja-Sa'dan bible

HOSEA 7

¹IangKu la umpakatanai sule tu to Israel, la payan tu kakelokanna Efraim sia kakadakeanna Samaria. Belanna ma’pakena bang: tama bang tu to boko, anna mangrampa tuntunan pa’gora’ dio salian.

²Tae’ nakilalai, kumua iatu mintu’ kakadakeanna Kupalan penaa. Totemo natikuimo gau’ kadakena, sia dio nasangmo oloKu.

³Napasende kakadakeanna tau iato mai tu datu sia mo’rangna tu mai arung.

⁴Mintu’ tau iato mai pasandak salu lako rampanan kapa’, butung to dapo’ tang pa’de apinna, moi na iatu to unggaragai roti tae’mo umpadukku apinna, belanna ullemun ta’pung, sae lako messu’mo.

⁵Iatonna allo kapuana datunta, napelangoi uai anggoro’ tu mai arung. Natadoan limanna tu to tae’mo apa nadampang.

⁶Apa napamalassu tu penaanna tete dio pa’pakena butung to dapo’; moi anna mamma’ situ’turan bongi tu to unggaragai roti, melambi’o to malassu bang tu dapo’ susi api ma’lana-lana.

⁷Iatu mintu’ tau iato mai malassu susi dapo’. Pura namangsanni tu mintu’ to ma’parentana, sia mintu’ datunna tibambangmo mate. Moi misa’ tau dio lu tau iato mai tae’ nameongli’ lako Kaleku.

⁸Iatu Efraim umpasirau kalena mintu’ bangsa. Iatu Efraim susi misa’ pa’ranggina tang dibaliangan.

⁹Napurai to salian lembang tu kamawatanganna, apa tae’ nasa’dingi. Ondongpi nasitutu’imo uban, apa tae’ naissanni.

¹⁰Sia iatu matampona Efraim kendek dio tingayona titanan sa’bi umpasalai. Apa tae’ namengkatoba’ lako PUANG, Kapenombanna, sia tae’ nadaka’i tu Puang, moi narampoi te mintu’na apa iate.

¹¹Susi bang bu’ku’ baga tu Efraim, tae paissanna. Natambai tu Mesir la untundui, namaleo lako Asyur.

¹²Ianna male lako, la Kusalokko’i dalla’Ku tu tau iato mai. La Kutobangan tu tau iato mai susi manuk-manuk dao mai langi’. Ianna marekomo tu tuntunanna, Kutingkanmi.

¹³Upu’ allona tu tau iato mai, belanna male umboko’iNa’! Sumpu sumandakna, belanna sepangmo dio mai Kaleku. Moi mangkamo Kurampanan, tontong duka ma’kada mo’rang lako Kaleku.

¹⁴Tae’ duka nadio mai penaanna tu tau iato mai metamba lako Kaleku, ke sumarroi dao patindoanna. Natori’-tori’ piso tu kalena umpalaku gandung sia uai anggoro’ ba’ru; pabali-bali tongan tu tau iato mai lako Kaleku.

¹⁵Moi Kuada’i sia Kupamawatang tu takia’na, apa nenne’ bang untangnga’ kadake unneaNa’.

¹⁶Messaile sia tu tau iato mai, apa tae’ nalu langngan; butungi to misa’ pana disanga melo, apa tae’mo gai’na. Iatu mai arungna la tibambang nakande pa’dang natumang kada layukna. Dionamo to nanii tau ullo’boi lan lu tondok Mesir.