Read Toraja-Sa'dan HOSEA 9 Bible Online

HOSEA 9 - Toraja-Sa'dan bible

HOSEA 9

¹Da musende-sende, e Israel, ammu mela’tek-la’tek, susi mintu’ bangsa, belanna sorong boko’moko dio mai Kapenombammu sia pasandak salu lako rampanan kapa’, ammu kamorai saro gau’ sala dao lu mintu’ panglulluran gandung.

²Iatu panglulluran sia pa’parran anggoro’ tae’mo nala umpabu’tuanni tu apa dikande sia diiru’ sia la napakenamo uai anggoro’ ba’ru.

³Tae’mo nala torro lan tondok PUANG tu tau iato mai, sangadinna iatu Efraim la sule lako Mesir, sia la ungkande apa tang masero dio lu Asyur.

⁴Tae’ anna untedokan uai anggoro’ PUANG tu tau iato mai, sia tae’ anna alai penaanNa Puang tu pemala’ pangrere’na; disanga kande ro’ lako kalena tau iato mai; mintu’ tau tu ungkandei urruttakki kalena, belanna iatu roti iato la napokandena siamo, sia tae’ anna ma’din dibaa tama banuanNa PUANG.

⁵Apara la mipogau’, ke allo kapua sia iake allo pa’gauranNa PUANG?

⁶Belanna, moi anna tilendok dio mai kasanggangan, la narampun duka Mesir, sia la napeliang Memfis. Ria la ussitutu’i tu ianan salakana sia duri la tuo lan lu tendana.

⁷Saemo tu allo kadiukungan, saemo tu allo pa’papakkan. La naperasai to Israel te iannate. Iato nabi iato baga sia iatu to natamai penaa bomboan, napobua’ kakapuanna kakadakeammu sia belanna kakapuanna tu kamabirisan.

⁸Iatu to ma’kampana Efraim dio oloNa Kapenombangku, iamo nabi — misa’ poyana to ma’poya dio mintu’ lalanna, sia kamabirisan lan banuanNa Kapenombanna.

⁹Lendu’ ia kadakena penggauranna, susi lan allona Gibea: La Nakilalai Puang tu kakadakeanna sia la Naukung tu kasalanna.

¹⁰Kukabu’tuimo tu Israel susi bua anggoro’ dio padang pangallaran; iatu nene’ to dolomi Kutiro susi bua ara bunga’, iamotu pamulanna dio garonto’ ara. Apa tau iato mai male lako Baal-Peor, sia mengkaola lako deata mesirisan; iamoto megallian tu tau iato mai susitu apa nakamali’.

¹¹Iatu kamala’biranna Efraim la mettia’ male susi manuk-manuk; tae’mo tau la dadi, tae’mo tau la ma’tambuk, iatu inan tau tang la kasampean.

¹²Moi umpelobo’i pia muane tu tau iato mai, la Kupasisayuran, naurunganni moi misa’ tau tae’mo torro. Manassa upu’ allona tu tau iato mai, ke untoyangammo’ Kaleku dio mai.

¹³Iatu Efraim, susitu mangka Kutiro, butung Tirus, tu ditanan lan misa’ pa’lak; apa totemo inang la nasorong Efraim tu anakna lako to papatean.

¹⁴Benni tau iato mai, o PUANG, tu sipatunna la Mibenni: benni tau iato mai tu inan tau tang kasampean sia susu tang sekka’.

¹⁵Mintu’ kakadakeanna sirampun dio Gilgal, iamoto inde dukato dio Kunii ungkabiri’i tu tau iato mai; belanna penggauran kadakena, angKu la unnula’i lan mai banuangKu. Sia tae’mo angKu kamasei; mintu’ arungna pabali-bali nasang.

¹⁶Iatu Efraim dipandasamo sia marangkemo tu daka’na; tae’mo anna la membua. Ianna la kianakpa, manassa la Kupatei tu sun dikalena tu napakaboro’.

¹⁷La Natibe Kapenombangku tu tau iato mai, belanna tae’ naperangii; iamoto anna salamba salao dio lu mintu’ bangsa.