Read Toraja-Sa'dan YOËL 1 Bible Online

YOËL 1 - Toraja-Sa'dan bible

YOËL 1

¹Inde sia tu kadanNa PUANG tu rampo lako Yoël, anakna muane Petuel.

²Perangiimi, e mintu’ pekaamberan, sia tananni talinga, e mintu’ pa’tondokan! Kela den lenni nadadi tu apa susite tonna attummi, ba’tu iatonna linona nene’ to dolomi.

³Uleleananni tu apa iate lako mintu’ anakmi; sia iatu anakmi la naulelean duka lako anakna sia anakna tau iato mai la ullelean pole’oi lako bati’ siosso’na.

⁴Iatu apa nasesa batik pa’benga’, nakande batik pa’kande; iatu apa nasesa batik pa’kande’ nakande batik pa’ampello’; iatu apa nasesa batik pa’ampello’ nakande batik pa’kasopu.

⁵Pana’dingkomi, e to pa’malangoan ammi tumangi’, sia sumarrokomi, e pangiru’ uai anggoro’ diona uai anggoro’ ba’ru, belanna disintakkimo dio mai pudukmi.

⁶Belanna ke’de’mo male tu misa’ bangsa la ullaoi tu padangKu, misa’ bangsa matoto’ sia tang dikemba’ budanna; iatu isinna susi isi singa sia iatu torana susi tora singa birang.

⁷Iatu garonto’ anggoro’Ku napopendadi apa megiangan sia kayu araKu nasa’pek-sa’pek, napekuli’i tu mintu’ pa’pakna sia natibe; iatu mai tangkena sibusammo.

⁸Sumarroko butung misa’ anak dara ma’karoro’ belanna sikampanna tonna mangura.

⁹Iatu kande dipemalaran sia pemala’ pantedok dialai dio mai banuanNa PUANG; iatu mintu’ to minaa, iamo tu to untoe pentoeanNa PUANG rossomo penaanna.

¹⁰Sanggangmo tu pa’lak; makarorrongmo tu padang, belanna mangsan nasangmo tu gandung, ma’timo tu uai anggoro’ ba’ru sia meremo tu minna’.

¹¹Bangngo ara’na tu mintu’ to lako padang sia sumarro tu mintu’ to ma’palak anggoro’ diona gandung sia dalle sisikan, belanna iatu bura padang tallanmo.

¹²Marangkemo tu garonto’ anggoro’ sia malayumo tu garonto’ ara; iatu garonto’ dalima sia ia duka tu garonto’ koroma sia garonto’ appel, mintu’ kayu dio padang malayu nasangmo. Tonganna masiri’mo tu kaparannuan, anna mallai dio mai ma’rupa tau.

¹³Ma’tambeke’komi sia unnurrukkomi, e kamu mintu’ to minaa; sumarrokomi e mintu’ to untoe pentoean dio inan pemalaran; maikomi ammi ma’bongi ma’pote dibolong, e kamu to untoe pentoeanna Kapenombangku, belanna iatu kande dipemalaran sia pemala’ pantedok dipatoyang dio mai banuanNa Kapenombammi.

¹⁴Pamaindanni tu misa’ allo pa’puasan, pasirampunni tu misa’ kasirampunan kamenomban; e kamu pekaamberan, rampunni tu mintu’ tau lan tondok lako banuanNa PUANG, Kapenombammi sia metamba-tambakomi lako PUANG.

¹⁵A’a tu allo iato! Belanna mandappi’mo tu alloNa PUANG; saemo tu allo iato susi kasanggangan lu dio mai To umpoissan angge maritik.

¹⁶Tae’raka naka’tu tu mintu’ kande dio mai pentirota? Sia ka’tu dukamo tu kaparannuan sia la’tek lan mai banuanNa Kapenombanta.

¹⁷Mintu’ tu lise’ banne tikkurrungmo diong to’ apa’ litakna; mintu’ tu alang sanggang; mintu’ tu palipu’ tiserang-serangmo, belanna malayu nasangmo tu mintu’ gandung.

¹⁸A’a, tumbai sarrona tu mintu’ patuoan! Mintu’ tuntunan sapi male-male bang, belanna tae’mo padang kariuanna; sia ia duka tu mintu’ tuntunan domba mandasa.

¹⁹Lakori Kalemi, o PUANG, kunii metamba, belanna napoppongimo api tu kariuanna dio lu padang pangallaran, sia nalepa’i api tu mintu’ garonto’ kayu dio lu padang.

²⁰Ondongpi mintu’ olo’-olo’ dio lu padang mentingara langngan Kalemi ma’peagi, belanna ma’timo tu salu’-salu’ sia napoppongimo api tu kariuanna dio lu padang pangallaran.