Read Toraja-Sa'dan YOËL 2 Bible Online

YOËL 2 - Toraja-Sa'dan bible

YOËL 2

¹Pannonii tu napiri tanduk dao Sion, sia rembangi tu katto’-katto’ dao buntu maindanKu! La ma’parondo tu mintu’ pa’tondokan, belanna saemo tu alloNa PUANG. Belanna mandappi’mo!

²Iamotu misa’ allo kamalillinan sia kapi’tukan, misa’ allo saleburan sia lillinan parrak. Susi arrang allo berre’ ussamboi mintu’ buntu, susi dukamo to tu misa’ bangsa makamban sia mawatang. Tae’ lenpa susinna tempon dio mai sia tae’ dukamo nala den, ke attu undi sae lako osso’ situran-turan.

³Dio tingayona den tu misa’ api tontong ma’kande, nadio boko’na tu dukku api ma’pamampu’; iatu padang dio tingayona susi pa’lak Eden, sia dio boko’na padang lo’bang sanggang; moi misa’ duka apa tae’ natilendok dio mai kalena.

⁴Iatu rupanna susi darang sia ma’dondo-dondo susi darang dipatetta’.

⁵Mengkondong-kondong dao lu botto buntu susi kareta magaluntu’-luntu’, susito api sikane’tekan ungkande dalame, susito misa’ bangsa mawatang ma’pampang la parari.

⁶Iatu mintu’ bangsa ma’parondo dio tingayona, sia pa’de rupa tu mintu’ tau napobua’ kamatakuran.

⁷Susito pa’barani tu tau iato mai ma’dondo-dondo, susito parari ungkendekki rinding tembo’, anna male tarru’, pantan unturu’ lalanna, tae’ nasidoloan len.

⁸Tae’ nasisi’pin-si’pin tu tau iato mai, sangadinna pada tarru’ umpeloloi lalanna, sia moi den pa’buno lan lu tangnga tarru’ bang tu tau iato mai; tae’ napopa’elo’nai lo’bang tu tibangna.

⁹Nalaoi tu kota, anna ma’dondo-dondo dao rinding tembo’, tau iato mai unteka’ banua, anna tama pentiroan susi to boko.

¹⁰Dio tingayona tigega’ tu lino sia gumalugu tu mintu’ langi’: iatu mata allo sia bulan napamalotong sia mintu’ bintoen tae’ napasombo arrangna.

¹¹Napakapua PUANG tu gamaranNa, dio tingayona mintu’ surodadunNa, belanna lendu’ ia budanna tu surodadunNa; iatu surodadunNa mawatang umpalalo kadanNa; ondongpi iatu alloNa PUANG kapua sia tarru’ metakuran! Mindara ma’din la umpatananni?

¹²Apa moi totemo den dukapa tu kadanNa PUANG, Nakua: Palantuk tonganni tu penaammi mengkatoba’ lako Kaleku situang ma’puasa sia tumangi’ sia umbating.

¹³Sessei tu penaammi, da na iatu tamangkalemi sia mengkatoba’komi lako PUANG, Kapenombammi. Belanna sumpu mamase sia sa’pala buda tu Puang, kalando pesuka’ sia kapua kamasokananNa, sia Napenassanni tu diona kamandasan.

¹⁴Mindara unnissanni, den sia manii upa’ anNa sule sia menassan sia untampe pa’kamasean dio boko’Na, la dipokande dipemalaran sia pemala’ pantedok lako PUANG, Kapenombammi.

¹⁵Pannonii tu napiri tanduk dao Sion, pamaindanni tu misa’ allo pa’puasan, pasirampunni tu misa’ kasirampunan kamenomban.

¹⁶Rampunni tu bangsa, pamaindanni tu kombongan, pasipulungi tu mintu’ to matua, rampunni tu mai pia’-pia’ sia mintu’ pia ma’susupa, la tassu’ tu muane la diparampo lan mai bilikna sia iatu baine la di parampo lan mai katindoanna.

¹⁷Iatu mintu’ to minaa, iamo tu to untoe pentoeanNa PUANG, la tumangi’ lan kasiallaranna sarambi sia inan pemalaran, anna ma’kada nakua: Kasayangi tu taumMi, PUANG sia da Misa’bianganni tu taa mana’Mi la ditatta, naurunganni napoparumbasan to kapere’ tu tau iato mai. Ma’apai nala ma’kada tu mai tau dio lu mintu’ bangsa, nakua: Umbara tu Kapenombanna tau iato mai?

¹⁸Attu iato Napa’tunduammi PUANG tu tondokNa, sia Nakamasei tu taunNa.

¹⁹Mebalimi tu PUANG lako taunNa Nakua: Manassa la Kupasaeangkomi gandung, uai anggoro’ ba’ru sia minna’, ammi podia’i, sia tae’ lenmo Kula ussa’biangankomi natatta mintu’ bangsa.

²⁰Iatu to sae daa mai rampe daanna lu la Kurambai dio mai kalemi sia la Kuula’i lako misa’ padang marangke sia lo’bang, iatu diona tingayo ma’palulako tasik rampe matallo, na iatu dio boko’ ma’palulako tasik rampe matampu’, anna kendek tu bubosinna sia sumarombon tu bumappangna, belanna mangkamo umpogau’ apa kapua.

²¹Da mumataku’, e lipu daenan, mela’tekko sia parannu-rannuko, belanna mangkamo Napogau’ PUANG tu apa kapua.

²²Da mimataku’, e mintu’ olo’-olo’ dao lu padang, belanna iatu mai kariuan dio lu padang pangallaran maluna, belanna membuamo tu mai garonto’ kayu sia garonto’ ara sia garonto’ anggoro’ umpatassu’i tu kasebaranna.

²³E kamu, mintu’ to Sion, sila’tekangkomi sia parannu-rannukomi tete dio PUANG, Kapenombammi, belanna Nabenkomi to mangada’ lako kamaloloan, ondongpi Napasaeangkomi uran kamban, uran bunga’ sia uran tampak, susi dolona.

²⁴Mintu’ panglulluran la ponno gandung sia mintu’ pa’parran la lempan uai anggoro’ ba’ru sia minna’.

²⁵La Kubenkomi tu sondana bura padang lan mintu’ taun, nanii umpurai tu mintu’na nakande batik pa’kande, tu batik pa’ampello’, batik pa’kasopu sia batik pa’benga’, iamo tu surodadu kambanKu tu Kupasae lako kalemi.

²⁶La kumande seba’komi sadia’mi, ammi pudi-pudi sanganNa PUANG, Kapenombammi, tu umpogaurangkomi apa kalle-kallean; iatu taungKu tae’ lenmo nala dipakasiri’ sae lakona.

²⁷Attu iato la miissan kumua Akumo tu dio lu to Israel, sia Akumo tu Puang, Kapenombammi, tae’ senga’na; iatu taungKu tae’ lenmo na la dipakasiri’ sae lakona.

²⁸Undinna dio mai to la dadi kumua la untuaranNa’ PenaangKu lako mintu’ ma’rupa tau, anna ma’nubua’ tu anakmi muane sia anakmi baine; sia iatu mai to matua-tuammi la ungkita tindo ma’rupa-rupa tindo sia iatu mai to mangurammi la ungkita ma’rupa-rupa patiro mendeata.

²⁹Sia lako duka mintu’ kaunan muane sia kaunan baine la Kutuaran tu PenaangKu allo iato.

³⁰Sia la umpadenNa’ ba’tu pira-pira tanda kalle-kallean dao langi’ sia dao kuli’na padang, iamotu rara, api sia ba’tu pira-pira lentong rambu.

³¹Iatu mata allo la membali malillin sia iatu bulan la membali rara, to ke la saemi tu allo kapuanNa sia metakuranNa PUANG.

³²La dadi kumua minda-minda tu meongli’ ussa’bu’ sanganNa PUANG, iamo la dikarimmanni. Belanna dao buntu Sion sia dio Yerusalem la den katilendokan, susitu mangka Napokada PUANG; sia iatu naala bilanganna to tilendok, iamo la Natambai PUANG.