Read Toraja-Sa'dan YOËL 3 Bible Online

YOËL 3 - Toraja-Sa'dan bible

YOËL 3

¹Belanna manassa allo iato sia attu iato, ke Kupopembali tu dalle’na Yehuda sia Yerusalem,

²la Kurampun tu mintu’ bangsa, angKu solanni rokko lombok Yosafat, na inde to diong la Kunii urra’ta’i tu ukunganna tau iato mai belanna taungKu sia taa mana’Ku, iamo tu Israel, tu napatitale’ tau iato mai dio lu mintu’ bangsa, tonna taa-taai tu padangKu.

³Sia naloterei tu taungKu nataa-taa, sia misa’ pia muane napassaroan baine bualang, sia misa’ pia baine nabalukan belanna uai anggoro’, kumua nama’din mangiru’.

⁴Sia la siapariKi’, e Tirus sia Sidon sia mintu’ tondok lan lili’na tondok Filistin? La ma’papakkannirokomika lako Kaleku? Apa iake denni la mipapakkanni lako Kaleku, madoi’-doi’ duka la Kupasule tu pa’pakkan langngan ulummi.

⁵Belanna miala tu salakaKu sia bulaanKu sia mibaa tu ianan keangga’Ku tama banua pa’deatammi.

⁶Sia iatu to Yehuda sia to Yerusalem mibaluk lako to Yunani, la umpatoyangi tu tau iato mai dio mai lili’na.

⁷Manassa la Kupake’de’ tu tau iato dio mai minii umbalukki sia iatu pa’pakkanmi Kupasule langngan ulumi.

⁸La Kubaluk tu anakmi muane sia baine lako to Yehuda, na tau iato mai la umbalukki lako to Syeba; iamo tu misa’ bangsa mambela tondokna, belanna mangkamo Napokada PUANG.

⁹Petambanni te dio lu mintu’ bangsa. Pamaindanni tu rari, pake’de’i tu mintu’ to lalong; iatu mintu’ surodadu la ke’de’ male.

¹⁰Tampai pa’dang tu mintu’ tengko bassimmi sia tampai doke tu mintu’ sae’mi; la ma’kada tu to langga’ nakua: to lalongna’.

¹¹Ke’de’komi ammi sae, e mintu’ bangsa tiku lao, sia sirampunkomi. O PUANG, pasonglo’mi tu to lalongMi inde to rokko.

¹²La ke’de’ tu mintu’ bangsa sia male rokko lombok Yosafat, belanna inde to diong la Kunii unnisung la urra’ta’i ukunganna tu mintu’ bangsa tiku lao.

¹³Popa’ka’ta’mi tu pesae’, belanna matasakmo tu bura padang. Maikomi ammi manglullu’, belanna ponnomo tu pa’parran; iatu inan uai anggoro’ lempanmo. Belanna kapuamo tu kakadakeanna tau iato mai.

¹⁴Ma’tombon-tombon tu tau diong lombok pangra’tasan ukungan, belanna mandappi’mo tu alloNa PUANG diong lombok pangra’tasan ukungan.

¹⁵Iatu mata allo sia bulan la malotong sia iatu mintu’ bintoen tae’ napasombo arrangna.

¹⁶Iatu PUANG umburrung lan mai Sion sia umpa’perangian gamaranNa lan mai Yerusalem, naurunganni tigega’ tu langi’ sia lino. Apa PUANGmo tu misa’ pentilindungan lako taunNa sia misa’ kota tambakuku lako to Israel.

¹⁷Sia la miissan, kumua Akumo tu PUANG, Kapenombammi tu unnisung dao Sion, buntu maindanKu, sia Yerusalem la dadi misa’ inan maindan sia tae’mo nala unnolai lendu’ to tama sae.

¹⁸Allo iato la dadi kumua iatu mintu’ buntu umpato’do uai anggoro’ ba’ru sia mintu’ tanete la umpalolong uai pangandu’ sia mintu’ salu’-salu’ Yehuda la saba’ uainna; sia misa’ mata uai ma’kalimbuang-buang lan mai banuanNa PUANG sia la ussakka’i lombok Sitim.

¹⁹La mempadang lo’bang tu Mesir sia la mempadang pangallaran makarorrong tu Edom, belanna pa’pakario-rio tu napogau’ lako to Yehuda, sia belanna umpatibollo rara tang sala lan tondok to Yehuda.

²⁰Apa la tontong sae lakona tu Yehuda sia la manda’ disiosso’i tu Yerusalem.

²¹Sia la Kupamanassa, kumua iatu rarana tau iato mai tang sala, tu tae’pa Kupamanassai, kumua tang sala. Sia iatu PUANG la tontong unnisung dao Sion.