Read Toraja-Sa'dan AMOS 1 Bible Online

AMOS 1 - Toraja-Sa'dan bible

AMOS 1

¹Inde sia tu kadanna Amos, misa’i tu to umpatuo domba dio mai Tekoa, tu natiro diona to Israel tonna linona Uzia, datu Yehuda sia tonna linona Yerobeam, anakna Yoas, datu Israel, duang taun dolona, namane lino’.

²Inde sia tu kadanna, nakua: Iatu PUANG umburrung lan mai Sion sia umpa’perangian gamaranNa lan mai Yerusalem, naurunganni mario-rio tu padang kariuanna to mangkambi’ sia marangke tu botto Karmel.

³Inde sia tu kadanNa PUANG Nakua: Belanna tallu tu kapatodo-tintinganna Damsyik, ondongpi belanna a’pa’, iamoto natae’ Kula undampai to. Belanna mangka napalullu’i panglulluran bassi tu Gilead,

⁴iamoto angKu la umpasae api tama banuanna Hazael naurungan unnimbakanni tu mintu’ bentengna Benhadad.

⁵La Kule’to tu salli’na Damsyik sia la Kusabu’i tu pa’tondokan lan mai Bikeat-Awen sia iatu to untoe tekken kapayungan lan mai Bed-Eden, sia iatu pa’tondokanna Aram la dipali’ lako Kir, — kadanNa PUANG.

⁶Inde sia tu kadanNa PUANG Nakua: Belanna tallu tu kapatodo-tintinganna Gaza, ondongpi belanna a’pa’, iamoto natae’ Kula undampai to. Belanna mangkamo narampa tu mintu’ pa’tondokan anna sorongi lako Edom,

⁷iamoto angKu la umpasae api tama rinding tembo’na Gaza, naurungan unnimbakanni tu mintu’ bentengna.

⁸Sia la Kusabu’i tu pa’tondokan lan mai Asdod sia iatu tekken kapayungan lan mai Askelon, sia la Kubalik tu limangKu unta’pai Ekron, naurungan iatu mintu’ to Filistin tinampepa la sanggang, kadanNa Puangta PUANG.

⁹Inde sia tu kadanNa PUANG, Nakua: Belanna tallu tu kapatodo-tintinganna Tirus, ondongpi belanna a’pa’, iamoto natae’ Kula undampai to. Belanna mangkamo nasorong tu mintu’ pa’tondokan lako Edom sia tae’ nakilalai tu basse kasiuluran,

¹⁰iamoto angKu la umpasae api tama rinding tembo’na Tirus, naurungan unnimbakanni tu mintu’ bentengna.

¹¹Inde sia tu kadanNa PUANG, Nakua: Belanna tallu tu kapatodo-tintinganna Edom, ondongpi belanna a’pa’, iamoto natae’ Kula undampai to. Belanna naula’imo pa’dang lao tu siulu’na sia napa’deimo tu kamamaseanna, sia tete dio kasengkeanna, anna ma’kase’bu-se’bu bang sia unnanna bang kare’dekan ara’na,

¹²iamoto angKu la umpasae api tama Téman, naurungan unnimbakanni tu mintu’ bentengna Bozra.

¹³Inde sia tu kadanNa PUANG Nakua: Belanna tallu tu kapatodo-tintinganna to Amon, ondongpi belanna a’pa’, iamoto natae’ Kula undampai to. Belanna naballak tu baine ma’tambukna to Gilead, la umpakalua’ lili’na,

¹⁴iamoto angKu la umpadukkui api tu lanna lu rinding tembo’na Raba, naurungan unnimbakanni tu bentengna, naturu’ arrak ke attu kasirarian, sia ongngo’ angin bara’, ke attu talimpuru’;

¹⁵sia iatu datunna tau iato mai la male dipali’, la ia la iatu mintu’ arungna, — kadanNa PUANG.