Read Toraja-Sa'dan AMOS 2 Bible Online

AMOS 2 - Toraja-Sa'dan bible

AMOS 2

¹Inde sia tu kadanNa PUANG Nakua: Belanna tallu tu kapatodo-tintinganna Moab, ondongpi belanna a’pa’, iamoto natae’ Kula undampai to. Belanna natunumo tu bukunna datu Edom napadadi kapu’,

²iamoto angKu la umpasae api tama Moab, naurungan unnimbakanni tu bentengna Keriot; sia la mate tu Moab lan rukka kasirarian naturu’ arrak kasirarian sia oni tarompe’,

³sia la Kusabu’i tu to ma’parentana lan mai sia la Kupatei tu mintu’ arungna sola to ma’parentana, — kadanNa PUANG.

⁴Inde sia tu kadanNa PUANG Nakua: Belanna tallu tu kapatodo-tintinganna Yehuda, ondongpi belanna a’pa’, iamoto natae’ Kula umpasalai ukungan. Belanna natumpu tu Sukaran alukNa PUANG sia tae’ nakaritutui tu mintu’ apa Napondok Puang, sangadinna napapusamo deata mo’rangna tu naturu’mo nene’ to dolona,

⁵iamoto angKu la umpasae api lan Yehuda, naurungan unnimbakanni tu bentengna Yerusalem.

⁶Inde sia tu kadanNa PUANG, Nakua: Belanna tallu tu kapatodo-tintinganna Israel, ondongpi belanna a’pa’, iamoto natae’ Kula undampai umparampoi ukungan. Belanna ungkamorai doi’ anna balukanni tu to malambu’ sia nabalukan tu to bongko sangpasang sepatu.

⁷Nakaduangi ke nasamboi barra’-barra’ tu ulunna to bongko sia ulleko’ lalanna to tang pa’bela; sia misa’ tu pia muane sola ambe’na male ma’gau’ sala lako misa’ baine mangura, la umpamatuna sanga madatungKu.

⁸Umbambangan kalena mamma’ diong pakean ditoe dio to’ la’pekna mintu’ inan pemalaran sia unniru’ uai anggoro’na to didosa lan banuanna kapenombanna.

⁹Moi mangkamo Kusabu’i tu to Amori dio tingayona, moi anna pada lando kayu arasi’ sia pada buku kayu jati, ondongpi Kusabu’i tu buanna dao mai sia uaka’na diong mai.

¹⁰Sia mangkamokomi Kusolan lan mai tondok Mesir sia Kuanta’komi lan padang pangallaran patangpulo taunna, kumua ammi pomana’i tu tondok to Amori.

¹¹Na iatu anakmi muane Kupadadimo nabi, na iatu to mangurammi Kupadadimo nasiri. Tang susiraka to, e to Israel? KadanNa PUANG.

¹²Apa mipairu’mo uai anggoro’ tu mai nasiri sia mipokadan tu mai nabi, kumua da mima’nubua’.

¹³Manassa la Kupasikanetekan diong to’ lentekmi susito kareta sikanetekan len, ke ponnoi dao tu pa’kutu’ gandung.

¹⁴Attu iato iatu mai to malinta’ tang nabelamo umpallaian kalena, iatu to mawatang tang nakullemo umpalalo kamabukuanna sia tu to lalong tae’mo nakullei ullendokan sunga’na.

¹⁵Ia duka tu mai to ma’pana tang naattamo bendan sia to matipa lumingka tae’mo nalussu’ sia pakkanarang tae’mo nalendokan sunga’na.

¹⁶Ondongpi moi to barani tongan dio lu mintu’ to lalong la mallai tang ma’tamangkale attu iato, kadanNa PUANG.