Read Toraja-Sa'dan AMOS 4 Bible Online

AMOS 4 - Toraja-Sa'dan bible

AMOS 4

¹Tananni talinga te kada iate, e sapi Basan, tu untorroi buntu Samaria tu umpandasa to bongko sia umpakario-rio to mase-mase, tu ma’kada lako puangmi mikua: Benkanni angki mangiru’-iru’.

²Umposumpamo kamaseroanNa tu Puangta PUANG, Nakua: Tonganna, manassa narampoikomi attu, ke nariu’komi pekadang bassi langngan sia to torromipa la nariu’ pekan.

³Ammi tassu’ unnolai tembo’ ro’pok, pantan mentiro lako bang tingayo ammi diriu’ lako Hermon, kadanNa PUANG.

⁴Malekomi lako Betel, ammi pogau’ kadake, sia lako Gilgal — , ammi pamakamban kadakena! Pennoloanni tu pemala’mi, ke makale’ sia pa’taa sangpulomi, ke allo ma’pentallun.

⁵Padukkuanni api tu pemala’ pa’pudian dio mai roti diragii sia petambanni tu pemala’ tanning inaa sia pa’peissananni tu iannato! Belanna iamo pa’poraiammi to, e to Israel, kadanNa Puangta PUANG.

⁶Apa iatu Aku, Kubenkomi kamaseroan isi lan lu mintu’ kotami sia kapu’duran roti lan lu mintu’ inanmi. Moi susito, tae’ duka mimengkatoba’ lako Kaleku, kadanNa PUANG.

⁷Sia Aku duka, tae’mo Kubenkomi uran, tonna tallung bulanpa, namane pegandungan, Kubenmo uran tu misa’ kota, apa iatu kota senga’ tae’; iatu sangteppe’ pa’lak kauranan, na iatu senga’na, tu tae’ nato’doi uran, marangke.

⁸Iatu tau lan da’dua ba’tu tallu kota tipa’re’ba-re’ba male lako misa’ kota la unniru’ uai, apa tontong ma’rang. Moi susito, tae’ duka mimengkatoba’ lako Kaleku, kadanNa PUANG.

⁹Kuparampoimokomi kamalangkoan sia pasian tu mintu’ pa’lakmi sia pa’lak anggoro’mi Kupamalayu iatu kayu arami sia kayu saitunmi nakande batik pa’kande. Moi susito, tae’ duka mimengkatoba’ lako Kaleku, kadanNa PUANG.

¹⁰Kuparampoimokomi tu ropu, susi dio Mesir. Kupateimo pa’dang tu mintu’ to mangurammi, anna dirampa tu darangmi. Sia Kupasongngonnimo bubosi tu illongmi lan mai to’ tendami. Moi susito, tae’ duka mimengkatoba’ lako Kaleku, kadanNa PUANG.

¹¹Kubaliangammokomi susi Puang Matua umbaliangan Sodom na Gomora, ammi susi to lalotin disintak lan mai to’ api. Moi susito, tae’ duka mimengkatoba’ lako Kaleku, kadanNa PUANG.

¹²Iamoto la Kupasusi dukako to, e Israel. Belanna la Kupasusikoto, — la ma’parandanko la sitammu Kapenombammu, e Israel.

¹³Belanna tonganna Puangmo tu ungkombong buntu sia umpadadi angin, sia umpokadanni tolino tu apa lan penaanna, sia umpopemmalillinni tu arrang melambi’, sia unnola inan madao dao kuli’na padang — PUANG, Kapenombanna mintu’ ma’dandan maritik, iamoto tu SanganNa.