Read Toraja-Sa'dan AMOS 5 Bible Online

AMOS 5 - Toraja-Sa'dan bible

AMOS 5

¹Tananni talinga te kada la Kusaurangkomi, iamo misa’ bating, e bati’ to Israel:

²Iatu anak dara Israel songkamo, tang nakullemo milik sule, tipessambakmo rokko padangna, namoi misa’ tau tae’ umbangunanni.

³Belanna inde sia tu kadanNa Puangta PUANG: Iatu tau lan kota sun massa’bu, la saratu’mora tinampe, na iatu to sun ma’ratu’, la sangpulomora tinampe dio lu bati’na to Israel.

⁴Belanna inde sia tu kadanNa PUANG lako bati’na to Israel, Nakua: Daka’Na’, ammi tuo.

⁵Apa da midaka’ Betel, sia da mimale lako Gilgal, sia da mike’de lako Bersyeba. Belanna iatu Gilgal inang la male dipali’ sia iatu Betel la diputtai.

⁶Daka’i tu PUANG, ammi tuo, da narampoi bati’na Yusuf susi tu api ma’kande pu’pu’, anna tae’ misa’ tau untundui tu Betel umpa’deanni.

⁷O! tu to umpopembali apsantin tu kamalamburan sia umpentibean kamaloloan rokko padang.

⁸Puangmo, tu ungkombong Bunga’ sia Orion. Puangmo tu umpopembali malillin dadi arrang melambi’, sia umpamalillin masiang dadi bongi; Puangmo, tu unnongli’ uai tasik, anNa patibarrakki dao kuli’na padang — PUANG iamo to tu sanganNa.

⁹Puangmo, tu umpata’pai kasanggangan tu kota ditambakuku, naurunganni narampoi kasanggangan tu benteng.

¹⁰Nakabiri’ tau iato mai tu tau untuntun apa tongan lan lu babangan sia natapa’ tu tau umpokada salunna.

¹¹Belanna ullullu’komi to bongko sia miparuku la umbenkomi pamengan, iamotu gandung, iamoto moi ammi bangun banua batu dipa’, tae’ duka ammi la unnii, moi ammi garagai pa’lak anggoro’ ballo, tae’ duka ammi la unniru’i tu uai anggoro’na.

¹²Belanna Kuissan, kumua tumbai budanna tu kapatodo tintingammi sia tumbai makambanna tu kasalammi; mipapussak tu to malambu’, ungkandekomi pappe’ sia mitumpu tu to mase-mase lan lu babangan.

¹³Iamoto nakappa tu to unnampui tangnga’ kinaa lan attu iato, belanna attu iate kadake.

¹⁴Daka’i tu melona, da na iatu kadakena, ammi tuo; ianna susito la Narondongkomi PUANG, Kapenombanna mintu’ ma’dandan maritik, susitu mipokada.

¹⁵Kabiri’i tu kadakena, kabarii tu melona, patunannangi tu salunna lan lu babangan, den sia manii upa’ anNa katuru-turui PUANG, Kapenombanna mintu’ ma’dandan maritik, tu to tinampena Yusuf.

¹⁶Iamoto, inde sia tu kadanNa PUANG, Kapenombanna mintu’ ma’dandan maritik, iamotu Puang, nakua: Dio lu mintu’ tana lapang nanii tau umbating, sia dio lu mintu’ batatta ma’kada tu tau nakua: A’a, a’a! Natambai tau tu to ma’pa’lak anna ma’pote dibolong sia nakua lako to manarang umbating: la unnurruk-urrukkomi.

¹⁷Ondongpi la umbating tu tau lan lu mintu’ pa’lak anggoro’, ke lendu’Na’ lan lu tangngami — kadanNa PUANG.

¹⁸Upu’ allona tu to ungkabarii alloNa PUANG. La matumbari tu alloNa PUANG lako kalemi? Iamo kapittukan, tangia kamasiangan!

¹⁹Susi, ke den misa’ tau mallai dio mai singa, la nadammak beruang; iake rampomi lako banuanna, anna merremme’ lako rinding tembo’ la natotokki ula’.

²⁰Inang la kapittukan tu alloNa PUANG, tangia kamasiangan, ondongpi la malillin, tae’ naparrang.

²¹Kukabiri’ sia Kupamatuna tu pa’gaurammi sia tang Kuporai unnudukki tu bau allo kapuammi.

²²Ondongpi, moi ammi pennoloan pemala’ ditunu pu’pu’ lako Kaleku, sia kande dipemalarammi, tae’ kuporai sia iatu pemala’ kasalamarammi, iamotu sapi malompo inang tae’ duka Kula untiroi.

²³Patoyangi dio mai Kaleku tu arrak naniammu, tae’ Kuporai urrangii tu oni dandimmu.

²⁴Sangadinna iatu salunna la tikalulun-lulun susi uai sia iatu kamaloloan susi salu’-salu’ tontong lolong.

²⁵Mipennoloammoraka tu pemala’ pangrere’ sia kande dipemalaran lako Kaleku lan padang pangallaran patangpulo taunna, e bati’ Israel,

²⁶sia mibulle dukaraka tu Sakut, datummi sia Kewan, bintoen mipa’deatainna, iamo rapang-rapang dipodeatammi tu mangka migaragai?

²⁷Iamoto la malekomi Kupali’ — ullendu’i Damsyik — kadanNa PUANG, Kapenombanna mintu’ ma’dandan maritik, iamoto tu sanganNa.