Read Toraja-Sa'dan AMOS 6 Bible Online

AMOS 6 - Toraja-Sa'dan bible

AMOS 6

¹Upu’ allona tu to tang matangkin dao Sion sia ussa’ding kalena marampa’ dao buntu Samaria, to la’bi’na bangsa ditonno’ dio lu mintu’ bangsa, tu nanii to Israel rampo mengkanorong.

²Malekomi lako Kalne, ammi tiroi, sia ammi ke’de’ inde to dio mai lako Hamat kapua, ammi solo’ rokko Gat, lili’na to Filistin. Mandu meloraka to na iate kadatuan iate, mandu kalua’raka tu lili’na na iatu lili’mi?

³E kamu, tu ussangai mambelapa tu allo kamandasan, sia umpamareke’ kadera pa’pakario-rio.

⁴E kamu, tu matindo dao inan katindoan gading, sia melundan-lundan dao bale-balemi, sia ungkande anak domba dio mai tuntunan domba sia anak sapi lan mai lantang sapi.

⁵Tu unnarrak-arrak unturu’ oni dandi sia ma’tangnga’-tangnga’ unggaragai oni-onian, susi Daud.

⁶Tu unniru’ uai anggoro’ lan mai balubu sia umperruda’ minna’ tu mandu melo, apa tae’ mipalan penaai tu karo’pokanna Yusuf!

⁷Iamoto totemo la male dipali’ tu tau iato mai dio tingayona mintu’ to dipali’, sia la upu’ tu arrakna to kasode-sode.

⁸Iatu Puangta PUANG mangkamo umposumpa Kalena, KadanNa PUANG, Kapenombanna mintu’ ma’dandan maritik, Nakua: Kukagallimo tu kamatampoanna Yakub sia Kukabiri’mo tu tongkonan layukna; ondongpi la Kusa’biangan tu kota iato sola mintu’ apa lan.

⁹Attu iato, iake den sangpulo muane torro lan misa’ banua, — la mate.

¹⁰Iake naangka’i pa’amberanna, ba’tu iatu to untunui, la umpatassu’i tu bukunna lan mai banua iato, la ma’kada lako tu to dio boko’ banua lanna lu, kumua: Denparaka tau iti’ misolan? Mebalimi nakua: Tae’mo! Ma’kadami nakua: Kappakomi! Belanna tae’ tasipatu ussa’bu’ sanganNa PUANG diona te.

¹¹Belanna manassa PUANG umpasun parenta — anna dipopendaun lauan tu banua kapua sia diro’pok tu banua bitti’.

¹²Ma’dinraka tu mai darang ma’dondo dao lu buntu batu ba’tu ma’dinraka tu tasik natengko tau sapi? Apa kamu umpopembali rasunni tu salunna sia umpopembali apsantinni tu kamalamburan?

¹³E kamu, tu umposende Lodabar, tu ma’kada kumua: Tang kamatotorantaraka anta taloi tu Karnaim?

¹⁴Belanna tonganna la Kupake’de’ ullaoikomi, e bati’ Israel, kadanNa PUANG, Kapenombanna mintu’ ma’dandan maritik, tu misa’ bangsa, la umpandasakomi randuk dio mai lalan lako Hamat sae lako salu’-salu’ Araba.