Read Toraja-Sa'dan AMOS 7 Bible Online

AMOS 7 - Toraja-Sa'dan bible

AMOS 7

¹Susite tu apa Napatiroanna’ Puangta PUANG, iamotu umpadadi batik, tonna randuk tuo tu riu tuo undi. Manassa iamoto tu riu tuo undi, tonna mangka disasaran datu tu riu tuo dolo.

²Iatonna sidi’mora anna imbakan nasangi tu apa tuo diong mai padang, ma’kadamo’ kukua: O Puangta PUANG, pagarri’mi! Umbara nakua tu Yakub ungkullei torro bendan, belanna bitti’?

³Napenassannimi PUANG tu iannato. Tae’ anna la dadi tu iannato, kadanNa PUANG.

⁴Susite tu apa Napatiroanna’ Puangta PUANG: Manassa untambai api la umpalalo ukungan. Api iato napamarangke tu uai kapua sia la nakande duka tu pa’pa’lakan.

⁵Apa ma’kadamo’ kukua: O Puangta PUANG, paradanmi! Umbara nakua tu Yakub ungkullei torro bendan, belanna bitti’?

⁶Napenassannimi PUANG tu iannato. Tae’ duka anna la dadi tu iannato, kadanNa Puangta PUANG.

⁷Susite tu apa Napatiroanna’ Puang, iamotu bendan tu Puang dio to’ rinding tembo’ malolo, sitangke batu petimbang.

⁸Attu iato ma’kadami tu PUANG lako kaleku Nakua: Apara mutiro, e Amos? Ma’kadamo’ kukua: Misa’ batu petimbang. Ma’kadami tu Puang Nakua: La Kupalako taungKu, to Israel, tu batu petimbang; tae’mo Kula ullendu’i lenni.

⁹Sangadinna iatu inan madaona Ishak la disanggangi sia iatu mai inan maindanna Israel la diro’pok, sia la ke’de’Na’ unnukungi tu bati’na Yerobeam la umparampoi pa’dang.

¹⁰Ta’kala mesuami tu Amazia, to minaa dio Betel mennolo lako Yerobeam, datu Israel, nakua: Iatu Amos umpaden misa’ kasipakulu-kuluan la unneakomi dio lu mintu’ to Israel; tae’mo nabelai tondok la umpassanni tu mintu’ kadanna.

¹¹Belanna susite tu kadanna Amos nakua: Iatu Yerobeam la mate nakande pa’dang sia iatu to Israel manassa la male dipali’ lan mai tondok —

¹²Undinnato ma’kadami tu Amazia lako Amos nakua: E to patanda-tandan! mallaiko madoi’ lako tondok Yehuda; inde to dio la munii ungkande roti sia ma’nubua’.

¹³Apa dio Betel da’mo muma’nubua’, belanna iate inan iate inan maindanna kadatuan sia inan kemenombanna tondok.

¹⁴Mebalimi tu Amos lako Amazia nakua: Tangiana’ nabi sia tangiana’ anak nabi sangadinna misa’na’ to manglaa sia to ungkaduttu’ bua ara pangala’.

¹⁵Apa Naalamo’ PUANG dio mai boko’ domba, sia ma’kada tu PUANG lako kaleku, Nakua: Maleko ammu ma’nubua’ diona ukungan diparampo lako taungKu Israel.

¹⁶Iamoto, perangii tu kadanNa PUANG. Ma’kadako mukua: Da muma’nubua’ diona ukungan diparampo lako Israel sia da mupalolong kada diona ukunganna bati’na Ishak.

¹⁷Iamoto inde sia tu kadanNa PUANG Nakua: Iatu bainemu la pasandak salu lako rampanan kapa’ lan lu kota, iatu anakmu muane sia anakmu baine la songka nakande pa’dang, sia iatu pa’lakmu la ditaa-taa ulang pesuka’, na iko kalena la mate dio to’ padang tang masero, sia iatu to Israel manassa la male dipali’ lan mai tondokna.