Read Toraja-Sa'dan AMOS 8 Bible Online

AMOS 8 - Toraja-Sa'dan bible

AMOS 8

¹Susite tu apa napatiroanna’ Puangta PUANG: Tiroi, den misa’ baka ponno bua matasak.

²Ma’kadami tu Puang, Nakua: Apara mutiro, e Amos? Mebalimo’, kukua: Den misa’ baka ponno bua matasak. Ma’kadami tu PUANG lako kaleku, Nakua: Nalambi’mo tu ma’katampakanna Israel, taungKu, Tae’mo Kula ullendu’i lenni.

³Allo iato iatu mintu’ nanian lan Banua Kabusungan la membali kasumarroan, kadanNa Puangta PUANG. La makamban tu batang rabuk. Umba-umba nii Puang tu umpasilentenanni. Kappakomi.

⁴Tananni talinga te, e kamu to masa’ga’ lako to mase-mase, la umbala’-bala’ to bongko lan tondok,

⁵tu ma’tangnga’-tangnga’ kumua: Sangapapira nalendu’ tu bulan ba’ru, angki ma’din umbalukan gandung sia allo katorroan, angki ma’din umpatassu’ gandung dibalukan; angki pabitti’i tu epa sia umpakapua sikele’ sia ma’pakena umpake timbangan tang tongan,

⁶kumua angki ma’din unnalli doi’i tu to bongko sia angki allii sangpasang sepatu tu to mase-mase; angki balukan ta’pian sondana gandung!

⁷Umposumpa kamala’biranna Yakub tu PUANG Nakua: Tonganna tae’ Kula ungkalupai sae lakona moi misa’ tu penggauranna tau iato mai.

⁸Tang bannang dionaraka mintu’na te, anna tiseno te lino, naurunganni ma’pote dibolong tu mintu’ tau untorroi? Tang kendek nasangraka susi Nil sia tise’go’, sia mere sule susi salu Mesir?

⁹Allo iato, kadanNa Puangta PUANG, la Kupopentilindung tu mata allo, ke matangngai allo, sia la Kupapittuk tu padang, ke kulla’i allo.

¹⁰Attu iato la Kupopembali passanda bolong tu mintu’ pa’gaurammi sia la Kupopembali bating tu mintu’ naniammi. Attu iato la Kupatambeke’i nasangkomi sanda bolong sia la Kupopa’galettung tu mintu’ ulu. Iatu kapassanda-bolongan la Kupabutung sanda-bolong diona anak tungga’ sia iatu ma’katampakanna la susi allo nanii kamaparrisan.

¹¹La rampo tu allo, kadanNa Puangta PUANG, ke la umpasaeNa’ karorean lan tondok — tangia karorean roti sia tangia kama’rangan la unniru’ uai, sangadinna kalaurrangiannari mintu’ kadanNa PUANG.

¹²Attu iato la salamba salao tu tau iato mai ullelei tasik, sia ma’lele-lele daa mai rampe daanna lu sae lako rampe matallo, la undaka’ kadanNa PUANG, apa tae’ nala unnappa’i tau iato mai.

¹³Attu iato iatu mai anak dara ballo sia pia muane mawatang la langga’ belanna ma’rang,

¹⁴tu umposumpa kasalanna Samaria, sia ma’kada: La lelukraka tuona kapenombammu, e Dan!, sia: La lelukraka tuona kalingkan lako Bersyeba! Tonganna la songka tu tau iato mai sia tae’mo nala bendan sule.