Read Toraja-Sa'dan AMOS 9 Bible Online

AMOS 9 - Toraja-Sa'dan bible

AMOS 9

¹Kutiromi tu Puang bendan sikandappi’ inan pemalaran, anNa ma’kada, Nakua: Pa’tongi tu parande lentong, naurungan tigoyang tu ampang, sia tessei anna ruai tu ulunna mintu’ tau iato mai; na minda-minda tu torronapa la Kupatei pa’dang. Moi misa’i tu tau iato mai tae’ nala lussu’, sia moi misa’i tu tau iato mai tae’ nala tilendok.

²Moi anna kali tau iato mai sae rokko lino to mate, la naala duka limangKu inde to diong mai; moi kendek langngan langi’, la Kupopengkalao duka inde to dao mai.

³Sia iake la messu’bui dao botto Karmel, manassa Aku la umparessai sia la unnalai inde to dio mai, moi umbuni kalena dio mai pentiroKu diong salinna tasik, manassa la Kusua tu misa’ ula’ inde to dio mai untotokki.

⁴Sia iake malei dipali’ tu tau iato mai dio tingayona mintu’ ualinna, manassa la Kusua tu pa’dang inde to dio mai umpatei. Sia Kupatontongi matangKu tu tau iato mai la napokadakena, tangia la napomelona.

⁵Tonganna tu Puang, iamo PUANGna mintu’ ma’dandan maritik, tu ungkaka’ kuli’na padang, anna tigega’, naurunganni iatu mintu’ tau untorroi sumarro-marro, sia kendek susi Nil sia mere sule susi salu Mesir,

⁶tu umpabendan bilik mengkadaoanna dao langi’ sia unnoton bilik massaloko’na dao kuli’na padang, tu unnongli’ uai tasik, anna patibarrakki dao kuli’na padang — PUANG iamoto tu sanganNa.

⁷Tae’raka mipada to Etiopia lako Kaleku, e to Israel? kadanNa PUANG. Tae’raka kumangkamo ussolanni tu to Israel sun lan mai tondok Mesir sia to Filistin dio mai Kaftor sia to Aram dio mai Kir?

⁸Tonganna iatu matanna Puangta PUANG unneai te kadatuan kasalan iate, kumua angKu pisanni dao mai kuli’na padang. Moi nasusito, tae’ duka Kula ussanggangi nasangi tu bati’na Yakub, kadanna PUANG.

⁹Belanna manassa la mesuaNa’, sia la kuseno tu bati’na Israel dio lu mintu’ bangsa, susi to usseno benoan, anna moi sanglise’ batu’-batu’ tae’ la tobang rokko padang.

¹⁰Mintu’ tu to kasalan dio lu taungKu la mate nakande pa’dang, tu ma’kada nakua: Da mipopengkareke’i tu kasanggangan sia da mipasitammukan tu iannato.

¹¹Allo iato la Kupabendan sule tu lantangna Daud, tu robokmo, sia la Kupasule tu rassakna, sia la Kupabendan sule tu ro’pokna; la Kubangun sule susi to dolona,

¹²kumua anna iatu Edom torronapa la napomana’ sia iatu mintu’ bangsa, tu dinii ussa’bu’ sangangKu, kadanNa PUANG, tu umpogau’i te apa iate.

¹³Tonganna la sae tu allona, kadanNa PUANG, kumua to ma’tengko la ussonda to megandung sia to manglullu’ bua anggoro’ ussonda to mangambo’ banne; attu iato iatu mintu’ buntu la umpato’do uai anggoro’ ba’ru sia mintu’ tanete la seba’ uai anggoro’ ba’ru.

¹⁴Sia la Kupopembali tu dalle’na Israel, taungKu: anna bangunni tau iato mai sule tu mintu’ kota sanggang, anna pa’tondokki, sia la untanan garonto’ anggoro’ anna iru’i tu uai anggoro’na, sia la unggaragai pa’lak, nanii kayu membua, anna kandei tu buanna.

¹⁵Attu iato la Kutanan tu tau iato mai lan lu padangna, sia tae’mo nala dilampi’i len lan mai padang, tu mangka Kukamaseanni, kadanNa PUANG, Kapenombammu.