Read Toraja-Sa'dan YUNUS 1 Bible Online

YUNUS 1 - Toraja-Sa'dan bible

YUNUS 1

¹Saemi tu kadanNa PUANG lako Yunus, anakna Amitai, nakua:

²Ke’de’ko ammu male lako Niniwe, tu kota kapua ammu pokadanni tu kamandasanna, belanna iatu kakadakeanna kendekmo dio oloKu.

³Apa iatu Yunus ke’de’ la mallai lako Tarsis dio mai oloNa PUANG, anna male lako Yafo, nakabu’tui tu misa’ kappala’, tu la ke’de’ lako Tarsis; nabaya’mi tu sewana, anna kendek langngan kappala’ sola to ma’kappala’ la male lako Tarsis, la umpatoyang kalena dio mai oloNa PUANG.

⁴Apa Napasae PUANG tu angin bara’ dao tasik, anna ma’pamumbuk lan tasik, naurungan iatu kappala’ sidi’mora nasabu’.

⁵Mataku’mi tu mintu’ to ma’kappala’ sia pantan metamba lako deatanna, sia iatu apa nabaa kappala’ napembuangammo rokko tasik la umpamaringanni tu kappala’. Apa iatu Yunus mengkalaomo rokko sulluk kappala’, anna bambangan kalena diong sia leppeng mamma’.

⁶Saemi tu kapiteng kappala’ umpellambi’i, nama’kada lako nakua: Ma’apai mileppeng bang mamma’! Millikkomi, ammi metamba lako deatammi, nakilalai siaki’ manii tu deata iato, da anta sanggang.

⁷Sipa’kada-kadami tu tau iato mai, nakua: Maikomi anta ma’loterei, anta issanni, kumua minda napobannang anna rampoiki’ te kasanggangan iate. Ma’lotereimi anna Yunus tu narua.

⁸Ma’kadami tu tau iato mai lako Yunus, nakua: Pokadangkanni kumua minda napobannang anna rampoiki’ tu kasanggangan iate, apara tu pengkarangammi, umbara minii sae, tondok apara tu minii sia mindara tu bangsami?

⁹Ma’kadami lako tau iato mai nakua: Iate aku te to Ibrani sia umpenombaina’ PUANG, Kapenomban dao suruga, tu mangka ungkombong tasik sia karangkean.

¹⁰Mataku’ tonganmi tu tau iato mai, anna ma’kada lako, nakua: Apara tu mipogau’? Belanna naissan tau iato mai, kumua mallai dio mai oloNa PUANG, belanna napokadammo tu apa iato.

¹¹Mekutanami tu tau iato mai lako nakua: Apara la kigaurangkomi, anna rapa’ tu tasik sia tae’ napandasakan, belanna samasai-sainna, samongngo’-mongngo’na tu bombangna tasik.

¹²Mebalimi lako tau iato mai nakua: Angka’na’ mipembuanganna’ rokko tasik, manassa la rapa’ tu tasik sia tae’mo nala umpandasakomi. Belanna kutandai, kumua iatu angin ma’pamumbuk sae umpandasakomi natumang salaku.

¹³Apa iatu tau iato mai nabose tu kappala’ la napasule lako karangkean apa tang nakulle, belanna samasai-sainna samongngo’-mongngo’na tu tasik iato umpandasai.

¹⁴Attu iato metambami tu tau iato mai langngan PUANG, nakua: O PUANG, ke ma’dinni, da kisanggang diona penaanna te tau iate sia da Mipapassannikan tu rarana to tang kasalan, belanna Kamu, o PUANG, Mipogau’mo tu apa naala penaamMi.

¹⁵Naangka’mi tu tau iato mai tu Yunus, nabuangi rokko tasik, anna rapa’ tu tasik.

¹⁶Lendu’mi mataku’na tu tau iato mai lako PUANG, natunui tu pemala’ dipemalaran lako PUANG sia unnallu’ ba’tu pira-pira pangallonan.

¹⁷Belanna panglampakNa PUANG denmo misa’ bale kapua unnampello’i tu Yunus, anna torro tu Yunus lan tambuk bale iato tallung allo tallung bongi.