Read Toraja-Sa'dan YUNUS 3 Bible Online

YUNUS 3 - Toraja-Sa'dan bible

YUNUS 3

¹Saemi tu kadanNa PUANG tonna ma’penduanna lako Yunus, nakua:

²Ke’de’ko mumale lako Niniwe, kota kapua iato, ammu pa’peissananni tu pa’pakilala, la Kupokadangko.

³Ta’kala ke’de’mi tu Yunus, anna male lako Niniwe, unturu’ kadanNa PUANG, Iatu Niniwe misa’ kota kapua tongan, iatu lua’na kalingkan tallung allo.

⁴Naparandukmi Yunus ullingkai tu kota iato lan kalingkan sangallo, anna ma’pakilala sia ma’kada nakua: Patangpulopa allona nadisanggang-sanggang tu Niniwe!

⁵Napatonganmi to Niniwe tu Puang Matua, anna sangra’banan metamba, kumua anna ma’puasa tu tau, pantan ma’pakean karung randuk dio mai kapuanna sae lako bitti’na.

⁶Iatonna rampomo tu kada iato lako datu Niniwe, mengkalaomi tu datu dao mai isungan kapayunganna, nalossokki tu pakean kadatuanna, anna ma’pakean karung, anna unno’ko’ diong to’ barra’-barra’.

⁷Metambami tu tau sia ma’kada lan kota Niniwe tete dio parentana datu sola tu mai to kapuana, nakua: La tau la patuoan, la sapi ba’tu domba tang la ullepa’ kande, tang la unde’pa’ riu sia tang la unniru’ uai.

⁸Sangadinna iatu mai tau sola patuoan la ma’pakean karung sia la napemandui metamba-tamba lako Puang Matua sia la pantan mengkatoba’ dio mai lalan kadakena sia kamasa’garan tu dio limanna.

⁹Mindara unnissanni den sia manii upa’ natibalik tu Puang Matua sia menassan, anna pasalai penaa tu kasengkean dukkunNa, naurunganni tae’ anta sanggang.

¹⁰Iatonna tiromi Puang Matua tu penggauranna tau iato mai, kumua mengkatoba’mo dio mai lalan kadakena, Napenassannimi Puang Matua tu kamandasan, tu Napokada la Naparampo lako tau iato mai, sia tae’mo Napogau’i.