Read Toraja-Sa'dan KADIBILANGAN 1 Bible Online

KADIBILANGAN 1 - Toraja-Sa'dan bible

KADIBILANGAN 1

¹Ma’kadami tu PUANG lako Musa lan padang pangallaran Sinai, lan Tenda Kasitammuan, tonna allo bunga’na bulan ma’penduan lan taun ma’penduanna mangkanna tassu’ tu tau iato mai lan mai tondok Mesir, Nakua:

²Alai tu bilanganna mintu’ kasirampunan to Israel unturu’ pa’rapuanna sia rapunna, situru’ bilangan sanganna, iamotu mintu’ muane, simisa’-misa’i,

³randuk dio mai duangpulo taunna ba’tu la’bi, iamotu mintu’nato la lao parari lan Israel; iko sola Harun la unnia’i unturu’ tuntunan surodadunna.

⁴Anna tunduikomi misa’ tau ke simisa’oi suku, iamotu pekaamberan lan mintu’ rapunna.

⁵Inde sia tu sanganna muane la untunduikomi, iamotu dio mai Ruben disanga Elizur, anakna Syedeur;

⁶dio mai Simeon disanga Selumiel, anakna Zurisyadai;

⁷dio mai Yehuda disanga Nahason, anakna Aminadab;

⁸dio mai Isakhar disanga Netaneel, anakna Zuar;

⁹dio mai Zebulon disanga Eliab, anakna Helon;

¹⁰dio mai anakna Yusuf, iamotu dio mai Efraim disanga Elisama, anakna Amihud; dio mai Manasye disanga Gamaliel, anakna Pedazur;

¹¹dio mai Benyamin disanga Abidan, anakna Gideoni;

¹²dio mai Dan disanga Ahiezer, anakna Amisyadai;

¹³dio mai Asyer disanga Pagiel, anakna Okhran;

¹⁴dio mai Gad disanga Elyasaf, anakna Rehuel;

¹⁵dio mai Naftali disanga Ahira, anakna Enan.

¹⁶Iamoto tu la ditambai dio mai kasirampunan, iamotu arungna suku nene’na; iatu tau iato mai pekaamberan lan pa’rapuan to Israel.

¹⁷Attu iato natambaimi Musa sia Harun tu to disa’bu’ sanganna anna solanni,

¹⁸sia natambai ma’misa tu mintu’ kasirampunan tonna allo bunga’na bulan ma’penduan, pada bendan unturu’ pa’rapuan sia rapu, situru’ bilangan sanganna, randuk dio mai siduangpulo taunna ba’tu la’bi, simisa’-misa’i,

¹⁹susitu Napepasanan PUANG lako Musa. Anna bilangi lan padang pangallaran Sinai.

²⁰Iatu bati’na Ruben, pa’bunga’na Israel, iamotu, lanto mimi’na unturu’ pa’rapuanna sia rapunna, situru’ bilangan sanganna simisa’-misa’i, mintu’ muane, randuk dio mai siduangpulo taunna ba’tu la’bi, mintu’nato la lao parari,

²¹mintu’ tu iaranna suku Ruben patangpulo nnannan sa’bu llimaratu’.

²²Iatu bati’na Simeon, iamotu lanto mimi’na unturu’ pa’rapuanna sia rapunna situru’ bilangan sanganna simisa’-misa’i, mintu’ muane, randuk dio mai siduangpulo taunna ba’tu la’bi, mintu’nato la lao parari,

²³mintu’ tu iaranna suku Simeon limangpulo ngkasera sa’bu ntalluratu’.

²⁴Iatu bati’na Gad, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari,

²⁵mintu’ tu iaranna suku Gad patangpulo llima sa’bu nnannanratu’ llimangpulo.

²⁶Iatu bati’na Yehuda, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari,

²⁷mintu’ tu iaranna suku Yehuda pitungpulo nna’pa’ sa’bu nnannanratu’.

²⁸Iatu bati’na Isakhar, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.

²⁹Mintu’ tu iaranna suku Isakhar, limangpulo nna’pa sa’bu nna’pa’ratu’.

³⁰Iatu bati’na Zebulon, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.

³¹Mintu’ tu iaranna suku Zebulon limang pulo mpitu sa’bu nna’pa’ratu’.

³²Dio mai anakna Yusuf iamotu bati’na Efraim, iamotu mai lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’na to la lao parari.

³³Mintu’ tu iaranna suku Efraim patangpulo sa’bu llimaratu’.

³⁴Iatu bati’na Manasye, iamotu lanto mimi’na unturu’ pa’rapuanna sia rapunna, situru’ bilanganna sanganna, randuk dio mai siduangpulo taunna ba’tu la’bi, mintu’nato la lao parari.

³⁵Mintu’ tu iaranna suku Manasye tallungpulo ndua sa’bu nduaratu’.

³⁶Iatu bati’na Benyamin, iamotu lanto mimi’na unturu’ pa’rapuanna sia rapunna situru’ bilangan sanganna randuk dio mai siduang pulo taunna ba’tu la’bi, mintu’nato la lao parari.

³⁷Mintu’ tu iaranna suku Benyamin tallungpulo llima sa’bu nna’pa’ratu’.

³⁸Iatu bati’na Dan, iamotu lanto mimi’na unturu’ pa’rapuanna sia rapunna situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.

³⁹Mintu’ tu iaranna suku Dan annan pulona ndua sa’bu mpituratu’.

⁴⁰Iatu bati’na Asyer, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.

⁴¹Mintu’ tu iaranna suku Asyer patangpulo mmisa sa’bu llimaratu’.

⁴²Iatu bati’na Naftali, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.

⁴³Mintu’ tu iaranna suku Naftali limangpulo ntallu sa’bu nna’pa’ratu’.

⁴⁴Mintu’ tau iate naia’mo Musa sola Harun sia arung to Israel, sangpulo dua muane simisa’ ke sangrapuoi.

⁴⁵Iamote tu bilanganna to Israel, unturu’ rapunna randuk dio mai siduangpulo taunna ba’tu la’bi, iamotu mintu’nato la lao parari lan Israel,

⁴⁶iatu mintu’na tau iato annanratu’na ntallu sa’bu limaratu’ llimangpulo.

⁴⁷Apa iatu mintu’ to Lewi unturu’ suku nene’na tae’ naalai bilangan sola tau iato mai.

⁴⁸Belanna susimote tu kadanNa PUANG lako Musa, Nakua:

⁴⁹Ia manna tu suku Lewi tae’ mula umbilangi sia da’ mualai tu bilanganna dio lu mintu’ to Israel.

⁵⁰Sangadinna la mupatage’i to Lewi tu kema kasa’bian sia mintu’ pareanan sia mintu’ tu dipakena; anna tau iato umbullei tu kema sia mintu’ pareananna; sia la untoe pentoeanna dio sia ma’tenda untikui kema.

⁵¹Iake la dipake’de’mi male tu kema, anna rondonni to Lewi, sia iake la dipatorroi tu kema la napabendan to Lewi; apa minda-minda tu tang sipatu urreke’i la mate dipongko.

⁵²Iatu mintu’ to Israel la umpabendan tendana pantan dio to’ tendana sia banderana, situru’ tuntunanna.

⁵³Apa iatu mintu’ to Lewi la umpabendan tendana untikui kema kasa’bian, da’ narampoi kare’dekan ara’ tu kasirampunanna to Israel; iamoto anna kampai to Lewi tu kema kasa’bian iato.

⁵⁴Susimoto napogau’ tu to Israel susi tongan tu mangka Napepasanan PUANG lako Musa, tu napogau’.