Read Toraja-Sa'dan KADIBILANGAN 10 Bible Online

KADIBILANGAN 10 - Toraja-Sa'dan bible

KADIBILANGAN 10

¹Ma’kadami tu PUANG lako Musa, Nakua:

²Garagangko kalemu da’dua tarompe’ salaka; panggaraga pa’kombong la mugaragai, anna apa iato la mupake untambai ma’misa tu kasirampunan sia la umpake’de’i dio mai to’ tenda.

³Iake napannonii tau tu da’dua tarompe’ pissan dipamurru’, la sangsaean tu mintu’ kasirampunan lako kalemu, dio to’ ba’ba Tenda Kasitammuan.

⁴Iake napannonii tau tu misa’ tarompe’ pissan dipamurru’, la sangsaean tu mintu’ arung lako kalemu, iamotu pangulu suku to Israel.

⁵Iake mupannonii misa’ tanda, la ke’de’ tu mintu’ tuntunan, tu dio rampe matallona to’ tenda iato.

⁶Iake mupannonii tu tanda ma’penduan, la ke’de’ tu mintu’ tuntunan, tu dio rampe lo’na lu to’ tenda iato. La napannoni tau tu misa’ tanda, ke la ke’de’mi.

⁷Apa ianna ditambai sirampun tu kombongan, pissanri dipamurru’, apa iatu tanda tae’ na la dipannoni.

⁸Iatu anakna Harun, iamotu to minaa la umpannonii tu tarompe’; iamote tu misa’ atoran dipondokangkomi misiosso’i.

⁹Sia iake lankomi tondokmi, milao sirari tu uali urrussunkomi, attu iato la mipannoni tu tarompe’ misa’ tanda; tanda iato la umpakilalakomi dio oloNa PUANG, Kapenombammi, ammi dilendokan dio mai ualimmi.

¹⁰Susi dukato ke allo kaparannuammi, ke pa’maruasammi sia ke allo bunga’ sombona bulanmi, la mipannoni tu tarompe’ pissan dipamurru’, ke umpogau’komi pemala’ ditunu pu’pu’ sia pemala’ kasalamaran; iatu iannato la umpakilalakomi dio oloNa Kapenombammi: Akumo tu PUANG, Kapenombammi.

¹¹Iatonna taun ma’penduan, lan bulan ma’penduan, tonna allo ma’duangpulona bulan iato, tiangka’mi tu gaun dao mai Kema Kasa’bian.

¹²Attu iato ke’de’mi tu to Israel dio mai padang pangallaran Sinai unturu’ atoran dipamanassa, na iatu gaun torro bang lan padang pangallaran Paran.

¹³Iamote tu pamulanna nanii ke’de’ tu tau iato mai unturu’ parentaNa PUANG nalopian Musa.

¹⁴Iatu dolona ke’de’ iamotu banderana to’ tenda to Yehuda situru’ tuntunanna; na iatu pangulu tuntunan surodadunna Yehuda iamotu Nahason, anakna Aminadab.

¹⁵Iatu pangulu tuntunan surodadunna suku to Isakhar iamotu Netaneel, anakna Zuar.

¹⁶Iatu pangulu tuntunan surodadunna suku to Zebulon iamotu Eliab, anakna Helon.

¹⁷Namane dirondonni tu Kema anna ke’de’ tu mintu’ to Gerson sia to Merari umbullei tu Kema.

¹⁸Mangkato ke’de’mi tu banderana to’ tenda Ruben situru’ tuntunanna; iatu pangulu tuntunan surodadunna Ruben iamotu Elizur anakna Syedeur.

¹⁹Iatu pangulu tuntunan surodadunna suku to Simeon iamotu Selumiel, anakna Zurisyadai.

²⁰Iatu pangulu tuntunan surodadunna suku to Gad iamotu Elyasaf, anakna Rehuel.

²¹Namane ke’de’ tu to Kehat, tu umbulle pareanan maindan; dipabendanmi tu Kema, tonna tae’pa narampo tu tau iato.

²²Mangkato ke’de’mi tu banderana to’ tenda to Efraim situru’ tuntunanna: iatu pangulu tuntunan surodadunna Efraim iamotu Elisama, anakna Amihud.

²³Iatu pangulu tuntunan surodadunna suku to Manasye iamotu Gamaliel, anakna Pedazur.

²⁴Iatu pangulu tuntunan surodadunna suku to Benyamin iamotu Abidan, anakna Gideoni.

²⁵Iatu ma’katampakanna mintu’ to’ tenda ke’de’ iamotu banderana to’ tenda to Dan situru’ tuntunanna; iatu pangulu tuntunan surodadunna Dan iamotu Ahiezer, anakna Amisyadai.

²⁶Iatu pangulu tuntunan surodadunna suku to Asyer iamotu Pagiel, anakna Okhran.

²⁷Iatu pangulu tuntunan surodadunna suku to Naftali iamotu Ahira, anakna Enan.

²⁸Susimoto tu atoran diona kake’deranna to Israel situru’ tuntunanna. Ke’de’mi tu tau iato mai.

²⁹Ma’kadami tu Musa lako Hobab, anakna Rehuel to Midian, matusanna Musa, nakua: La malemokan lako to’ inan tu Napokadamo PUANG diona a’ganna susite kumua: Aku la ungkamaseangkomi; tamalemo sola, angki pogau’ kameloan lako kalemu, belanna PUANGmo umpokadai tu melona diona to Israel.

³⁰Apa mebalimi nakua: Tae’ angku male sola, sangadinna la sulena’ lako tondokku sia lako sangdadiangku.

³¹Ma’kadami Musa nakua: Da’ mutampekanni, belanna mutandai umba tu melona la tanii ma’tenda lan te padang pangallaran, angki pomata lalanko.

³²Iake sisolaki’ male, manassa iatu kameloan, tu Napogau’ PUANG lako kaleki, la kiparampo duka lako kalemu.

³³Ke’de’mi tu tau dio mai buntunNa PUANG, anna male lan kalingkan tallung allo, na iatu patti basseNa PUANG dolo dio tingayona tau iato mai la undakaranni inan kapelayoan.

³⁴Iatu gaunNa PUANG daona lu tau iato, ke masiangi, ke ke’de’i tu tau iato mai dio mai to’ tenda.

³⁵Iake ke’de’mi tu patti, ma’kadami tu Musa nakua: Ke’de’mokomi, o PUANG, kumua na iatu mintu’ ualimMi tisambo’-sambo’ sia iatu to ungkabiri’Komi mallai dio mai oloMi.

³⁶Na iake torromi, ma’kadami nakua: SulemoKomi, o PUANG, lako ma’pulo sa’bunna dio lu to Israel ma’sa’bu-sa’bu.