Read Toraja-Sa'dan KADIBILANGAN 12 Bible Online

KADIBILANGAN 12 - Toraja-Sa'dan bible

KADIBILANGAN 12

¹Iatu Miryam sola Harun unta’tan Musa diona baine to Kush tu napobaine, belanna napobainemo tu misa’ baine to Kush.

²Ma’kadami sola duai nakua: Tete dio mannaraka pudukna Musa tu PUANG ma’kada, tae’ dukaraka natete dio kami anNa ma’kada tu Puang? Narangimi PUANG te kada iate.

³Iatu Musa iamoto mandu malamma’ penaanna, losong na iatu mintu’ tau dao kuli’na padang.

⁴Ta’pa ma’kadami tu PUANG lako Musa, Harun sola Miryam, Nakua: Tassu’komi sola tallu lako Tenda Kasitammuan. Tassu’mi sola tallui.

⁵Songlo’mi tu PUANG lan lentong gaun, Nabendan dio to’ ba’ba Tenda Kasitammuan, Natambaimi tu Harun sola Miryam, malemi sola duai mennolo.

⁶Ma’kadami tu Puang Nakua: Perangimi tu kadangKu. Iake denkomi misa’ nabi, ma’din Kupasombo tu Kaleku lan patiro mendeata, ba’tu ma’kada lako kalena lan tindo.

⁷Apa tae’ Kupasusi to tu taungKu Musa tu manappa’ lan mintu’ banuangKu.

⁸PudukKu kalena sipa’kada pudukna, Kupamanassan tongan sia tae’ Kubunianni, sia natiro tu pa’kaleanNa PUANG, ma’apai anna tae’ mimataku’ unta’tanni tu taungKu Musa?

⁹Iamoto nare’dek tu ara’Na PUANG lako tu tau sola duai, anNa male tu Puang.

¹⁰Iatonna tiangka’mo tu gaun dao Tenda Kasitammuan, pakalan golenammi tu Miryam susito ambun makko. Iatonna messailemo tu Harun lako Miryam, natiromi tu misa’ to golenan.

¹¹Ma’kadami tu Harun lako Musa nakua: O puangku, da mipapassannikan te kasalan iate, tu kipogau’ diona kabagangki.

¹²Da nasusi to pia mate dadi mangura, tu bosimo duku’na pira, tonna tassu’ lan mai pa’tambukanna indo’na.

¹³Metambami tu Musa lako PUANG nakua: O Puang Matua, pamondoi tu golenna.

¹⁴Ma’kadami tu PUANG lako Musa, Nakua: Iake natittudui ambe’na tu lindona, tae’raka na la dipakasiri’ lan pitung allo? Elo’namo nadipasalian to’ tenda pitung allo, namane ma’din sule sirau tau.

¹⁵Dipasalianmi to’ tenda tu Miryam pitung allo; iatu tau iato tae’pa nake’de’ dio mai, tonna tae’pa nasule tu Miryam sirau tau.

¹⁶Mangkato ke’de’mi tu tau dio mai Hazerot, anna ma’tenda lan padang pangallaran Paran.