Read Toraja-Sa'dan KADIBILANGAN 14 Bible Online

KADIBILANGAN 14 - Toraja-Sa'dan bible

KADIBILANGAN 14

¹Attu iato iatu mintu’ kasirampunan umpekapuai gamaranna sia sitangiran lan bongi iato.

²Mintu’ tu to Israel umparopo’ Musa sola Harun; anna ma’kada tu mintu’ kasirampunan lako, nakua: Ha’a, melo kengki mate bangmo dio Mesir, ba’tu lan te padang pangallaran.

³Ma’apai Nala umbaakan PUANG lako tondok iato, angki tibambang nakande pa’dang sia iatu baineki sia anakki la dirampa? Tae’raka namelo, ke sule bangmokan lako Mesir!

⁴Pada sipa’kada-kadami tu tau iato mai nakua: Melo ke taangka’i tu misa’ pangulu, anta sule lako Mesir.

⁵Attu iato lumbangmi Musa sola Harun dio pentirona mintu’ kombongan kasirampunanna to Israel.

⁶Apa iatu Yosua, anakna Nun, sia Kaleb, anakna Yefune, sangbilangan tu to umparessa buni tondok iato, usserek-serek tamangkalena;

⁷anna ma’kada lako mintu’ kasirampunan to Israel nakua: Iatu tondok mangka kiola lendu’ angki paressai, iamo tondok lendu’ melona.

⁸Iake naalaki’ penaanNa PUANG, manassa Nabaaki’ tama tondok iato sia Nakamaseangki’, iamotu misa’ tondok sebo pangandu’ sia tani’ enoan.

⁹Sangadinna da mipabali-bali lako PUANG sia da mikataku’i tu pa’tondokan iato, belanna la tapokande, sia iatu ongan-onganna lendu’mo dio mai kalena sia PUANG tu ussisolangki’, da ammi kataku’i.

¹⁰Attu iato sipa’kadami tu mintu’ kasirampunan iato la ulleba’i batu tu tau sola duai. Apa iatu kamala’biranNa PUANG payan lako mintu’ to Israel lan Tenda Kasitammuan.

¹¹Ma’kadami tu PUANG lako Musa, Nakua: Sangapapara te bangsa iate la ussayuNa’ sia sangapapara te tau iato mai tang la umpatonganNa’, moi angKu pogau’mi tu mintu’ tanda kalle-kallean dio lu tau iato mai?

¹²La Kuparampoi ropu te bangsa iate sia la Kusabu’i, angKu padadiko misa’ bangsa kapua sia mawatang na iate bangsa iate.

¹³Ma’kadami tu Musa lako PUANG nakua: Iake narangii to Mesir — te bangsa inang Mipatassu’mo dio mai tondok to Mesir tete dio kamatotoramMi —

¹⁴la ma’kada lako tau lan tondok iate, tu mangka urrangii, kumua Kamu, o PUANG, urrondongi te bangsa iate sia mangkamoKomi, o PUANG sitiro lindo, anna iatu gaunMi daona lu tau iato mai sia doloKomi lan lentong gaun ke allona sia lan lentong api ke bonginna.

¹⁵Iake la Mipateimi te bangsa iate sae lako tappunna, manassa la ma’kada tu mintu’ bangsa urrangimi tu karebamMi, nakua:

¹⁶Belanna tang Nabelamo tu PUANG ussolanni te bangsa iate tama tondok, tu Naalluranni umpalao sumpa, iamoto Nasanggangi lan lu padang pangallaran.

¹⁷Totemo da’ito na iatu kuasanNa Puang paan tu kamatandeanNa, susitu mangka Mipokada, Mikua:

¹⁸PUANG tu kalando pesuka’ sia kapua kamasokananNa, tu umpagarri’ kakelokan sia kapatodo-tintingan, tu tae’ Naeloranni tang la diukung tu to sala, apa Napapakkanni tu kakadakeanna mintu’ ambe’ sae lako anakna sae lako osso’ ma’pentallunna sia ma’penna’pa’na.

¹⁹Pagarri’i tu kakadakeanna te bangsa iate situru’ kakapuanna kamasokanamMi, susi kamangkamMi umpagarri’ kasalanna bangsa iate randuk dio mai tondok Mesir rampo indete.

²⁰Ma’kadami tu PUANG Nakua: Tete dio pengkamoyamu angKu pagarri’i.

²¹Apa la lelukraka tuoKu sia tae’ nasalai kamala’biranNa PUANG la ussamboi mintu’ lino.

²²Kumua tae’ misa’ muane, tu mangka untiro kamala’birangKu sia tanda kalle-kallean mangka Kupogau’ lan Mesir sia lan padang pangallaran, sia pessangpuloMo’ nasandak sia tang umperangii kadangKu,

²³la untiro tondok, tu mangka Kuallu’ umpalao sumpa lako nene’ to dolona! Ondongpi moi misa’ tu mintu’ to ussayuNa’ tae’ la untiroi tu tondok iato.

²⁴Sangadinna taungKu Kaleb, tu ma’penaa senga’ sia lantuk penaanna urrundu’Na’, la Kusolan tama tondok, tu mangka naola, sia la napomana’ bati’na.

²⁵Iatu to Amalek sia to Kanaan torro dio Padang marante. La tibalikkomi ammi sule ma’palulako padang pangallaran, umpatu tasik Teberau.

²⁶Ma’kada poleomi tu PUANG lako Musa sola Harun Nakua:

²⁷Sangapapara masainna te kasirampunan kadake iate la umparopo’Na’? Iatu mintu’ pa’paropo’na to Israel lako Kaleku, Kurangi nasang.

²⁸Kuanni kumua: Susite tu kadanNa PUANG: La lelukraka tuoKu, manassa la Kupogau’ lako kalemi, susitu mipokada tama pa’perangingKu!

²⁹Inde te padang pangallaran la tibambang tu batang rabukmi, iamotu ba’tu pira-pira tu to mangka dibilang, situru’ mintu’ bilanganna, randuk dio mai duangpulo taunna sia la’bi, belanna kama’paroposammi lako Kaleku.

³⁰Manassa inang tae’ mila tama tondok, tu mangka Kuallu’ umpalao sumpa la Kunii umpatorrokomi lan, sangadinna Kaleb, anakna Yefune sia Yosua, anakna Nun!

³¹Iatu mai anakmi tu mangka mipokada diona a’ganna, kumua la dadi to dirampa — tau iato la Kusolan tama, anna tandai tu tondok misayu.

³²Apa iatu kamu, iatu batang rabukmi la tibambang lan padang pangallaran iate,

³³na iatu mai anakmi la patangpulo taunna lan padang pangallaran salamba salao, lao mangkambi’ sisurung tu gau’ salami sae lako tibambang nasang tu batang rabukmi lan padang pangallaran.

³⁴Situru’ tu bilanganna allo minii umparessa bunii tu tondok, iamotu patangpulo allona, sangtaun ke sangallooi, ammi sisurung tu kakadakeammi lan patangpulo taunna, kumua, ammi issanni battuananna tu kamembokorangKu.

³⁵Akumo, tu PUANG, mangka ma’kada. Manassa la Kupogau’ susite lako mintu’ kasirampunan kadake iate, tu massituru’ umbaliNa’. Lan te padang pangallaran la nanii sabu’ sia la nanii mate.

³⁶Iatu muane tu mangka nasua Musa la umparessa buni tondok, sia iatonna sulemo, iami napobannang tu mintu’ kasirampunan ma’paropo’ lako Musa, belanna umpalele kareba kadake diona tu tondok iato.

³⁷Tau iate, tu umpalele kadake diona tondok iato, mate nasang, belanna narua kasanggangan dio oloNa PUANG.

³⁸Apa iatu Yosua, anakna Nun, sia Kaleb, anakna Yefune, tontong siapa tuo dio mai tu to lao umparessa buni tondok iato.

³⁹Naparampomi Musa te kada iate lako mintu’ to Israel, namassanda bolong tu tau iato.

⁴⁰Masiang melambi’ to, la moraimi tu tau iato tuka’ langngan botto buntu, anna metamba-tamba, nakua: Iate kami ke’de’mokan lako to’ inan, tu Napokada PUANG, belanna kasalammokan.

⁴¹Apa ma’kada tu Musa nakua: Ma’apai ammi pasalai tu parentaNa PUANG? Manassa tae’ na la dadi to.

⁴²Da mike’de’, belanna tae’ Narondongkomi PUANG, kumua da ammi talo dio tingayona ualimmi,

⁴³belanna iatu to Amalek sia to Kanaan umbalikomi, ammi tibambang nakande pa’dang, belanna miboko’imo tu PUANG, sia tang la Narondongmokomi PUANG.

⁴⁴Apa napabarani bang tu penaanna tuka’ langngan botto buntu, apa iatu patti basseNa PUANG sola Musa tae’ natampei tu to’ tenda.

⁴⁵Attu iato mengkalaomi tu to Amalek sia to Kanaan, tu ma’tondok dao lu ma’buntunna, anna taloi sia napasisarak-sarak tau iato, anna sorong boko’ sae lako Horma.