Read Toraja-Sa'dan KADIBILANGAN 15 Bible Online

KADIBILANGAN 15 - Toraja-Sa'dan bible

KADIBILANGAN 15

¹Ma’kadami tu PUANG lako Musa Nakua:

²Ma’kadako lako to Israel sia kuanni mukua: Iake saekomi tama tondok tu Kukamaseangkomi la minii ma’tondok,

³sia mipemalaran lako PUANG tu pemala’ pantunu, la pemala’ ditunu pu’pu’, la pemala’ pangrere’, la umpangallonni misa’ pangallonan, ba’tu pemala’ tanning inaa, ba’tu pemala’ allo kapuammi, la umpadenan PUANG misa’ bau busarungngu’ dio mai sapi ba’tu domba sia bembe’,

⁴attu iato iatu to umpennoloan pemala’na lako PUANG la umbaa pissan taa sangpulona epa[6] ta’pung manisak, tu dipasigerok minna’ sangtaa a’pa’na hin[7] la dipokande dipemalaran.

⁵Sia uai anggoro’ dipopemala’ pantedok; sangtaa a’pa’na hin la mukarang dio pemala’ ditunu pu’pu’ ba’tu pemala’ pangrere’, ke misa’oi domba birang.

⁶Iake misa’ domba laki la mupennoloan duang taan sangpulona epa ta’pung manisak, dipasigerok minna’ sangtaa tallunna hin dipokande dipemalaran,

⁷sia uai anggoro’, sangtaa tallunna hin dipopemala’ pantedok. La mipennoloan lako PUANG dipobau busarungngu’.

⁸Iake mupemalaranni tu misa’ sapi dipopemala’ ditunu pu’pu’, ba’tu la dipopemala’ pangrere’, la umpalesso’ misa’ pangallonan ba’tu dipopemala’ kasalamaran lako PUANG,

⁹manassa la nabaa tu tallung taan sangpulona epa ta’pung manisak, dipasigerok minna’ sangtangnga hin, dipasisola tu sapi dipokande dipemalaran.

¹⁰Sia uai anggoro’ la mubaa sangtangnga hin la dipopemala’ pantedok; mintu’nato la dipopemala’ pantunu la umpadenan PUANG misa’ bau busarungngu’.

¹¹Susimoto la napogau’ tau, ke misa’oi sapi ba’tu misa’oi domba laki, ba’tu ke misa’oi patuoan bitti’, iamotu domba ba’tu bembe’.

¹²Pada tu bilanganna apa mipemalaran la mipogauran susito, ke misa’oi, unturu’ kabudanna.

¹³Mintu’ batang to Israel la umpogau’i susito, ke umpennoloanni pemala’ pantunu, la dipobau busarungngu’ lako PUANG.

¹⁴Sia, iake misa’ to mentiruran torro ussisolangkomi, ba’tu misa’ to sae tu siosso’mo dio lu kamu, sia iake umpennoloanni pemala’ pantunu, dipobau busarungngu’ lako PUANG, manassa la napogau’ susi kamu.

¹⁵Iatu mintu’ kombongan, misa’ri tu aluk dipondok la napeolai la kamu la iatu to sae torro dio lu kamu; iamotu misa’ aluk dipondok matontongan la naturu’ ossorammi; kamu sia to sae la pada bang dio oloNa PUANG.

¹⁶Misa’ri tu sukaran aluk sia misa’ri atoran la mituru’ la kamu la to sae torro dio lu kamu.

¹⁷Ma’kadami tu PUANG lako Musa, Nakua:

¹⁸Ma’kadako lako to Israel sia kuanni, kumua: Iake rampokomi tama tondok, tu Kunii la ussolangkomi,

¹⁹manassa iake mikandei tu kande lan tondok, la mipennoloan tu pa’duruk lako PUANG.

²⁰Iatu bunga’ pealammi, iamotu ta’pung dalle sisikan, la digaragai pa’ranggina la dipennoloan dipopa’duruk susikomi umpennoloan pa’duruk lako kalemi dio mai panglullurammi, la susi dukato mipennoloan dipopa’duruk.

²¹Dio mai bunga’na pealammi, iamotu ta’pung dalle sisikan la mipennoloan pa’duruk lako PUANG misiosso’i.

²²Iake tae’ miangga’i tang unturu’i te misa’ pepasan tu mangka Napokada PUANG lako Musa,

²³dio mai tu mintu’na apa Napepasanan PUANG lako kalemi nalopian Musa, randuk allo iato tu Nanii mepasan PUANG sia undinna, misiosso’i,

²⁴iake tang naissanni sia tang naangga’i kasirampunan umpogau’i susito, manassa iatu mintu’ kasirampunan la umpennoloan misa’ anak sapi laki la dipopemala’ ditunu pu’pu’, dipobau busarungngu’ lako PUANG, sisola kande dipemalaran sia pemala’ pantedok unturu’ atoranna, sisola bembe’ laki la diposuru’ pengkalossoran.

²⁵Attu iato to minaa la umpadenan kadiseroian kasalan mintu’ kasirampunan to Israel, anna dipagarri’ tu kasalanna, belanna tae’ naangga’i sia belanna napennoloan tu pamengan pemala’na lako PUANG dipopemala’ pantunu sola suru’ pengkalossoranna dio oloNa PUANG bannang dio kasalanna tu tae’ naangga’i.

²⁶Manassa la dipagarri’ kasalanna tu mintu’ kasirampunan to Israel, susi duka to sae, tu torro dio lu kamu, belanna narampoi kasalan iato tu mintu’ bangsa, anna tae’ naangga’i.

²⁷Iake den misa’ tau umpogau’ kasalan tang diangga’i, manassa la umpennoloan misa’ bembe’ birang sangtaunmo la diposuru’ pengkalossoran.

²⁸Na to minaa la umpadenanni kadiseroian kasalan tu to umpogau’ kasalan tang naangga’i napobua’ penggauran tang naangga’i untengkai pepasanNa PUANG, anna dipagarri’ tu kasalanna.

²⁹Misa’ri sukaran aluk la mituru’, la batang to Israel sia la to sae torro dio lu kamu, diona to umpogau’ misa’ kasalan tang diangga’i.

³⁰Apa minda-minda tu unnangga’i umpogau’ kasalan, la batang to Israel, la to sae, iamo umpa’kada solangi PUANG, na tau iato mai la disabu’i dio mai bangsana,

³¹belanna umpamatuna kadanNa Puang sia untengkai pepasanNa; manassa la disabu’i, na iatu kakadakeanna napassan kalena.

³²Iatonna lan padang pangallaran tu to Israel, diapparammi tu misa’ tau marassan urruruk ranga’-ranga’ tonna allo katorroan.

³³Iatu to unnapparanni tu tau iato marassan urruruk ranga’-ranga’, nasolammi lako Musa sola Harun sia mintu’ kasirampunan.

³⁴Napatadangmi, belanna tae’pa nadipamanassa tu apa la digauranni.

³⁵Attu iato ma’kadami tu PUANG lako Musa, Nakua: Manassa la dipatei tu tau iato sia mintu’ kasirampunan la umbatui dio salianna to’ tenda.

³⁶Nasolammi mintu’ kasirampunan tu tau iato lako salianna to’ tenda, nabatui anna mate, susitu mangka Napepasanan PUANG lako Musa.

³⁷Ma’kadami tu PUANG lako Musa, Nakua:

³⁸Ma’kadako lako to Israel mukuanni, kumua la nagaragan kalena tu rombe-rombe dio biring bayu lamba’na, nasiosso’i sia la naampinni’ bannang lango-lango tu rombe-rombe ma’pakilala dio biring tamangkalena.

³⁹Iatu iannato la miporombe-rombe; iake mitiroi lako, la umpakilalakomi tu mintu’ pepasanNa PUANG ammi karitutui tang unturu’ tangnga’ bu’tu lan penaammi ba’tu pa’poraianna matammi, da midinaran la pasandak salu lako rampanan kapa’,

⁴⁰kumua ammi kilalai sia unturu’i tu pepasanKu, ammi masero dio oloNa Kapenombammi.

⁴¹Akumo tu PUANG, Kapenombammi, tu mangka ussolangkomi dio mai tondok Mesir, la dadi Kapenombammi. Akumo tu PUANG, Kapenombammi.