Read Toraja-Sa'dan KADIBILANGAN 16 Bible Online

KADIBILANGAN 16 - Toraja-Sa'dan bible

KADIBILANGAN 16

¹Iatu Korah, anakna Yizhar, anakna Kehat, anakna Lewi umpasirampun tau sola Datan sia Abiram, anakna Eliab sia On, anakna Pelet, to Ruben.

²Bendanmi tu tau iato mai dio olona Musa sola tu duaratu’ limangpulo tau dio mai to Israel, iamotu pangulunna kasirampunan, to ditambai tama pa’kombongan, to kalelean.

³Sirampunmi tu tau iato umbali Musa sola Harun, anna ma’kada lako, nakua: Silasamoto tu diona kamu, belanna iatu mintu’ kasirampunan to masero nasang, na iatu PUANG dio lu tau iato mai. Ma’apai ammi umpamatande kalemi dao kombonganNa PUANG?

⁴Iatonna rangimi Musa tu kada iate, lumbangmi sae rokko padang.

⁵Anna ma’kada lako Korah sia mintu’ tu to massituru’, nakua: Masiang manassa PUANG la umpa’peissananni, minda tu marengke’ lako, sia minda tu to masero, tu Napopengkareke’ lako Kalena; minda-minda tu la Napilei Puang, manassa la Napopengkareke’ lako Kalena.

⁶Pogau’mi te: Alanni kalemi tu peroyan, tu iko Korah la kamu tu to massituru’.

⁷Patamai tu api sia patorroi dao tu dupa ke masiang, dio oloNa PUANG. Sia iatu muane la Napilei PUANG, iamoto tu to masero. Silasamoto tu diona kamu, e to Lewi.

⁸Ma’kadami tu Musa lako Korah, nakua: Perangiimi, e kamu to Lewi.

⁹Tang silasaporokomika, kumua Kapenombanna Israel umpamarimbangankomi dio mai kasirampunan to Israel la umpopengkareke’komi lako Kalena, ammi toe pentoean dio kemaNa PUANG sia la bendan dio tingayona kasirampunan la ungkamayai tu tau iato mai,

¹⁰sia Napopengkareke’ko sia mintu’ siulu’mu tu to Lewi musisolan? La mituntun dukaparaka tu katominaan?

¹¹Iamoto, iatu iko sola tu to massituru’ sipakulu-kulukomi umbali PUANG. Belanna mindara tu Harun, ammi paropo’ri?

¹²Napesuammi Musa tu tau lao untambai tu Datan sola Abiram, anakna Eliab, apa ma’kada nakua: Tae’ kila lao.

¹³Misangaraka apa bitti’ tu mipatassu’kan dio misa’ tondok sebo pangandu’ sia tani’ enoan, ammi pamatekan lan te padang pangallaran sia la morai dukapokomi unnangka’ kalemi dadi to umparentakan?

¹⁴Inang tae’ misolangkanni tama misa’ tondok tu sebo pangandu’ sia tani’ enoan sia tae’ duka pa’lak sia pa’lak anggoro’ mibenkan la kipomana’? Misangaraka iatu matanna te tau ma’din mipabuta? Tae’ kila lao.

¹⁵Attu iato re’dek tonganmi tu ara’na Musa, anna ma’kada lako PUANG nakua: Da’ Mitiroi tu kande dipemalaranna. Moi misa’ keledai tae’pa kuala dio mai tau iato mai sia moi misa’ tau tae’ duka kupandasa.

¹⁶Ma’kadami Musa lako Korah nakua: Iatu iko sola mintu’ to massituru’, mennoloko masiang dio oloNa PUANG, iko sia tau iato mai sia Harun.

¹⁷La pantan miala tu peroyammi, ammi parokkoi dupa, ammi pantan umpennoloanni tu peroyammi lako PUANG duaratu’ limangpulo; iko sola Harun, pantankomi peroyammi.

¹⁸Pantan naalami tu peroyanna, naparokkoi api, napatorroi dao tu dupa, anna bendan tu tau iato dio to’ ba’ba Tenda Kasitammuan sola Musa na Harun.

¹⁹Iatonna rampunmi Korah tu mintu’ to sirampun dio to’ ba’ba Tenda Kasitammuan la unneai tu tau sola duai, payanmi tu kamala’biranNa PUANG lako mintu’ kasirampunan.

²⁰Ma’kadami tu PUANG lako Musa sola Harun Nakua:

²¹Sarakkikomi kalemi sola dua dio mai te kasirampunan, angKu sanggangi lan sangkappidian mata te tau iate mai.

²²Attu iato lumbangmi sola dua rokko padang, anna ma’kada nakua: O Puang Matua, Kapenombanna sunga’na mintu’ batang kale; iake misa’ri muane kasalan, la re’dekraka ara’Mi lako mintu’ kasirampunan?

²³Ma’kadami tu PUANG lako Musa, Nakua:

²⁴Ma’kadako lako mintu’ kasirampunan, mukua: Soro’komi dio mai nalili’ inan nanii Korah, Datan sola Abiram.

²⁵Ke’de’mi tu Musa anna male lako Datan sia Abiram, anna turu’i mintu’ pekaamberanna to Israel.

²⁶Ma’kadami lako kasirampunan nakua: Soro’komi dio mai tendana te muane tang mekaaluk sia da len ammi kaka’i tu mintu’ apanna, kumua da midipisanni sola, natumang mintu’ kasalanna.

²⁷Soro’mi tu tau dio mai nalili’ inan nanii Korah, Datan sola Abiram. Tassu’mi tu Datan sola Abiram, nabendan dio to’ ba’ba tendana sola tu mai bainena, anakna muane sia anak bitti’na.

²⁸Ma’kadami Musa nakua: Iatu iannate la mitandai, kumua Nasuamo’ PUANG la umpogau’i tu mintu’na penggauran iate, tangia pa’tangngarangku te.

²⁹Iake matei te tau iate susi kamateanna simisa’-misa’ tau, sia iake nalambi’i lampakna te tau iate, susitu mai simisa’-misa’ tau, manassa tae’ na PUANG ussuana’.

³⁰Apa iake Napadadii PUANG tu apa ba’ru, anna menganga te padang unnampello’i te tau iate mai sola mintu’ apanna, naurungan mengkalao tuo tama lino to mate, manassa la mitandai kumua tau iate ussayumo PUANG.

³¹Mane ra’pa’ mangka napokada tu mintu’ kada iate, pakalan tipa’duami tu padang diongna lu tau iato,

³²sia menganga tu padang, anna ampello’i tu tau sola to lan banuanna sia sola tu mai taunna Korah sia mintu’ barang apanna.

³³Susimoto tu tau iato mengkalao tama lino to mate sola mintu’ taunna; anna sikemunni padang, naurungan pa’de poto’mo dio lu kombongan.

³⁴Iatu mintu’ to Israel, tu ullilingi, mallaimo, tonna rangimi tu pelallakna tau iato mai, belanna nasanga, kumua: Naampello’ dukaki’ manii te padang.

³⁵Songlo’mi tu api dao mai PUANG, anna pisanni tu muane duaratu’ llimangpulo, tu to umpemalaran dupa.

³⁶Ma’kadami tu PUANG lako Musa, Nakua:

³⁷Pokadanni Eleazar, anakna to minaa Harun, kumua la naala tu peroyan, lan mai apa ditunu sia seranni lao tu api, belanna maindan tu iannato,

³⁸iamotu peroyanna to umpogau’ kasalan, anna sisayuran sunga’na, anna ditampa tu peroyan iato mendadi susito papan manipi’, anna disapuran inan pemalaran, belanna napennoloammo dio oloNa PUANG, naurungan maindan; susimoto napotanda pengkilalan mintu’ to Israel.

³⁹Attu iato naalami to minaa Eleazar tu peroyan tambaga, tu napennoloan to nakande api, anna tampai tau la nasapuran inan pemalaran,

⁴⁰la dadi misa’ tanda pengkilalan lako to Israel, kumua da namengkareke’ lako Puang tu to tang sipatu, tu tang sangbilangan bati’na Harun, la untunu dupa dio oloNa PUANG, sia da naruai kasanggangan susi Korah sia to massituru’ nasisolan, susitu Napokada PUANG lako Eleazar tu nalopian Musa.

⁴¹Iatonna masiangnato ma’paropo’mi tu mintu’ kasirampunanna to Israel lako Musa sola Harun, nakua: Mipateimo tu taunNa PUANG.

⁴²Iatonna ma’misa tu mintu’ kasirampunan umbali Musa sola Harun, nama’palulako Tenda Kasitammuan, natiromi tu gaun ussamboi sia payanmo tu kamala’biranNa PUANG.

⁴³Rampomi tu Musa sola Harun dio tingo Tenda Kasitammuan.

⁴⁴Ma’kadami tu PUANG lako Musa, Nakua:

⁴⁵Soro’komi dio mai te kasirampunan, belanna la Kusanggangi lan sangkappidian mata. Attu iato lumbangmi rokko padang sola duai.

⁴⁶Ma’kadami Musa lako Harun nakua: Alai tu misa’ peroyan, parokkoi api lan mai inan pemalaran, patorroi dupa dao, ammu madomi’ lako kasirampunan sia padenanni kadiseroian kasalan, belanna tassu’mo tu kare’dekanNa PUANG sia randukmo tu kamandasan.

⁴⁷Naalami Harun tu (misa’ peroyan), susitu napokada Musa, nama’dondo tama tangnga kombongan, pakalan iatu kamandasan randukmo urrua to buda; napatorromi tu dupa dao, anna padenanni kadiseroian kasalan tu to buda.

⁴⁸Bendanmi lan alla’na to mate na to tuo, anna radan tu kamandasan iato.

⁴⁹Iatu matenamo narua kamandasan iato, den sangpulo a’pa’ sa’bu mpituratu’ tau, senga’ iatu mate natumang penggauranna Korah.

⁵⁰Iatonna sulemo tu Harun lako Musa dio to’ ba’ba Tenda Kasitammuan, radanmo tu kamandasan.