Read Toraja-Sa'dan KADIBILANGAN 17 Bible Online

KADIBILANGAN 17 - Toraja-Sa'dan bible

KADIBILANGAN 17

¹Ma’kadami tu PUANG lako Musa, Nakua:

²Ma’kadako lako to Israel sia alai dio mai arungna simisa’o suku namisa’o tekken, iamotu sangpulo dua tekken unturu’ sukunna; pada la musura’ tu sanganna dio lu tekkenna.

³Apa, iatu sanganna Harun la musura’ dio tekkenna Lewi, belanna misa’ tekken dipapatuan pangulu sukunna.

⁴La mupatorro lan Tenda Kasitammuan dio olona kasa’bian, tu Kunii biasa ussitammuangkomi.

⁵Iatu to Kupilei, la membunga tu tekkenna; susimoto la Kunii umparapa’i tu pa’paropo’na to Israel, tu napopa’paropo’ lako kalemi, naurungan tae’mo Angku rangi pole’i.

⁶Iatonna parampomi Musa lako to Israel te kada iate, napa’benganmi mintu’ arungna simisa’ arung misa’ tekken, iamotu sangpulo dua tekken unturu’ sukunna na iatu tekkenna Harun sisolamo tekken iato.

⁷Napatorromi Musa tu mintu’ tekken iato dio oloNa PUANG lan Tenda Kasa’bian.

⁸Masiangto tonna tama Tenda Kasa’bian tu Musa, mangngami untiroi tu tekkenna Harun, tu dipapatuan suku Lewi, menta’bi; umpabu’tumo ta’bi, denmo ta’binna sia ta’pa matasak tu bua badanna.

⁹Naalami Musa tu mintu’ tekken iato dio mai oloNa PUANG, nabaai lako salian, tu naninna to Israel. Attu iato natiromi, anna pantan unnalai tu tekkenna.

¹⁰Ma’kadami tu PUANG lako Musa, Nakua: Baai sule tu tekkenna Harun lako tingo kasa’bian, anna dipatorro napotanda tu pabali-bali, ammu paupu’i tu pa’paropo’na tau iato, sia tae’mo Kurangi lenni, da namate.

¹¹Napogau’mi Musa susitu Napepasanan PUANG lako kalena.

¹²Belanna mangkamo ma’kada tu to Israel lako Musa, nakua: Manassa la ka’tumo tu sunga’ki, la sabu’mokan, la sabu’ nasangmokan.

¹³Minda-minda tu mengkareke’ bangri lako KemaNa PUANG, la mate. Ma’apai angki la purara ka’tu sunga’ki?